1 Kolinto 2 - Le Nouveau Testament en Kikwango 1950

Paulu longa mu ngangu ya nsi ve

¹ Bampangi, bu mono kwizaka kwa beno, mono kwizaka kusamuna kwa beno ve kitemo ya Nzambi mu ndinga ya kitoko ye ya ngangu. Bis. 18:1; 1 Kol. 1:17; 2 Tim. 1:8

² Kadi mono kanaka kuzaba kima yankaka ve nakati na beno, kansi Yesu Klisto kaka ikele yandi ya komwaka va kulunsi.

³ Mono vandaka na beno mu lebakana ye boma ye tita mingi. 2 Kol. 10:10

⁴ Kutuba ya mono ye nsamunu ya mono vandaka ve mu ndinga ya ngangu ye ya kwikidisa kansi mu nsongolo ya Mpeve ye ngolo,

⁵ na lukwikilu ya beno tavanda ve mu ngangu ya bantu, kansi mu ngolo ya Nzambi. 2 Kol. 4:7; 1 Tes. 1:5

Nsamu mbote ikele ngangu ya Nzambi

⁶ Kansi beto ikele kutuba ngangu kwa bau ya imene kukula, kansi ngangu ya nsi yai ve, keti na banyadi ya nsi yai ya ikele kwiza mpamba. Yak. 3:15

⁷ Kansi beto tuba ngangu ya Nzambi mu kinsweki, ikele ngangu ye swekwaka, ya Nzambi kanaka ntete ya bansi ikele, kwa nkembo ya beto, Lom. 16:25; Ef. 3:5, 9; Kolo. 1:26

⁸ ya mosi ya banyadi ya nsi yai zabaka ve, kadi kana bau zabaka yo, bau komaka ve Mfumu ya nkembo va kulunsi. Luk. 23:34; Bis. 3:17; 13:27

⁹ Kansi bonso yo ikele kusonama: Bima ya disu mona ve ye dikutu kuwa ve, ye imene kukota ve mu ntima ya muntu, ikele bima ya Nzambi imene kuyidika sambu na bau ya zola yandi.

¹⁰ Kansi Nzambi imene kuzaikisa beto yau mu Mpeve, kadi Mpeve ikele kuteza bima yonso, e, bima ya mudindu ya Nzambi mpe. Mat. 13:11; 16:17

¹¹ Kadi nani nakati bantu zaba mambu ya muntu ? Kansi kaka mpeve ya muntu ya ikele mu yandi. Mpilayai mpe muntu zaba ve mambu ya Nzambi, kansi Mpeve ya Nzambi kaka. Bing. 20:27

¹² Kansi beto bakaka ve mpeve ya nsi, kansi Mpeve ya kutuka na Nzambi, na beto lenda kuzaba bima ya Nzambi pesaka beto ya matabisi,

¹³ yina ya beto ikele kutuba mpe, ikele ve mu mambu ya ngangu ya bantu longa, kansi ya Mpeve longa, yo kuteza bima ya kimpeve na mambu ya kimpeve.

¹⁴ Kansi muntu ya kinsuni lenda ve kubaka mambu ya Mpeve ya Nzambi, kadi yau ikele kinzoba kwa yandi, yandi lenda ve kuzaba yau, sambu na yau ikele kufundiswa ya kimpeve. Yoa. 14:17

¹⁵ Kansi yandi ya ikele ya kimpeve ikele kufundisa mambu yonso, kansi yandi kibeni ikele kufundiswa kwa muntu ve.

¹⁶ Kadi nani imene kuzaba mabanza ya Mfumu, na yandi lenda kulonga yandi ? Kansi beto ikele na mabanza ya Klisto. Lom. 11:34