Romans 3 - The New Testament in Islander Creole

God fietful

¹ Wel, bredrin, dah weh gud ih du fi bii wan Jew den? Ahn weh gud ih du fi bii sorkomsaiz?

² Ah deh tel unu di chruut: dah wan gud ting fi bii wan Jew iina evrywie. Fos ting, God wehn chros wii Jew wid ihn mesij.

³ Bot, wen som a di Jew dem no du weh God waahn dehn fi du, dat miin seh God no gwain kiip ihn wod den?

⁴ Nuo sah. Neva! God gwain kiip ihn wod iivn if evrybady els deh tel lai. Dah jos laik weh di Skriptyo seh: “God, evry taim yu taak, di pipl dem gwain si seh dah yu rait. Ahn wen yu joj, yu gwain gat di viktry.”

⁵ Bot wat if di wikid tingz weh wi du shuo muo beta seh God dah di ongli'is wan weh porfek, weh wi gwain seh den? Dat miin seh God no deh du rait wen ihn waahn ponish wi fi di wikid tingz weh wi du? (Now, Ah deh taak rait yah, laik how wan hyuuman bi'in wuda taak.)

⁶ Neva! Datde bad tinkin dah no so ataal! Lisn, if God no deh du di rait tingz aal di taim, dat miin seh ihn wudn iebl fi joj nonbady no muo niida.

⁷ Iina di siem wie, som ada pipl kuda aagyo seh: “If dah Laa, weh Ai deh tel, gwain shuo muo beta seh God deh tel di chruut ahn dat mek di pipl dem gi'im muo gluory, den how kom ihn stil deh kandem mi ahn seh Ai dah wan sina?”

⁸ Ahn if dat dah chruut, di pipl dem kuda seh den, “Mek wi du wikid tingz so gud kyan kom outa di wikid tingz weh wi du!” Dah chruut seh som pipl aredy deh akyuuz mi seh, dat dah weh Ai deh priich! Wel, God gwain joj demde kain a pipl weh deh tel lai pahn mi laik dat, ahn ihn gwain gi dem aal weh dehn dizorv!

Di Laa mek di pipl dem nuo dehn sin

⁹ Now, weh wi kyan seh: wii, weh dah Jew, muo beta iina God sait an demde pipl weh dah no Jew? Nuo sah. Wi no beta an dem, nat iivn wan likl bit. Bikaaz Ah aredy shuo unu seh, sin deh ruul uova evrybady —uova di Jew dem fos ahn den uova demde pipl weh dah no Jew tu.

¹⁰ Dah jos laik weh di Skriptyo seh: “Nonbady no rait iina God sait, nat iivn wan porsn.

¹¹ Nonbady no andastan nontaim, ahn nonbady no deh luk fi God niida.

¹² Evrybady don ton dehn bak pahn God. Non a dem no wot notn ataal. Nonbady no deh, weh deh du di rait ting, nat iivn wan!

¹³ Demde wodz dah laik wan uova bad sent, weh deh kom fahn wan uopm griev. Ahn aal weh deh kom outa dehn mout dah ongl lai fi fuul'op di pipl dem. Fi dem wod dah laik sniek paizn.

¹⁴ Dehn mout ful'op a plenty wod weh ful a hietrid. Ahn dehn laik put mout pahn di ada pipl dem.

¹⁵ Dehn no wies nontaim fi go, go damij ada pipl; ahn den, dehn kil dem!

¹⁶ Evrywie weh dehn go, dehn kaaz distrokshan ahn mek pipl sofa.

¹⁷ Dehn no nuo notn bout piis ataal.

¹⁸ Ahn dehn neva don laan fi ana God niida.”

¹⁹ So den, wi nuo seh evryting weh iina di Jewish Laa deh taak tu demde pipl weh fi liv akaadn tu datde Laa, so nonbady kyaahn seh dehn no nuo weh dah di rait ting fi du. Ahn so, evrybady gwain hafy ansa tu God fi di wikidnis weh dehn wehn du.

²⁰ Iivn if wan porsn du weh di Laa seh fi du, dat no gwain mek dem rait iina God sait. Insida dat, di Laa dah fi mek di pipl dem kanchos a dehn sin dem.

Jesus Christ tek wi ponishment fi wi

²¹ Bot now wi kyan si how God kyan mek evryting rait bitwiin him ahn di pipl dem. Di chruut dah seh, fahn lang taim abak Moses ahn di uol taim prafit dem wehn tel wi Jewish pipl how wi kyan get rait wid God, ahn dah no chruu wen wi kiip di Laa.

²² God mek evryting rait bitwiin ihnself ahn di pipl dem, if dehn chros iina Jesus Christ. Ahn God gwain du dat fi aala wi weh chros iina Jesus —fi di Jew dem fos ahn fi demde pipl weh dah no Jew tu— bikaaz non difrens no deh bitwiin wii ahn dem.

²³ Evrybady don sin aredy ahn notn no deh weh gud nof fi dehn du fi get'op tu God gluory!

²⁴ Bot God shuo wii ihn gif a gries fi mek evryting rait bitwiin him ahn di pipl dem. Ihn du dis wen Christ Jesus pie fi aal di pipl dem wid ihn blod fi mek dem frii fahn sin.

²⁵ God sen Jesus fi sakrifais ihn laif iina fi wi plies, ahn wen Jesus ded fi wi sin, dat dah how God fargiv di pipl dehn sin, wen dehn chros iina him. Iina disya wie God shuo seh him du weh rait aal di taim. Main, op til now ihn wende put'op wid di pipl dehn sin;

²⁶ bot now a diez ihn staat joj dehn sin dem! Ihn du dat fi shuo seh ihn raichos, ahn ihn aalwiez du weh rait. Fi wi Laad God gwain mek evryting rait bitwiin him ahn aal demde pipl weh chros iina Jesus!

²⁷ So den, weh wi kyan buos bout? Notn ataal. Or, unu seh, “Wii kyan buos, bikaaz wi obie di Laa!” Bot, dah no so! Wii kyaahn seh dat nontaim, bikaaz God dah huu mek wi rait wid ihnself ongl chruu fi wi fiet!

²⁸ So den, wi nuo seh evryting rait bitwiin wii ahn God, bikaaz wi deh chros iina him; dah no bikaaz wi du weh di Laa tel wi fi du.

²⁹ Ahn God no dedeh jos fi di Jewish pipl dem. Ihn dedeh fi demde pipl weh dah no Jew tu! Yees, siem wie di Laad dedeh fi di two a wi: demde pipl weh dah Jew, ahn demde pipl weh dah no Jew tu.

³⁰ Dah ongl wan God deh, fi di Jew dem ahn fi demde pipl weh dah no Jew. So, chruu dehn fiet aluon God gwain mek evryting rait bitwiin ihnself ahn demde pipl weh sorkomsaiz ahn dem weh no sorkomsaiz tu.

³¹ Bot dat miin seh wii deh seh di Laa no wot notn tu wi den, bikaaz wi chros iina Jesus? Nuo sah, nat ataal! Wi no gwain shub di Laa wan-said nontaim. Insida dat, wi shuo seh di Laa stil yet impuotant!