Abheebhuraaniya 1 - Eriiraghano Eriihë

Eryobha ndeghosiikëra kohetera kwo Moona waache

¹ Hayo kare, Eryobha ꞉ndeesiikiire na bhasookoro bhiito gho kohetera abharööti mara kaaru na gho chanchëra haghare haghare.

² Amare chaasiko chino che ntenero, Eryobha ndeghosiikëra na niitu kohetera Omoona waache. ꞉Ndeemwahwire Omoona uyo abhe omughabhi o bheghiro bhyose, wiiki gho kohetera ghokooche Eryobha ꞉ndiitëëmiri ase.

³ Omoona uyo nakurëngaari mo‑bhokumi obhokoro bho Ryobha na nakwërëki haheero kinya Eryobha reenyi. Wiiki gho kohetera ghokooche ebheghiro bhyose mbehaaghöötana haghirohamu kwo ngʼana yaache ino enyi no obhotoro. Iwe hano amariri kwiruusi kinya amaruusi gha koruuseri abhaato amasari, aghaye Mwishaaro, aghiikara eribhaara re kubhökö gho kwiro kwo Mutëmi Waryobha.

Yesu m‑mokoro ghokera bhamarayika

⁴ Eryobha ndemuköriri Omoona waache abhe omokoro ghokera bhamarayika, kinya bhuure amoheere eriina ikoro ghokera riire re bhamarayika.

⁵ Taanyi‑ho marayika uno ꞉abhooriiru ne Eryobha ghano ꞉amobhooriire Yesu kubha, “Iye niiye Omoona waane, eni reero nibheere Iso waacho.” Eryobha retabhooriire marayika wowoose kubha, “Neekubha Ishe, woose naakubha Omoona waane.”

⁶ Wiiki Eryobha hano reere rerarëëta Omoona waache omwene chiri mo‑se, ꞉ndeebhughiri kubha, “Bhamarayika bhoose bha Ryobha bhabhe bharamusëngëra Omoona uyo.”

⁷ Amare ighoro e bhamarayika, ꞉ndeebhughiri kubha, “Bhamarayika bhaane nehaabhaköra, bhabha kinya obhukama, na abhatamishi bhaane, nehaabhaköra bhabhe kinya orumëmi ro mororo.”

⁸ Amare ighoro e Moona waache iryo ꞉ndeebhughiri kubha, “Iye Waryobha noghukangata emiishe ne emiishe, no obhukangati bhoocho mbookubha bho hëënë.

⁹ Iye nohaasiigha ghaare ghaanyi amahöriicho, na kurëgha ghoose ghano ghaanyi amabhe. Gho ghayo Eryobha, Eryobha reecho, ndekuhakiri amaghuta ghano ghaghëriri ubhe no oghuchömëru, kubha aghukörë omokoro, ghokera abhaghëndi bhaacho bhoose.”

¹⁰ Wiiki Eryobha ndeebhoriire Omoona waache kubha, “Omutëmi, niiye utëëmiri ase ino korwera hayo simoka, wiiki niiye utëëmiri erishaaro kwo mabhökö ghaacho.

¹¹ Ebheghiro bhyose bhe mwishaaro, na bhe mo‑se mbeghosira, mbeghokunguha kinya changibho, amare iye nokwëndërëra kubha‑ho emiishe ghyose.

¹² Iye nokobhekunyakunya kinya andachana, mbekobhuusuka kinya changibho chankungu. Amare iye tooghwigharura, koru emeeka gheecho ghetaaghosira.”

¹³ Eryobha retaamobhooriire marayika ghyokyose kubha, “Wiikare eribhaara re kubhökö koone gho kwiro, mbagha neghukörë okinde abhabhisa bhaacho, na kobhakangata.”

¹⁴ Gho ghayo marayika n‑gheghiro ke? Ibho n‑abhatamishi bha Ryobha, wiiki n‑chaakörö chino Eryobha rehaachetoma kobhahökëri bhaare bhaghotooribhu.