1 Kolinto 12 - Le Nouveau Testament en Kikwango 1950

Bankailu ya mpeve mutindu ye mutindu

¹ Bampangi, mono zola ve beno konda kuzaba mambu ya nkailu ya kimpeve.

² Beno zaba bu beno vandaka bapaien, beno natwaka ku biteki ya baba, konsosika ya beno twadiswa. Ef. 2:11; 1 Tes. 1:9

³ Sambu na yai mono zabisa beno na muntu kutuba mu Mpeve ya Nzambi lenda kutuba ve na Yesu ikele nansi ya mafingu, ye muntu lenda ve kutuba: Yesu ikele Mfumu, kansi mu Mpeve Yanlongo kaka. Mal. 9:39; 1 Yoa. 4:2

⁴ Nkailu ikele mutindu ya mutindu, kansi Mpeve ikele mosi. Eb. 2:4; 1 Pet. 4:10

⁵ Kisielo ikele mutindu ye mutindu, kansi Mfumu ikele mosi.

⁶ Bisalu ikele mutindu ye mutindu, kansi Nzambi ikele mosi ya sala mambu yonso mu bantu yonso.

⁷ Kansi muntu na muntu ikele kupeswa nzaikusu ya Mpeve kusadisa bantu yonso.

⁸ Kadi mosi ikele kupeswa mambu ya ngangu mu Mpeve, kwa yankaka mambu ya nzailu, mu Mpeve yina mosi,

⁹ mu Mpeve yina mosi, lukwikilu ikele kupeswa, ye mu Mpeve yina mosi nkailu ya belula ikele kupeswa kwa bankaka, Luk. 10:9; Yak. 5:14

¹⁰ kusala bidimbu kwa yankaka, kubikula kwa yankaka, kuzaba bampeve kwa yankaka, bandinga mutindu ye mutindu kwa yankaka, kutendula bandinga kwa yankaka.

¹¹ Kansi Mpeve yina mosi ikele kusala mambu yai yonso, ye kukaba yau kwa muntu na muntu bonso yandi zola.

¹² Kadi bonso nitu ikele mosi ye ikele biela mingi, kansi biela yonso ya nitu ya ikele mingi ikele nitu mosi, Klisto ikele mpilayina mpe. Lom. 12:4; 1 Kol. 12:27; 6:15; Ef. 4:16, 25; 5:20

¹³ Kadi mu Mpeve mosi beto yonso botikwaka mu nitu mosi, keti baYuda keti baElene, keti bampika keti ya mpwanzi, ye beto yonso kunwaka mu Mpeve mosi. Ngal. 3:28; Ef. 2:14; Kolo. 3:11

¹⁴ Kadi nitu ikele kiela mosi ve, kansi mingi.

¹⁵ Kana dikulu tuba: Sambu na mono ikele diboko ve, mono ikele mu nitu ve, buna yo ikele mu nitu ve ?

¹⁶ Kana dikutu tuba: Sambu na mono ikele disu ve, mono ikele mu nitu ve, buna yo ikele mu nitu ve ?

¹⁷ Kana nitu yamvimba ikele disu, buna beto takuwa na nki ? Kana yo yamvimba ikele ya kuwa, buna beto takuwa nsunga na nki ?

¹⁸ Ntangu yai Nzambi imene kutula biela mosi mosi mu nitu, bonso yandi zola.

¹⁹ Kana yonso ikele kiela mosi, buna nitu ikele wapi ?

²⁰ Ntangu yai biela ikele mingi, kansi nitu ikele mosi kaka.

²¹ Disu lenda ve kutuba kwa diboko: Mono ikele na mfunu na nge ve. Diaka ntu kwa makulu: Mono ikele na mfunu na beno ve.

²² Kansi biela ya nitu, ya beto banza kuluta lebakana ikele kuluta mfunu,

²³ biela yina ya beto banza kukonda nzitusu mu nitu, beto tula nzitusu ya luta va yo, ye biela ya kitoko ve, beto tula kitoko ya luta.

²⁴ Biela yina ya nzitusu, ikele kukonda kima ve, kansi Nzambi bundikisaka nitu, ye pesaka nzitusu mingi kwa yina ya konda yo,

²⁵ na kabana tavanda ve mu nitu, kansi na biela tavandana na mabanza mosi.

²⁶ Kana kiela mosi mona mpasi, biela yonso mona mpasi sikamosi na yo; kana kiela mosi kembiswa, biela yonso yangalala sikamosi na yo.

²⁷ Kansi beno ikele nitu ya Klisto, ye muntu na muntu ikele kiela mu yo. Lom. 12:4; 1 Kol. 2:12; Ef. 1:23; 5:23, 30; Kolo. 1:24

²⁸ Nzambi imene kutula bankaka mu dibundu: Ya ntete bantumwa, ya zole bambikudi, ya tatu banlongi, nanima bidimbu ya ngolo, nanima matabisi ya belula, lusadusu, kinyadi, bandinga mpila mu mpila. Ef. 4:11

²⁹ Bau yonso ikele bantumwa ? Bau yonso ikele bambikudi ? Bau yonso ikele banlongi ? Bau yonso ikele basadi ya bidimbu ?

³⁰ Bau yonso ikele na matabisi ya belula ? Bau yonso ikele kutuba mu bandinga ? Bau yonso ikele kutendula ?

³¹ Kansi tonda ngolo matabisi ya luta nene. Buna mono tasonga beno nzila ya luta mbote. 1 Kol. 14:1