1 Kolinto 11 - Le Nouveau Testament en Kikwango 1950

Kifu ya fwana mu lombilu

¹ Beno vanda balandi ya mono bonso mono ikele mulandi ya Klisto. Mat. 20:28; Lom. 15:3; Ef. 5:2; Fili. 2:4

² Mono ikele kusika beno, na beno bambuka mono mu mambu yonso, ye beno keba bansiku ya nkulu bonso mono pesaka yau kwa beno. 2 Tes. 2:15

³ Kansi mono zola beno zaba, na ntu ya bakala ikele Klisto, kansi ntu ya nkento ikele bakala, ye ntu ya Klisto ikele Nzambi. 1 Mose 3:16; Yoa. 14:28; 1 Kol. 3:23; 1 Kol. 15:27; Ef. 5:23

⁴ Konso bakala ya lomba keti bikula bu yandi ikele na kima va ntu ya yandi, yandi ikele kuzitisa ntu ya yandi ve.

⁵ Kansi konso nkento ya lomba keti bikula na ntu ya yandi konda kufukwa, yandi konda kuzitisa ntu ya yandi, kadi yo ikele bonso nsuki ya yandi yonso katulwa na lutebu.

⁶ Kadi kana nkento fuka ntu ya yandi ve, bika nsuki ya yandi zengwa. Kadi kana yo ikele nsoni kwa nkento na nsuki ya zengwa keti katulwa na lutebu, bika yandi fukwa.

⁷ Kadi bakala fwiti kufuka ve ntu ya yandi kadi yandi ikele kifwani ye nkembo ya Nzambi; kansi nkento ikele nkembo ya bakala. 1 Mose 1:27; 5:1; 9:6

⁸ Kadi bakala katukaka na nkento ve, kansi nkento na bakala. 1 Mose 2:18

⁹ Bakala semwaka ve sambu na nkento, kansi nkento sambu na bakala.

¹⁰ Kadi sambu na yai nkento fwiti kuvanda na kidimbu ya luyalu va ntu ya yandi sambu na banjo.

¹¹ Kansi mu Mfumu nkento konda kwa bakala ve ye bakala konda kwa nkento ve.

¹² Kadi bonso nkento katuka na bakala, buna mpe bakala katuka na nkento, kansi bima yonso katuka na Nzambi.

¹³ Beno fundisa nakati beno. Yo lunga na nkento lomba Nzambi na ntu ya konda kufuka ?

¹⁴ Mambu ya kimuntu kibeni ikele kulonga beno ve, kana bakala ikele na nsuki nda, yo ikele nsoni kwa yandi ?

¹⁵ Kansi kana nkento ikele na nsuki nda, yo ikele nkembo kwa yandi; kadi yandi peswaka nsuki ya nda sambu na kufuka.

¹⁶ Kana muntu zola kutula ntembe, beto ikele na kifu mpilayai ve, keti mabundu ya Nzambi ve.

Kintuadi na mesa ya mfumu

¹⁷ Bu mono tuba mambu yai, mono sika beno ve, na beno ikele kukutakana ve sambu na mambu ya mbote kansi sambu na ya mbi.

¹⁸ Kadi ntete, bu beno kutakana mu dibundu, mono kuwa na beno ikele kukabana, ye mono kwikila yo ndambu.

¹⁹ Kadi nakati na beno kabana fwiti kuvanda mpe, na bau ya lunga lenda kuzabakana nakati na beno. Mat. 10:34; 18:7; Luk. 17:1; 1 Yoa. 2:19

²⁰ Mpilayai bu beno kutakana sikamosi, beno lenda kudia ve mu kintuadi ya mesa ya Mfumu.

²¹ Kadi bu beno kudia, muntu na muntu imene kubaka ntete madia ya yandi mosi; mosi ikele na nzala ye yankaka imene kukolwa.

²² Beno ikele na nzo ve ya kudia ye kunwa ? Keti beno ikele kusaula dibundu ya Nzambi, ye monisa nsoni kwa bau ya konda bima ? Mono tatuba nki kwa beno ? Mono sika beno ? Mu yai mono sika beno ve. Yak. 2:6

²³ Kadi mono bakaka na Mfumu yina ya mono pesaka beno, Mfumu Yesu mu mpimpa yina ya yandi yekulwaka, yandi bakaka dimpa; Mat. 26:26; Mal. 14:22; Luk. 22:19

²⁴ bu yandi imene kupesa matondo, yandi bukunaka yo ye tubaka: Yai ikele nitu ya mono ya ikele kupeswa sambu na beno. Beno sala yai sambu na bambuka mono.

²⁵ Mpilayai mpe yandi bakaka kopo bu bau imene kudia, ye kutuba: Kopo yai ikele luwawanu yampa mu menga ya mono. Beno sala yai ntangu yonso ya beno kunwa yo, mu bambukilu ya mono. 2 Mose 24:8

²⁶ Kadi konso ntangu ya beno kudia dimpa yai ye kunwa kopo yai, beno ikele kusamuna lufwa ya Mfumu ti yandi kwiza. Mat. 26:64; 24:42; Yoa. 14:3; Bis. 1:11

²⁷ Mpilayai konsonani ya kudia dimpa keti kunwa kopo ya Mfumu bu yandi konda kulunga, yandi imene kubaka mfundusu mu nitu ye menga ya Mfumu. 1 Kol. 10:16, 17

²⁸ Sambu na yai bika muntu diteza, buna bika yandi kudia dimpa ye kunwa kopo. 2 Kol. 13:5; Ngal. 6:4

²⁹ Kadi yandi ya kudia ye kunwa ikele kudia ye kunwa mfundusu kwa yandi mosi, kana yandi zaba ve sambu na nitu ya Mfumu.

³⁰ Sambu na mambu yai, mingi nakati na beno ikele lebakana ye bambevo, ye bankaka mingi imene kufwa.

³¹ Kansi kana beto difundisa, beto tafundiswa ve. Nk. 32:5

³² Kansi bu beto fundiswa, beto ikele kulongwa ndongi ya Mfumu, na beto tabediswa ve sikamosi na nsi. 1 Tim. 1:20; 2 Tim. 2:25; Tit. 2:12; Eb. 12:5

³³ Sambu na yai, bampangi ya mono, bu beno kutakana sambu na kudia, beno vingilana.

³⁴ Kana muntu ikele na nzala, bika yandi kudia mu nzo ya yandi, na kutakana na beno tatwala mfundusu ve. Mambu yankaka mono tayidika konso ntangu ya mono kwiza.