Titus 2 - The New Testament in Islander Creole

Weh Titus fi tiich di difrent gruup dem iina di chorch

¹ Bot yuu, Titus, yu fi tiich ongl dehn soun tiichin dem weh no gwain chienj nontaim!

² So den, tel di uolda man dem seh dehn fi kanchruol dehnself ahn dehn fi bii rispektabl tu. Dehn fi bii sensabl ahn dehn fiet fi strang, ahn dehn fi shuo lov ahn pieshens tu.

³ Iina di siem wie, yu fi tiich di uolda uman dem fi liv laik wan uman weh waahn du evryting weh God waahn im fi du. So, dehn no fi gasip bout ada pipl, ahn dehn no fi jrink tuu moch wain. Insida dat, dehn fi tiich weh gud ahn prapa.

⁴ Ahn dehn fi trien'op di yonga uman tu, how dem fi lov ahn triit dehn hozban ahn dehn pikniny dem.

⁵ Dehn fi bii waiz, ahn dehn haat kliin. Dehn fi laan how fi bii gud hous-waif ahn fi put dehn hozban fos, so nonbady kyaahn taak bad bout God tiichin.

⁶ Iina di siem wie, yu fi tel di yonga man dem seh dehn fi kanchruol dehnself iina evryting.

⁷ Ahn yuu tu, Titus, yu fi bii wan gud egzampl iina evryting weh yu du, so evrybady kyan fala yo egzampl. Ahn, wen yu deh tiich, yu fi shuo seh yu miin weh yu seh ahn yu siiryos fi chruut.

⁸ So, yu fi tiich di chruut aal di taim, so nonbady kyaahn kritisaiz yu. Den, demde pipl weh deh gens wi, gwain fiil shiem ahn no taak bad bout wi no muo.

^9-10 Ahn yu fi tel di sliev dem seh dehn fi obie dehn maasta ahn du dehn bes fi pliiz dem. Dehn no fi gi dem bak-ansa, nar tiif dem niida. Insida dat, dehn fi bii aanes so dehn maasta kyan chros dem. So, if di liida dem tiich iina datde wie, dehn gwain jraa plenty pipl tu God wi Sievya.

¹¹ Bikaaz now a diez God don shuo ihn gries tu aal di pipl dem iina disya worl so dehn kyan get siev!

¹² Dat gries tiich wi seh: wi fi stap deh liv laik if non God no deh, ahn wi fi gi'op di plezha dem fahn di worl weh sinful. Ahn, wii fi liv wi laif deh kanchruol wiself —wan laif weh diisent ahn aanes —wan laif weh gwain pliiz God!

¹³ Wi fi liv laik dat, wail wi wiet fi dat Blesed Die weh wi deh huop fah, wen wi gwain si di gluory a wi griet God ahn Sievya, Jesus Christ.

¹⁴ Dah him weh gi ihnself fi wii, so ihn kyan reskyu wi fahn evryting weh wikid, ahn ihn mek wi ihn speshal pipl wid pyuor haat weh riily waahn du gud!

¹⁵ So den, Titus, yu fi tiich demya tingz tu di biliiva dem. Ahn wid aal yo atarity yu fi inkorij dem fi du dem. Bot yu fi taak haad tu dem weh no deh du dem, ahn no mek nonbady disrispek yu niida.