Romans 8 - The New Testament in Islander Creole

God Spirit gi wi powa fi liv

¹ So den, God no gwain kandem nonbady weh dah wan wid Christ Jesus,

² bikaaz di Holy Spirit weh gi wi nyuu laif weh kom fahn Christ Jesus, don set wi frii fahn sin ahn det weh dah paat a di Laa.

³ God du weh di Laa kudn du, bikaaz wii —wid wi sinful haat— kudn help wiself fi du weh di Laa seh. So, God sen ihn ongl Son iina di worl fi bii hyuuman laik wii, ahn den pie fi wi sin dem. God ponish ihn Son Jesus Christ insida wii, wen ihn mek Christ bii di sakrifais fi aala fi wi sin dem.

⁴ God du dis so dat now wi kuda satisfai aal weh di Laa seh rait fi wi du. Wi no deh liv di wie wi sinful haat tel wi fi liv; bot insida dat, wi deh liv fi du weh God Spirit tel wi fi du.

⁵ Demde pipl weh deh liv di wie fi dehn sinful haat tel dem fi liv, dehn jos deh tink aal di taim bout weh dehn hyuuman nietyo waahn du. Bot demde pipl weh deh liv fi du weh God Spirit tel dem fi du, dehn jos deh tink aal di taim bout weh di Spirit waahn dehn fi du.

⁶ Main, wen unu deh fala unu sinful haat, unu gwain ded. Bot, wen unu deh fala God Spirit, den unu gwain gat laif fareva ahn unu gwain gat piis iina unu haat.

⁷ Ahn so, wen sombady jos deh tink aal di taim bout weh dehn sinful nietyo waahn du, dat mek dem ton God enimy. Dehn no gwain du weh God Laa seh wi fi du —di chruut dah seh, dehn kyaahn du'ih!

⁸ Demde kain a pipl jos gwain du weh fi dehn sinful nietyo tel dem fi du, ahn so dehn kyaahn pliiz God nontaim.

⁹ Bot, bredrin, unu no deh du weh fi unu sinful haat tel unu fi du. Now, unu deh du weh God Spirit tel unu fi du —if God Spirit liv iinsaida unu fi chruut. If Christ Spirit no deh liv iinsaida wan porsn, den dah porsn dah no fi Christ.

¹⁰ Bot, if Christ liv iinsaida unu chruu ihn Spirit, den iivn duo unu bady ded sieka sin, stil yet God Spirit mek unu gat laif, bikaaz Christ don mek evryting rait bitwiin unu ahn God.

¹¹ Memba seh: di siem Spirit a God weh mek Jesus riez'op bak fahn di ded ahn liv agen, dah di siem wan weh liv iinsaida unu. So, jos laik how God riez'op bak Jesus Christ agen, dah rait so, him gwain riez'op fi unu bady bak tu laif bai di siem Spirit.

¹² So den, bredrin, wi fi du weh God Spirit tel wi fi du, no weh wi sinful nietyo tel wi fi du.

¹³ Bikaaz, if unu jos deh liv laik how unu sinful nietyo tel unu fi liv, unu gwain ded. Bot, if unu mek God Spirit gi unu di powa so unu kyan stap du demde tingz weh unu bady tel unu fi du, unu gwain liv!

¹⁴ Memba: aala demde pipl weh God Spirit deh liid, dehn dah God pikniny fi chruut;

¹⁵ bikaaz di Spirit weh God gi unu no gwain mek unu fried, laik how di sorvant fried fi dehn maasta. Insida dat, God gi unu di Spirit weh mek unu fi bii God pikniny, ahn dah Spirit gi unu di powa fi hala out tu God ahn seh, “Aba, Pupa Maasa!”

¹⁶ Bikaaz God Spirit deh jain wid fi wi spirit fi seh wi dah God pikniny dem fi chruut!

¹⁷ Ahn sieka weh wi dah God pikniny, wi gwain get aal di blesin dem weh God deh kiip fi ihn pipl dem, ahn shier demde blesinz weh him deh kiip fi ihn Son tu. Bikaaz, if wi shier iina Christ sofarin, wi gwain shier iina fi him gluory tu!

Di fyutyo gluory weh God gat fi ihn pipl dem

¹⁸ Stil, Ah tink seh, weh wi deh sofa now iina disya taim pahn ort, dah no notn tu di gluory weh God gwain shuo wi lietaraan.

¹⁹ Bikaaz, di huol a God kriyieshan deh wiet ahn deh luk ahed wid iiganis fi di taim wen God gwain shuo huu dah fi him pikniny dem.

²⁰ Now, aal di tingz weh God wehn mek wende aanda God ponishment, bot dah neva bikaaz dehn wehn waahn ih so, bot dah wehn bikaaz God put'ih so. Bot stil yet, aala kriyieshan gat dis huop

²¹ seh God gwain set'ih frii, so ih no gwain hafy ded ahn ratn no muo. God gwain frii ih so dat ih kyan shier iina di siem gluory weh dah fi God pikniny dem.

²² Bikaaz wi nuo seh op tu disya taim, aala weh God don mek fahn di biginin a kriyieshan, deh gruon jos laik wan uman weh deh gruon wid pien wen shii deh gat wan bieby.

²³ Bot dah no ongl God kriyieshan deh gruon, bot wii tu —wii weh gat fi him Spirit az di fos wan a di gif dem weh God gwain gi wi— wii gruon siem taim wail wi deh wiet wid pieshens fi mek God shuo wi seh wi dah fi him pikniny dem weh don get fi wi nyuu bady weh ihn wehn gwain set frii.

²⁴ So den, fahn di taim God siev wi, wi deh luk ahed tu dah gluory weh deh kom. Bot, if wi don gat weh wi deh huop fah, den wi no gat notn fi luk ahed tu agen.

²⁵ Bot, if wi deh huop fi weh wi no get yet, wi no main fi wiet far ih ataal.

²⁶ Iina di siem wie, God Spirit deh help wi, wen wi no stan strang iina wi fiet iina God. Wi no nuo how fi prie, bot God Spirit deh prie tu God fi wi, ahn him deh gruon iina wan wie weh unu kyaahn iivn eksplien dah wat.

²⁷ Ahn God weh deh luk pahn wi iina wi haat, gwain andastan weh di Spirit miin, bikaaz di Spirit deh prie tu God fi ihn pipl dem, ahn ihn deh prie jos weh God waahn im fi prie.

²⁸ So, wi nuo seh fi demde pipl weh lov God, him mek evryting work fi dehn uon gud; ihn du dat fi demde pipl weh him don pik fi du weh ihn plan.

²⁹ Demya pipl weh God kaal, ihn mek dehn fi bii laik ihn Son, so dat ihn Son kuda bii di fos mongs plenty pipl weh gwain kom fi bii God pikniny.

³⁰ Ahn demde pipl weh God don pik bifuor ihn wehn iivn mek di worl fi mek dem bii laik ihn Son, dah dem ihn don kaal. Ahn demde pipl weh God wehn kaal, ihn mek evryting rait bitwiin dem ahn ihnself. Ahn demde pipl weh him wehn mek tingz rait wid, ihn gwain gi dem di gluory weh deh kom!

God lov iina Christ

³¹ So den, weh wi kyan seh bout dis? If God dah fi wi ahn deh wid wi, den dah huu kyan deh gens wi? Nonbady ataal!

³² God neva iivn kiip ihn uon Son fahn sofa. So den, wen God gi ihn uon Son fi aala wi, wi kyan nuo fi shuor seh ihn gwain gi wi evryting els weh wi niid.

³³ So den, ih no mata dah huu akyuuz unu huu dah di pipl dem weh God don pik, bikaaz God dah di Wan weh mek evryting rait bitwiin unu ahn ihnself.

³⁴ Nonbady kyaahn kandem unu fi sin, bikaaz Christ Jesus dah di Wan weh don ded fi wi, ahn dah him dah di Wan weh God riez'op bak fahn di ded fi liv agen, ahn mek im sidong pan ihn rait han said, weh paat Christ deh prie haad fi wii aal di taim!

³⁵ So den, dah huu deh yah weh kyan mek Christ stap lov wii? Nonbady no deh weh kyan du dat! Wen wi get iina trobl, dat no gwain stap im. Wen haad taim kom pahn wi, or di pipl dem mek wi sofa, dat no gwain stap im niida. Wen wi hongry, or wen wi no gat nof kluoz fi wier; wen wi iina dienja, or iivn wen dehn trai kil wi wid suod, non a dat kyaahn mek Christ stap lov wii!

³⁶ Dah jos laik weh di Skriptyo seh: “Sieka weh wii dah fi yu, wi deh iina dienja fi get kil aal di taim. Dehn triit wi jos laik demde shiip weh dehn deh ker fi go get kil.”

³⁷ Bot iivn wen aala demya tingz deh hapm tu wii, Christ —weh lov wi plenty— deh mek wi gat viktry uova aala demde bad tingz.

³⁸ Bikaaz, Ah nuo fi shuor seh notn no deh fi mek God stap lov wi. If wi don ded or if wi deh liv, him lov wi! Di ienjel dem kyaahn stap im, niida di wikid spirit dem, niida enyting weh gwain kom iina dis taim yah, or iina di taim weh deh kom.

³⁹ Niida di powa dem weh deh hai op iina di ier, ahn niida dehn powa weh deh pahn ort. Notn; notn ataal weh deh iina aala dis worl kyan separiet wi fahn di lov weh God gat fi wii! Ahn wi get dah lov chruu weh Christ Jesus wi Laad du fi wi.