Titus 3 - The New Testament in Islander Creole

How wan biliiva fi stand

¹ Titus, yu fi rimain di biliiva dem weh deh dah di ailant a Crete, seh dehn fi kiip demself aanda aala di pipl dem weh iina atarity iina di govament. Dehn fi obie dem, ahn dehn fi bii redy fi du eny work weh gud.

² Ahn tel dem no fi taak bad bout nonbady, bot dehn fi bii piisabl pipl, weh frenly ahn weh triit evrybady iina wan ombl wie.

³ Bikaaz wii yuuztu bii fuulish tu. Wi neva yuuztu obie God, ahn wi neva pie im non main. Wi dah wehn sliev tu evryting weh wi gat di fiilin fi du ahn weh mek wi fiil gud. Wi liv wi laif deh huol malis gens pipl, ahn deh groj weh dehn wehn gat. So, di pipl dem wehn hiet wi, ahn wii wehn hiet dem bak!

⁴ Bot den, God, wi Sievya, shuo wi fi him kainis ahn ihn lov,

⁵ ahn ihn siev wii —no bikaaz a di gud tingz weh wi wehn du, bot bikaaz ah fi him morsy. Ihn wash weh wi sin dem, ahn den ihn gi wi wan nyuu laif chruu fi him Holy Spirit!

⁶ Ahn God neva huol bak notn, wen ihn puor out fi him Holy Spirit pahn wi chruu Jesus Christ, wi Sievya.

⁷ So, sieka ihn gries, wi get fi deh rait wid God, ahn wi gat di laif weh no gwain don nontaim ataal!

⁸ Ahn demya tingz weh Ah deh tel yu dah chruut! So, Titus, yu fi ripiit dehn tingz aal di taim, so di biliiva dem weh gat dehn fiet iina God, fala demya tiichin ahn du plenty gud tingz aal di taim!

⁹ Bot yu no fi get miks'op iina fuulish taak ahn aagyoment weh no gat non sens ataal. Wen di pipl dem deh aagyo naansens bout dehn lang lis a niem bout wi griet, griet, griet granfaada dem; or wen dehn deh kwaaril ahn fait bout demde kain a tingz weh di Jewish Laa seh wi shuda du, yu no fi gat notn fi du wid dat! Bikaaz aal dah kain a aagyoment no wot notn ataal, ahn ih no help nonbady niida.

¹⁰ So, kansaanin demde kain a pipl weh laik mek trobl ahn kaaz divizhan, waan dem at liis wan or two taim; ahn afta dat, no gat notn muo fi du wid dem.

¹¹ Yu nuo seh pipl laik demde, dehn main don ton korop ahn dehn uon sin dem shuo how rang dehn rang!

Paul laas wod dem

¹² Now, Ah deh plan fi sen Artemas or Tychicus tu yo. Az suun az ihn get deh, yu fi trai fi lef out siem taim ahn miit mi dah Nicopolis, bikaaz Ah wehn disaid seh Ah gwain spen di winta deh.

¹³ Wen dah taim kom fi Zenas —di laiya— ahn Apollos fi go, Ah waahn unu help dem az moch az unu kyan help dem, ahn mek shuor seh dehn gat evryting weh dehn gwain niid.

¹⁴ Di biliiva dem dah Crete hafy laan how fi yuuz dehn taim fi du plenty gud tingz tu, so dehn kyan help ada pipl get weh dehn niid. Iina dah wie deh, demya pipl gwain liv wan laif weh wortwail.

¹⁵ Di laas ting Ah gwain seh, Titus, dah dis: Evrybady weh deh yah sen heluo. Tel aal di biliiva dem weh deh uova deh weh lov wi iina di fiet, seh wi sen heluo tu. Ahn Ah prie seh God gries gwain deh wid aala unu. Amen!