1 Kolinto 13 - Le Nouveau Testament en Kikwango 1950

Sika ya konda zola ikele kima ve

¹ Kana mono tuba na tudimi ya bantu ye banjo, kansi kana mono konda zola, mono ikele bonso mitaku ya makelele keti simbala ya bau nikisa. Lom. 13:8

² Kana mono ikele na matabisi ya mbikudulu ye zaba mambu yonso ya kinsweki ye nzailu yonso, ye kana mono ikele na lukwikilu bonso na mono lenda kukatula bamongo, kansi kana mono konda zola, mono ikele kima ve.

³ Kana mono kaba mbongo ya mono yonso sambu na dikila bansukami, kana mono pesa nitu ya mono sambu na yokwa, kansi kana mono konda zola; yo sadisa mono ta fioti ve. Lom. 12:20; 1 Yoa. 3:16

Mutindu zola ikele

⁴ Zola ikele kuvibidila, zola ikele nlembami, zola ikele na kimpala ve, zola ditula nene ve, zola ikele kuditombola ve, Bing. 10:12; 1 Pet. 4:8

⁵ zola sala ve yina ya lunga ve, yo sosa ve ya yandi mosi, yo baka makasi ve, yo vutula mbi ve, 1 Kol. 10:24, 33; Fili. 2:4, 21

⁶ yo yangalala ve mu konda ya lunungu, kansi yo yangalala mu mambu ya kieleka,

⁷ yo fuka mambu yonso, yo kwikila mambu yonso, yo ikele na vuvu mu mambu yonso, yo vibidila mu mambu yonso.

Zola luta mu nene

⁸ Zola ikele na nsuka ve, kansi mbikudulu tamana, bandinga tavila, ye nzailu tamana.

⁹ Kadi beto zaba ndambu kaka, ye beto bikula ndambu kaka. Fili. 3:12

¹⁰ Kansi bu yina ya lunga takwiza, buna yina ya ndambu tavila.

¹¹ Bu mono vandaka mwana, mono tubaka bonso mwana, mono vandaka na mambu ya kimwana ye mabanza ya mwana, kansi bu mono imene kukula, mono imene kubika mambu ya kimwana.

¹² Kadi ntangu yai beto tala mu talatala bonso mu kingana, kansi ntangu yina luse ku luse, ntangu yai mono zaba ndambu kaka, kansi ntangu yina mono tazaba mbote, bonso mono ikele kuzabwa mbote.

¹³ Ntangu yai ikele kuvanda: Lukwikilu, vuvu, zola, yai tatu, kansi ya luta mu nene ikele zola.