1 Kolinto 15 - Le Nouveau Testament en Kikwango 1950

Mfulukulu ya Yesu ikele kieleka

¹ Bampangi, mono zabisa beno nsamu mbote ya mono samunaka kwa beno, ya beno mpe bakaka, mu yo beno kutelema mpe, Ngal. 1:11

² mu yo beno mpe vuluswa, kana beno simba ngolo mambu ya mono samunaka kwa beno, keti beno imene kukwikila mpamba. Lom. 1:16; 1 Kol. 1:21

³ Kadi ntete mono mpe pesaka beno yina ya mono bakaka, na Klisto kufwaka sambu na masumu ya beto, bonso ikele mu masonukwa. Yes. 53:1; Dan. 9:24; 1 Kol. 11:23

⁴ na yandi zikwaka ye fulukiswaka mu lumbu ya tatu, bonso ikele mu masonukwa, Nk. 16:10; Yes. 53:8; Luk. 24:26

⁵ na yandi monikaka kwa Kefa, nanima kwa bau kumi ye zole. Luk. 24:34; Yoa. 20:19; Luk. 24:36

⁶ Nanima yandi monikaka kwa bampangi ya luta nkama tanu mu ntangu mosi; mingi ya bau ikele ti ntangu yai, kansi bankaka imene kulala tulu.

⁷ Nanima yandi monikaka kwa Yakobi, nanima kwa bantumwa yonso.

⁸ Nanima na bau yonso, yandi monikaka kwa mono mpe, bonso kwa mwana ya butukaka ntete ya ntangu lunga. Bis. 9:3; 1 Kol. 9:1

⁹ Kadi mono luta fioti na bantumwa, mono lunga ve bingwa ntumwa, sambu na mono zomaka dibundu ya Nzambi. Bis. 9:1; Ngal. 1:13; Ef. 3:8; 1 Tim. 1:13

¹⁰ Kansi mu nlemvo ya Nzambi mono ikele yina ya mono ikele, ye nlemvo ya yandi kwa mono vandaka mpamba ve, kansi mono salaka ya luta mingi bau yonso; kansi ikele mono ve, kansi nlemvo ya Nzambi ya ikele na mono. Lom. 15:8; 2 Kol. 11:23; 12:11

¹¹ Buna kana yo ikele mono keti bau, mpilayai beto ikele kusamuna, ye mpilayai beno kwikilaka.

Mfulukulu ya bafwa ikele kieleka mpe

¹² Kana Klisto ikele kusamunwa na yandi fulukiswaka tuka bafwa, buna nki bankaka ya beno ikele kutuba mfulukulu ya bafwa ikele ve ?

¹³ Kana mfulukulu ya bafwa ikele ve, buna Klisto mpe fulukiswaka ve.

¹⁴ Kana Klisto fulukiswaka ve, buna nsamunu ya beto ikele mpamba, lukwikilu ya beno ikele mpamba mpe.

¹⁵ Beto monika na beto ikele bantemo ya luvunu ya Nzambi, sambu na beto tubaka kitemo ya Nzambi na yandi fulukisaka Klisto, ya yandi fulukisaka ve, kana bafwa ikele kufulukiswa ve.

¹⁶ Kadi kana bafwa ikele kufulukiswa ve, buna Klisto fulukiswaka mpe ve.

¹⁷ Kansi kana Klisto fulukiswaka ve, lukwikilu ya beno ikele mpamba; beno ikele mu masumu ya beno.

¹⁸ Buna bau ya imene kulala tulu mu Klisto, imene kuvila mpe.

¹⁹ Kana beto tula vuvu mu Klisto mu moyo yai kaka, buna beto luta bantu yonso mu ntantu.

²⁰ Kansi na kieleka Klisto imene kufulukiswa tuka bafwa, ya ntete ya bau ya lala tulu. Bis. 26:23; Kolo. 1:18; Nzai. 1:5

²¹ Kadi lufwa kwizaka sambu na muntu mosi, mpilayai mpe mfulukulu ya bafwa kwizaka sambu na muntu mosi. 1 Mose 2:17; Lom. 5:12; 6:23

²² Kadi bonso yonso ikele kufwa mu Adami, buna yonso tasalwa moyo mu Klisto,

²³ kansi muntu na muntu na ndonga, Klisto ya ntete, nanima bau ya Klisto bu yandi kwiza, 1 Tes. 4:15

²⁴ buna nsuka takwiza, bu yandi tayekula kimfumu kwa Nzambi, Tata, bu yandi imene kumanisa kimfumu yonso ye luyalu yonso ye ngolo yonso.

²⁵ Kadi yandi fwiti kuyala ti yandi imene kutula bambeni yonso nansi ya bitambi ya yandi. Nk. 110:1; Mat. 22:44; Eb. 10:13

²⁶ Mbeni ya nima ya tamaniswa ikele lufwa.

²⁷ Kadi yandi lemvulaka bima yonso nansi ya bitambi ya yandi. Bu yandi tubaka: Bima yonso ikele kulemvulwa nansi ya bitambi ya yandi, buna yo ikele kumonika na yandi ya lemvudilaka bima yonso, yandi dilemvulwaka ve. Nk. 8:6; Ef. 1:20; Eb. 2:8

²⁸ Bu bima yonso imene kulemvulwa kwa yandi, yandi kibeni, Mwana, talemvuka kwa yandi ya lemvudilaka bima yonso, na Nzambi lenda kuvanda yonso mu yonso. 1 Kol. 3:23; 11:3

Kana mpila yai ve, kana lukwikilu ya beto ikele mpamba

²⁹ Kana mpilayai ve, bau ya botikwaka sambu na bafwa, bau tasala nki ? Kana bafwa tafulukiswa ve, buna sambu na nki bau botikwaka sambu na bafwa ?

³⁰ Sambu na nki beto mpe telema mu mpasi ya lufwa ntangu yonso ?

³¹ Mono ikele kufwa lumbu na lumbu, mono tuba yai, bampangi, sambu na luyanu ya ikele na mono mu beno, mu Klisto Yesu Mfumu ya beto.

³² Kana mu kimuntu mono nwanaka na bambizi ya makasi mu Efeso, mono baka ndandu nki ? Kana bafwa ikele kufulukiswa ve, bika beto kudia ye kunwa, kadi mbazi beto takufwa.

³³ Beno dikusa ve, kinduku ya mbi ikele kubivisa bifu ya mbote. Ef. 5:6

³⁴ Sikama ku konda kukolwa, sala lunungu, sala masumu ve! Kadi bankaka konda kuzaba Nzambi. Mono tuba yai kumonisa beno nsoni.

Nitu ya bafwa tafulukiswa

³⁵ Kansi muntu tatuba: Bafwa tafulukiswa mpila nki ? Ye bau ikele kwiza na nitu mutindu nki ? Yeh. 37:3

³⁶ Nge nkwa buzoba, yina ya nge ikele kukuna tapeswa moyo ve kana yo kufwa ve. Yoa. 12:24

³⁷ Yina ya nge ikele kukuna, nge ikele kukuna ve nitu ya tavanda, kansi nkeni yo mosi, keti nkeni ya ble keti mutindu yankaka.

³⁸ Kansi Nzambi pesa yo nitu, bonso yandi zolaka, nkeni na nkeni nitu na yo kibeni. 1 Mose 1:11

³⁹ Nsuni yonso ikele nsuni mutindu mosi ve, nsuni ya bantu ikele yankaka, nsuni ya bambizi ikele yankaka, nsuni ya bandeke ikele yankaka, ya bambizi ya masa ikele yankaka.

⁴⁰ Banitu ya kizulu ikele, banitu ya kintoto ikele mpe, kansi nkembo ya yina ya kizulu ikele yankaka ye ya kintoto ikele yankaka.

⁴¹ Nkembo ya ntangu ikele yankaka ye nkembo ya ngonda ikele yankaka ye nkembo ya bambwetete ikele yankaka; kadi mbwetete mosi ikele luta yankaka mu nkembo.

⁴² Mpilayai mpe ikele mfulukulu ya bafwa. Nitu ikele kukunwa mu mbivisu, yo ikele kufulukiswa mu konda mbivisu.

⁴³ Yo ikele kukunwa mu konda nzitusu, yo ikele kufulukiswa mu nkembo. Yo ikele kukunwa mu lebakana, yo ikele kufulukiswa mu ngolo. Fili. 3:21

⁴⁴ Yo ikele kukunwa nitu ya kimuntu yo ikele kufulukiswa nitu ya kimpeve. Kana nitu ya kimuntu ikele, buna nitu ya kimpeve ikele mpe.

⁴⁵ Yo ikele kusonama mpilayai mpe: Muntu ya ntete Adami kitukaka mwela ya moyo. Adami yanima kitukaka mpeve ya pesa moyo.

⁴⁶ Yina ya kimpeve ikele ntete ve, kansi yina ya kimuntu, nanima yina ya kimpeve.

⁴⁷ Muntu ya ntete katukaka na ntoto ye ikele ya kintoto, muntu ya zole katukaka na zulu.

⁴⁸ Bonso yina ya kintoto, buna ikele mpe bau ya kintoto; bonso yina ya kizulu, buna ikele mpe bau ya kizulu. 1 Mose 3:19, 22

⁴⁹ Bonso beto nataka kifwani ya yina ya kintoto, buna bika beto nata kifwani ya yina ya kizulu mpe. Lom. 8:29

Bonso bafwa fulukiswa

⁵⁰ Bampangi, mono tuba yai, nsuni ye menga lenda ve kubaka difwa ya kimfumu ya Nzambi, keti mbivisu baka ve difwa ya konda mbivisu. 1 Kol. 6:9

⁵¹ Tala, mono songa beno mambu ya kinsweki: Beto yonso talala tulu ve, kansi beto yonso takitulwa,

⁵² mbala mosi mu mbwetolo ya disu, mu ndinga ya mpungi ya nsuka, kadi mpungi tadila, ye bafwa tafulukiswa ya konda mbivisu, ye beto takitulwa. Mat. 24:31; 1 Tes. 4:15

⁵³ Kadi mbivisu yai fwiti kuvwata ya konda mbivisu, ye kufwa yai fwiti kuvwata ya konda kufwa. 2 Kol. 5:3

Beto nunga mu Yesu Klisto

⁵⁴ Kansi bu mbivisu yai imene kuvwata ya konda mbivisu, ye bu kufwa yai imene kuvwata ya konda kufwa, buna mambu yai ya sonama takwiza: Ndungunu imene kumina lufwa.

⁵⁵ O lufwa, ndungunu ya nge ikele wapi ? O lufwa, ntatiku ya nge ikele wapi ?

⁵⁶ Kansi ntatiku ya lufwa ikele masumu, ye ngolo ya masumu ikele nsiku.

⁵⁷ Matondo kwa Nzambi ya pesa beto ndungunu mu Mfumu ya beto Yesu Klisto.

⁵⁸ Mpilayai, bampangi ya mono ya zolwa, vibidila, ye nikuka ve, luta kuvanda ngolo ntangu yonso mu kisalu ya Mfumu, sambu na beno zaba kisalu ya beno ikele mpamba ve mu Mfumu.