Romans 6 - The New Testament in Islander Creole

Sin no gat no muo powa

¹ So den, weh wi gwain seh? Wii shuda kiip aan deh sin jos fi mek God kyan kiip aan deh gi wi muo ahn muo gries?

² Nuo sah! Wi no fi go aan iina wi sinful wie no muo! Sin no gat no muo powa fi ruul uova wii —so dah how wi kyan kiip aan deh sin, den?

³ Ah shuor seh unu nuo dat, wen wi get baptaiz, dat mek wii wan wid Christ Jesus, ahn wi wehn ded siem laik how him wehn ded.

⁴ Wen dehn baptaiz wi, dah laik wii wehn ded wid Christ ahn dehn ber wi wid im; so dat jos laik how wi Faada wehn yuuz ihn griet powa fi mek Jesus liv agen, siem wie ihn yuuz ihn powa so dat wi kyan liv wan nyuu laif!

⁵ Now, bikaaz wi kom fi bii wan wid Christ, wen wi wehn ded laik how him wehn ded, siem wie so, wi gwain bii wan wid him wen God gi wi nyuu laif —jos laik how ihn gi Christ nyuu laif wen ihn mek im riez'op bak fahn di ded!

⁶ Ahn wi nuo tu seh di laif weh wi yuuztu liv don ded siem laik wen dehn kil Jesus pahn di kraas, so dat di powa a sin weh yuuztu ruul wi laif kuda get distrai. Ahn dat miin wi no hafy stie sliev tu sin no muo.

⁷ Bikaaz, wen sombady don ded, sin no gat no muo powa uova dem agen.

⁸ If wi ded wid Christ, den wi biliiv seh wi gwain liv wid im tu.

⁹ Ahn, bikaaz wi nuo seh God don mek Christ riez'op bak fahn di ded ahn liv agen, wi nuo tu seh ihn gwain neva hafy ded agen. Det no gat non powa uova im no muo!

¹⁰ Ahn so, wen Christ ded, ihn brok di powa a sin fareva, ahn now di laif weh ihn deh liv, dah fi kantinyo fi bii wan wid God!

¹¹ Iina di siem wie, unu fi luk pahn unuself laik unu don ded tu, wen ih kom tu sin; ahn alaiv, wen ih kom tu weh God kansaan, bikaaz unu dah wan wid Christ Jesus.

¹² So den, bredrin, unu no fi mek sin ruul no muo uova unu wiik bady dem. Unu no fi gi'iin tu notn bad weh unu bady deh kriev fah.

¹³ Unu no fi yuuz non paat a unuself fi du notn bad. Insida dat, unu fi gi God unuself fi mek him yuuz unu fi du weh rait aal di taim, bikaaz dah him weh don ton unu aredy fahn det tu nyuu laif.

¹⁴ So, sin hafy stap ruul uova unu laif, bikaaz unu no deh liv aanda di Laa no muo. Rait now unu deh liv aanda God gries!

Wi frii fi obie God

¹⁵ So den, weh wi gwain du? Kiip aan deh sin jos bikaaz wi deh liv aanda God gries now, ahn bikaaz wi no liv aanda di Laa no muo? Neva, bredrin! Wi no fi du dat nontaim.

¹⁶ Ah shuor seh unu nuo seh wen unu put unuself aanda wan maasta laik wan sorvant, unu don ton unuself fi bii ihn sliev fi obie. Iina di siem wie, unu kyan bii wan sliev tu sin, ahn ded; or unu kyan obie God, ahn mek ihn put unu raichos!

¹⁷ So, mek aala wi gi tanks tu God, bikaaz iivn duo unu yuuztu bii sliev tu sin, now unu don set unu haat fi du aala dehn gud tingz weh wehn tiich unu bout God.

¹⁸ God don set unu frii fahn di powa a sin, ahn now unu kom fi bii sorvant fi wi God ahn du weh gud iina ihn sait.

¹⁹ Bredrin, now Ai deh yuuz demya egzampl fahn evry die laif, bikaaz az hyuuman, unu wiik: Wan taim unu yuuztu ton unu bady uova fi bii sliev tu di wikid tingz weh unu wuda tink bout. Bot now unu fi mek evry paat a unu bady sorv God, so di huol a unu kyan bilang tu him aluon! Iina di siem wie, now unu fi put evry paat a unu laif striet wid God fi liv laik fi him pipl dem fi chruut.

²⁰ Wen unu dah wehn sliev tu sin, unu neva yuuztu du weh God waahn unu fi du weh gud ahn rait.

²¹ Tel mi now, weh gud ih yuuztu du unu, wen unu wuda du demde kain a tingz weh unu shiem a now? Dah chruut, aal weh unu get fahn du demde kain a tingz deh, dah det!

²² Bot now, God don set unu frii so dat sin no ruul uova unu no muo. Unu dah God sorvant now. Unu don gi God di huol a unu laif fi liv fi him, ahn dat gwain help unu fi liv wan huoly laif, ahn dah laif no gwain don nontaim ataal!

²³ Bikaaz di pie weh sin gi wi dah det, bot di gif weh God deh gi wi dah laif weh gwain laas fareva —ahn ih frii! Dat dah di laif weh wi get wen wi kom fi bii wan wid fi wi Laad Jesus Christ.