1 Kolinto 10 - Le Nouveau Testament en Kikwango 1950

BaIsaeli kunwana ya mbote

¹ Bampangi, mono zola ve beno konda kuzaba, na batata ya beto yonso vandaka nansi ya dituti, ye bau yonso sabukaka mu mbu,

² ye bau yonso botikwaka mu Mose mu dituti ye mu mbu,

³ bau yonso kudiaka madia mosi ya kimpeve,

⁴ bau yonso kunwaka ndwinu mosi ya kimpeve, kadi bau kunwaka na ditadi ya kimpeve ya landaka bau, ditadi yina ikele Klisto. 2 Mose 17:6; 4 Mose 20:11; Nk. 78:15; 105:41

⁵ Kansi mingi ya bau yangidisaka Nzambi ve, buna bau loswaka mu nsi ya mpamba. 4 Mose 14:30; 26:64; Eb. 3:17

⁶ Mambu yai ikele bifwani kwa beto, na beto tatula zola ve na mambu ya mbi bonso bau tulaka zola ku mbi.

⁷ Vanda ve bansambidi ya biteki bonso bankaka ya bau, bonso yo ikele kusonama: Bantu vandaka kudia ye kunwa, bau telemaka kusakana.

⁸ Bika beto sala bizumba ve bonso bankaka ya bau salaka, bau kubwaka lumbu mosi mafunda makumi zole ye tatu.

⁹ Bika beto pukumuna Mfumu ve, bonso bankaka ya bau pukumunaka, ye bau kufwaka na banioka.

¹⁰ Bamina ve bonso bankaka ya bau baminaka, ye bau kufwaka na mufwi.

¹¹ Mambu yai kubwilaka bau yonso kifwani, ye yau sonamaka sambu na kulonga beto, beto ya ikele mfinama na nsuka ya bantangu yai. Lom. 15:4; Eb. 3:17; 1 Pet. 4:7

¹² Sambu na yai, konsonani ya banza yandi ikele kutelema, bika yandi tomatala na yandi takubwa Lom. 11:20

¹³ Mpukumunu imene kubaka beno ve, kansi yina ya kimuntu kaka, kansi Nzambi ikele ya kwikama, yandi tabika beno pukumunwa ve na luta ngolo ya beno, kansi sikamosi na mpukumunu, yandi tasala nzila na beno lenda kutina na beno lenda kunata yo. 1 Kol. 1:9; 2 Kol. 1:7

Paulu kanikina na kuvanda kintwadi na mambu ya biteki ve

¹⁴ Sambu na yai, bazolwa ya mono, tina nsambilu ya biteki. 2 Kol. 6:17; 1 Yoa. 5:21

¹⁵ Mono tuba bonso kwa bankwa ngangu: Fundisa mambu ya mono ikele kutuba.

¹⁶ Kopo ya lusakumunu ya beto ikele kusakumuna, yo ikele ve kintuadi ya menga ya Klisto ? Dimpa ya beto ikele kubukuna, ikele ve kintuadi ya nitu ya Klisto ?

¹⁷ Kadi dimpa mosi ikele, kansi beto ya ikele mingi ikele nitu mosi, kadi beto yonso ikele na kintuadi mu dimpa yina mosi. Lom. 12:5; 1 Kol. 12:12, 22

¹⁸ Beno tala Isaeli ya kinsuni. Bau ya kudia nkailu ya zikwa ikele na kintuadi ve na zikwa ? 3 Mose 7:6

¹⁹ Buna mono tatuba nki ? Kima ya yokwa nkailu kwa biteki ikele kima ? Keti kiteki ikele kima ?

²⁰ Ve, kansi bima ya bantu ikele kuyoka nkailu, bau ikele kuyoka nkailu kwa bampeve mbi, kwa Nzambi ve. Ye mono zola ve beno vanda na kintuadi na bampeve mbi.

²¹ Beno lenda ve kunwa kopo ya Mfumu ye kopo ya bampeve mbi; Beno lenda ve kuvanda na kintuadi na mesa ya Mfumu ye mesa ya bampeve mbi.

²² Keti beto ikele kusala Mfumu vanda na kimpala ? Beto luta yandi ngolo ?

Sambu na bampangi ya ikele lebakana, beto fwiti kudia ve bima ya yokwa kwa biteki

²³ Nsiku pesa nzila kusala mambu yonso, kansi mambu yonso sadisa ve. Nsiku pesa nzila kusala mambu yonso, kansi mambu yonso ikele kutunga beto ve.

²⁴ Bika muntu sosa ya yandi mosi ve, kansi ya bankaka. 1 Kol. 13:5; Fili. 2:4

²⁵ Yonso ya ikele kutekwa mu zandu, beno kudia yau, yuvula ve, sambu na mambu ya kansansa.

²⁶ Kadi ntoto ikele ya Mfumu, ye bima yonso ya ikele va yo. 2 Mose 19:5; Nk. 24:1; 50:10, 12

²⁷ Kana muntu ya kwikila ve binga beno ku fete, ye beno zola kwenda, beno kudia yonso ya ikele kutulwa nantwala ya beno, ye yuvula ve, sambu na mambu ya kansansa. Luk. 10:7

²⁸ Kansi kana muntu tuba kwa beno: Yai ikele kuyokwa nkailu kwa kiteki, kudia ve, sambu na yandi ya songaka yo, ye sambu na mambu ya kansansa;

²⁹ mono tuba ve sambu na mambu ya kansansa ya nge, kansi ya bankaka, sambu na nki kimpwanza ya mono ikele kufundiswa na kansansa yankaka ?

³⁰ Kana mono baka yo na matondo, sambu na nki mono ikele kufingwa sambu na yina ya mono imene kupesa matondo ? Lom. 14:16; 1 Tim. 4:4

³¹ Mpilayai kana beno kudia keti kunwa keti yonso ya beno sala, sala yonso kukembila Nzambi. Mat. 5:16; Yoa. 15:8; Fili. 1:11; Kolo. 3:17; 1 Pet. 4:11

³² Tesa muntu sakuba ve keti baYuda keti baElene keti dibundu ya Nzambi, Lom. 14:13

³³ bonso mono mpe ikele kusala mbote kwa bantu yonso mu mambu yonso, ye mono kusosa ndandu ya mono mosi ve, kansi ya bau mingi, na bau lenda kuvuluswa.