1 Kolinto 4 - Le Nouveau Testament en Kikwango 1950

Bonso bau fwiti kubanza balongi nlongo

¹ Bika bantu tanga beto bonso basielo ya Klisto, ye banlundi ya mambu ya kinsweki ya Nzambi. 2 Kol. 6:4; Kolo. 1:25; 1 Pet. 4:10

² Mu mambu yai yo ikele kusoswa kwa banlundi na bau fwiti kuvanda ya kwikama.

³ Kansi kwa mono yo ikele mambu ya fioti mingi na beno fundisa mono keti ya mfundusu ya kimuntu, e, mono kibeni difundisa ve,

⁴ kadi mono zaba mambu ya mono kibeni ve, kansi yandi ya fundisa mono ikele Mfumu. Nk. 143:2

⁵ Sambu na yai fundisa ve ntete na ntangu ya Mfumu takwiza, yandi tatwala ku mwini mambu ya kinsweki ya tombe, ye monikisa makani ya mintima, buna muntu na muntu tabaka nsikulu ya yandi tuka Nzambi. Lom. 2:16, 29; Nzai. 20:12

Beto ikele na kima ve ya beto konda kubaka

⁶ Bampangi, sambu na beno, mono imene kutula mambu yai va mono kibeni ye va Apolo, na beno talonguka sambu na beto kuluta ve mambu ya ikele kusonama, na mosi ya beno lenda kuditombola ve kwa bankaka sambu na bedisa yankaka.

⁷ Kadi nani lutisa nge ? Ye nki ikele na nge ya nge imene kubaka ve ? Kansi kana nge imene kubaka yo, sambu na nki nge yana bonso nge bakaka yo ve ? Yoa. 3:27; Lom. 12:6; Yak. 1:17

⁸ Ntangu yai beno imene kuyukuta, beno imene kwisa mvwama, beno imene kuvanda bantinu kondwa beto. Mono zola mingi beno vanda bantinu, na beto mpe lenda kuyala na beno.

Bantumwa ikele kima ya kutala kwa nsi, kwa banjo ye kwa bantu

⁹ Kadi mono banza Nzambi imene kutula beto bantumwa nanima na yonso, bonso bantu ya bediswa ku lufwa; kadi beto kutulwa kima ya kutala kwa nsi ye kwa banjo ye kwa bantu. Lom. 8:36; Eb. 10:33

¹⁰ Beto ikele banzoba sambu na Klisto, kansi beno ikele na ngangu mu Klisto; beto ikele lebakana, kansi beno ikele na ngolo; beno ikele kuzitiswa, kansi beto ikele kusaulwa. 2 Kol. 13:9

¹¹ Ti lokula yai mpe beto ikele na nsatu ye kiwini, beto konda mvwatu, beto ikele kubulwa, beto ikele na nzo ya kuvanda ve. 2 Kol. 4:8; 11:23; Fili. 4:12

¹² Beto ikele kusala ngolo na maboko ya beto. Bu bau finga beto, beto sakumuna; bu bau zoma beto, beto vibidila. Mat. 5:44; Luk. 6:28; 23:34; Bis. 7:60; Lom. 12:14

¹³ Bu beto ikele kutubwa mbi, beto bombidila. Beto ikele bonso mvindu ya nzi, ye mbi ya bima yonso, ti ntangu yai. Nk. Niongo 3:45

¹⁴ Mono sonika mambu yai ve sambu na monisa beno nsoni, kansi kulonga beno bonso bana ya mono ya zolwa. 1 Tes. 2:11

¹⁵ Kadi kana beno ikele na banlongi mafunda kumi mu Klisto, kansi beno ikele na batata mingi 4:8-5:4 ve; kadi mono butaka beno mu Klisto Yesu mu nsamu mbote. Ngal. 4:19; File. 10

¹⁶ Sambu na yai, mono bombidila beno; Beno vanda balandi ya mono. 1 Kol. 11:1; Ngal. 4:12; Fili. 3:17; 1 Tes. 1:6; 2:14; Ef. 5:1

¹⁷ Sambu na yai mono fidisaka Timoteo kwa beno, yandi ikele mwana ya mono ya zolwa ye ya kwikama mu Mfumu. Yandi tabambukisa beno sambu na banzila ya mono ya ikele mu Klisto, bonso mono ikele kulonga na sika yonso mu mabundu yonso.

¹⁸ Kansi bankaka ikele kuditombola bonso mono ikele kwiza kwa beno ve.

¹⁹ Kansi mono takwiza nswalu kwa beno, kana Mfumu zola, ye mono tazaba ve mambu ya bau ya ditombola, kansi ngolo ya bau. 1 Kol. 16:7; Yak. 4:15

²⁰ Kadi kimfumu ya Nzambi ikele mu mambu ve, kansi mu ngolo. 1 Tes. 1:5

²¹ Beno zola nki ? Mono kwiza kwa beno na fimbu, keti mu zola ye mu mpeve ya nlembami ?