1 Kolinto 3 - Le Nouveau Testament en Kikwango 1950

Paulu songa yandi ye Apolo ikele basielo kaka

¹ Bampangi, mono lenda ve kutuba kwa beno bonso kwa bankwa kimpeve kansi bonso kwa bankwa kinsuni, bonso kwa bana fioti mu Klisto. Eb. 5:12; 1 Pet. 2:2

² Mono pesaka beno mabele, kansi madia ya ngolo ve, kadi beno lungaka na yau ve, e, ntangu yai mpe beno lunga ve;

³ kadi ti ntangu yai beno ikele bankwa kinsuni. Kadi nakati na beno ikele kimpala ye kunwana, buna beno ikele bankwa kinsuni ve, ye ikele kutambula mu kimuntu ve ? 1 Kol. 1:11; 11:18; 2 Kol. 12:2; Ngal. 5:20

⁴ Kadi bu mosi tuba: Mono ikele ya Paulu; ye yankaka tuba: Mono ikele ya Apolo; beno ikele ya kinsuni ve ? 1 Kol. 1:12

⁵ Buna Apolo ikele nki ? Ye Paulu ikele nki ? Bau ikele basielo ya kwikidisaka beno, muntu na muntu bonso Mfumu pesaka yandi. Lom. 12:3; 1 Kol. 7:17

⁶ Mono kunaka, Apolo tulaka masa, kansi Nzambi menisa yau.

⁷ Buna yandi ya kuna ye tula masa ikele kima ve, kansi Nzambi ya menisa yau.

⁸ Yandi ya kuna ye ya tula masa ikele mosi, kansi muntu na muntu tabaka nsendo ya yandi kibeni, bonso kisalu ya yandi ikele. Luk. 19:15

⁹ Kadi beto ikele basadi sikamosi na Nzambi, beno ikele dilanga ya Nzambi, ye ntungulu ya Nzambi. 2 Kol. 6:1

Yandi tulaka lufulu, bankaka tungaka va yo

¹⁰ Mono imene kutula lufulu bonso ntungi ya ngangu, bonso nlemvo ya Nzambi pesaka mono, kansi yankaka ikele kutunga va yo. Kansi bika muntu na muntu tala mbote bonso yandi ikele kutunga va yo.

¹¹ Kadi muntu mosi lenda ve kutula lufulu yankaka, kansi yina ya imene kutulwa, ikele Yesu Klisto. Yes. 28:16; Ef. 2:20

¹² Kansi kana muntu tunga va lufulu yai, wola, palata, matadi ya ntalu, minti, nianga, matiti,

¹³ kisalu ya muntu na muntu tamonika; kadi lumbu tamonikisa yo, sambu na yo tazaikiswa mu tiya. Tiya kibeni tateza kisalu ya muntu na muntu bonso yo ikele.

¹⁴ Kana kisalu ya muntu, ya yandi tungaka va yo ikele kuvanda, yandi tabaka nsendo.

¹⁵ Kana kisalu ya muntu yokwa tiya, yandi takonda nsendo, kansi yandi kibeni tavuluswa, kansi bonso tuka tiya.

Bantu ikele tempelo ya Nzambi

¹⁶ Beno zaba ve na beno ikele tempelo ya Nzambi, ye Mpeve ya Nzambi ikele vanda mu beno ? 1 Kol. 6:19; 2 Kol. 6:16; Eb. 3:6

¹⁷ Kana muntu kufwa tempelo ya Nzambi, Nzambi takufwa yandi, kadi tempelo ya Nzambi ikele ya nlongo, ye beno ikele yau mpe.

Ngangu ya nsi yai ikele kinzoba kwa Nzambi

¹⁸ Bika muntu dikusa ve. Kana muntu banza yandi ikele na ngangu ya nsi yai, bika yandi vanda nzoba, na yandi lenda kuvanda na ngangu.

¹⁹ Kadi ngangu ya nsi yai ikele kinzoba kwa Nzambi. Kadi yo ikele kusonama; Yandi baka bankwa ngangu mu mayele ya bau. Yobi 5:13

²⁰ Diaka; Mfumu zaba mabanza ya bankwa ngangu, na yau ikele mpamba. Nk. 94:11

²¹ Mpilayai, bika muntu yana ve mu bantu. Kadi bima yonso ikele ya beno;

²² keti Paulu, keti Apolo, keti Kefa, keti nsi, keti moyo, keti lufwa, keti bima ya ikele, keti bima ya ikele kwiza, yonso ikele ya beno.

²³ Kansi beno ikele ya Klisto, ye Klisto ikele ya Nzambi.