1 Kolinto 14 - Le Nouveau Testament en Kikwango 1950

Bikula luta kutuba ya tudimi

¹ Landa zola, ye tonda ngolo matabisi ya kimpeve, kansi luta kusosa kubikula. 1 Kol. 12:31

² Kadi yandi ya tuba mu tudimi yankaka ikele tuba ve kwa bantu, kansi kwa Nzambi, kadi muntu ikele kuwa ve, kansi mu mpeve yandi ikele kutuba mambu ya kinsweki.

³ Kansi yandi ya bikula ikele kutuba kwa bantu, ntungulu ye mbombodolo ye mbombolo.

⁴ Yandi ya tuba mu tudimi yankaka ikele kuditunga, kansi yandi ya bikula ikele kutunga dibundu.

⁵ Mono zola kana yonso tuba mu tudimi, kansi mono luta kuzola kana beno bikula. Ye yandi ya bikula ikele kuluta yandi ya tuba mu tudimi, kana yandi tendula yo ve, na dibundu lenda kutungwa.

⁶ Bampangi, kana mono kwiza kwa beno ye tuba mu tudimi, mono tabakila beno ndandu nki, kana mono tuba kwa beno mu nzaikusu ve keti mu nzailu ve keti mu mbikudulu ve keti mu malongi ve ?

Kutuba ya tudimi ikele kutomisa ve, kana mutendudi ikele ve

⁷ Bima mpe ya konda moyo ikele kupesa ndinga keti pitulu keti nsambi kana ndinga na yau ikele diswaswana ve ?

⁸ Kadi kana mpungi pesa ndinga ya mbote ve, nani tadiyidika sambu na mvita ?

⁹ Mpilayai beno mpe, kana beno tuba ve na tudimi ya bantu zaba mbote, bau tazaba na nki mambu ye ikele kutubwa ? Tuna beno ikele kutuba mu mupepe.

¹⁰ Bandinga mingi ya mutindu ye mutindu ikele na nsi ye mosi ikele ve ya konda kutendula.

¹¹ Buna kana mono konda kuzaba kutendula ya ndinga yina, mono ikele nzenza kwa yandi ya tuba, ye yandi ya tuba tavanda nzenza kwa mono.

¹² Mpilayai beno mpe ya sosa ngolo matabisi ya kimpeve, sosa na beno lenda kuluta mingi kwa kutunga ya dibundu.

¹³ Sambu na yai yandi ya ikele kutuba mu ndinga yankaka, bika yandi lomba na yandi lenda kutendula.

¹⁴ Kadi kana mono lomba mu tudimi, mpeve ya mono ikele kulomba, kansi ngangu ya mono konda mabundu.

¹⁵ Buna nki ? Mono talomba mu mpeve kansi mono talomba mu ngangu mpe; mono tayimba mu mpeve, kansi mono tayimba mu ngangu mpe.

¹⁶ Kadi kana nge sakumuna mu mpeve, yandi ya vanda na sika ya bau ya konda kulongwa tatuba Amen mu kupesa ya matondo ya nge, bu yandi konda kuzaba mambu ya nge ikele kutuba ?

¹⁷ Kadi kieleka nge ikele kupesa matondo mbote, kansi yankaka ikele kutungwa ve.

¹⁸ Mono pesa matondo kwa Nzambi, na mono ikele kutuba mu tudimi yankaka ya luta beno yonso.

¹⁹ Kansi mu dibundu, mono luta kuzola kutuba bandinga tanu mu ngangu, na mono lenda kulonga bankaka, keti kutuba bandinga mafunda kumi mu tudimi.

²⁰ Bampangi, vanda ve bonso bana mu mabanza, kansi mu mambu ya mbi vanda bonso bana fioti, kansi mu mabanza vanda ya kula.

²¹ Mu nsiku yo ikele kusonama: Mu bantu ya ikele na tudimi ya nzenza, ye mu bikoba ya banzenza mono tatuba kwa bantu yai, kansi buna mpe bau takonda kuwa mono, Mfumu imene kutuba.

²² Buna tudimi yankaka ikele kidimbu ve kwa bau ya kwikila, kansi kwa bau ya konda kukwikila, mbikudulu ikele kidimbu ve kwa bau yo konda kukwikila, kansi kwa bau ya kwikila.

²³ Sambu na yai kana dibundu yamvimba kutakana sikamosi ye bau yonso tuba mu tudimi, kana bantu kota ya konda kulongwa keti ya konda kukwikila, bau tatuba ve beno imene kulauka ?

²⁴ Kansi kana bau yonso bikula, ye muntu kota ya konda kukwikila keti konda kulongwa, buna yandi ikele kubediswa na bau yonso ye kufundiswa na bau yonso,

²⁵ mpilayai mambu ya kinsweki ya ntima ya yandi tazabakana, nanima yandi tafukama va luse ya yandi ye sambila Nzambi ye tuba Nzambi ikele nakati beno kieleka.

Bansiku ya tukutukunu ya dibundu

²⁶ Buna nki, bampangi ? Bu beno kutakana, muntu ikele na nkunga, yankaka ikele na malongi, yankaka na nzaikusu, yankaka ikele na ludimi yankaka, yankaka ikele kutendula; bika yonso salwa mu ntungulu.

²⁷ Kana bankaka tuba mu tudimi, bika zole keti tatu kaka, bau tatuba mosi mosi, kansi mosi tatendula.

²⁸ Kansi kana mutendudi ikele ve, bika yandi vanda napi mu dibundu, kansi bika yandi tuba kwa yandi kibeni ye kwa Nzambi.

²⁹ Bika bambikudi zole keti tatu tuba, ye bankaka tafundisa.

³⁰ Kana yankaka ya ikele kuvanda kuna, mona nzaikusu, bika yandi ya ntete vanda napi.

³¹ Kadi beno yonso lenda kubikula, mosi mosi, na yonso lenda kulongwa, ye yonso lenda kubombidilwa.

³² Bampeve ya bambikudi ikele kulemvuka kwa bambikudi.

³³ Kadi Nzambi ikele Nzambi ya nkindu ve, kansi ya yenge.

³⁴ Bonso ikele mu mabundu yonso ya banlongo, bika bankento vanda napi mu mabundu, kadi bau ikele na nzila ve kutuba, kansi bika bau lemvuka, bonso nsiku kutuba.

³⁵ Kana bau zola kulonguka mambu, bika bau yuvula babakala ya bau mu banzo ya bau, kadi yo ikele nsoni kwa nkento kutuba mu dibundu.

³⁶ Mambu ya Nzambi katukaka na beno ntete ? Keti yo imene kwiza kwa beno kaka ?

³⁷ Kana muntu banza yandi ikele mbikudi keti ya kimpeve, bika yandi zaba mbote mambu ya mono sonika kwa beno, na yau ikele nsikudukusu ya Mfumu.

³⁸ Kansi kana muntu zola ve kuzaba yo, bika yandi konda kuzaba yo.

³⁹ Mpilayai, bampangi ya mono, tonda ngolo kubikula ye buya ve kutuba mu tudimi.

⁴⁰ Kansi bika yonso salwa ya lunga ye ya sungama.