1 Kolinto 16 - Le Nouveau Testament en Kikwango 1950

Mambu ya makabu

¹ Sambu na kutikisa ya mbongo sambu na banlongo, beno sala mpe bonso mono sikidikisaka ku mabundu ya Ngalatia.

² Lumbu ya ntete ya lumingu, bika muntu na muntu bumba mu nzo ya yandi bonso ndandu ya yandi imene kubaka. Lom. 12:13

³ Bu mono kuma, mono tafidisa nkanda sikamosi na bau ya beno imene kusola kunata makabu ya beno ya zola ku Yelusalemi.

⁴ Kana yo lunga na mono kwenda mpe, bau takwenda na mono.

Kuzieta ya Paulu ye Timoteo ya Apolo

⁵ Kansi mono takwiza kwa beno bu mono imene kuluta mu Makedonia; kadi mono taluta mu Makedonia, Bis. 19:21; 20:2

⁶ kansi mono banza mono tavanda na beno ntangu fioti, keti mu nsungi ya madidi yamvimba, na beno lenda kusindika mono konso nzila ya mono kwenda.

⁷ Kadi mono zola ve kumona beno ntangu yai bu mono luta; kadi mono ikele na vuvu kuvanda na beno ndambu ntangu yankaka, kana Mfumu zola yo. 1 Kol. 4:19; Yak. 4:13

⁸ Kansi mono tavanda mu Efeso ti Pentikoti,

⁹ kadi mwelo ya kisalu ya nene ye ya ndandu ikele kukanguka kwa mono, ye bambeni ikele mingi.

¹⁰ Kana Timoteo kwiza, tala na yandi vanda na beno na boma ve, kadi yandi sala kisalu ya Mfumu bonso mono sala mpe.

¹¹ Bika muntu saula yandi ve. Kansi sindika yandi na nzila mu yenge, na yandi lenda kwiza kwa mono, sambu na mono vingila yandi sikamosi na bampangi.

¹² Sambu na Apolo mpangi, mono bombidilaka yandi mingi kwiza kwa beno sikamosi na bampangi, kansi yo vandaka luzolo ya yandi ntangu yai ve; kansi yandi takwiza bu yandi baka ntangu.

Kubedisa sambu na vanda mu lukwikilu

¹³ Tomatala, telema ngolo mu lukwikilu, vanda bonso bakala, vanda na ngolo. Ef. 6:10; Kolo. 1:11

¹⁴ Yonso ya beno sala, sala yo mu zola. 1 Kol. 8:1; 13:1

¹⁵ Bampangi, beno zaba na nzo ya Stefana ikele ya ntete ya kwikila mu Akaya, ye bau imene kudipesa sambu na sadila banlongo, sambu na yai mono bombidila beno,

¹⁶ na beno lemvuka kwa bau ya mpilayai, ye kwa muntu na muntu ya sadisa mu kisalu ye ya ikele kusala.

¹⁷ Mono yangalala sambu na Stefana ye Fotunato ye Akaiko imene kwiza, kadi bau imene kulungisa yina ya beno konda,

¹⁸ kadi bau yangidisaka mpeve ya mono ye ya beno. Sambu na yai zaba mbote bau ya mpilayai. 2 Kol. 7:13; File. 7, 20

Mvutulu ya matondo ye mfidisilu ya mbote

¹⁹ Mabundu ya Asia fidisa beno mbote. Akila ye Pliska ye dibundu ya ikele mu nzo ya bau fidisa beno mbote mu Mfumu. Lom. 16:3, 5

²⁰ Bampangi yonso fidisa beno mbote. Pesana mbote na mfibulu ya nlongo.

²¹ Mono Paulu sonika mbote kwa beno na diboko ya mono mosi. Kolo. 4:18

²² Kana muntu zola Mfumu ve, bika yandi vanda nansi ya ndola, Mfumu ikele kwiza.

²³ Nlemvo ya Mfumu ya beto Yesu vanda na beno. Lom. 16:20; Fili. 4:23; 1 Tes. 5:28; 2 Tes. 3:18; File. 25

²⁴ Zola ya mono vanda na beno yonso mu Klisto Yesu. Amen.