Romans 16 - The New Testament in Islander Creole

Paul sen heluo tu ihn fren dem dah Rome

¹ Bredrin, Ah waahn unu fi nuo seh fi wi sista Phoebe, weh deh sorv di chorch dah Cenchrea, dah wan uova gud porsn.

² So, Ah deh aks unu fi gi'im wan speshal welkom, bikaaz shii dah fi di Laad fi chruut, ahn dat dah di wie weh di biliiva dem iina Christ shuda welkom wan anada. Si if unu kyan help im wid enyting weh ihn niid, bikaaz shii wehn help plenty pipl, ahn shii wehn help mii tu.

³ Den, Ah deh sen heluo tu Priscilla ahn Aquila. Dehn wende work fi Christ Jesus wid mi tu.

⁴ Dehn wehn redy fi ded sieka mii, so Ah uova tank dem fi weh dem du! Di chruut dah seh aal di chorch pipl dem weh dah no Jew tel dem tanks tu.

⁵ Ahn Ah deh sen heluo tu di pipl dem iina di chorch weh miit dah dehn hous. Den, Ah deh tel mi gud fren Epaenetus heluo. Ihn dah wehn di fos wan fi chros iina Christ iina Asia lan.

⁶ Ahn Ah deh sen heluo tu Mary, weh wende work uova haad fi unu.

⁷ Ah deh sen heluo tu Andronicus ahn Junias, weh wehn iina jiel wid mi wan taim. Dehn yuuztu get plenty ana mongs di apasl dem, ahn dehn wehn chros iina Jesus Christ bifuor mii.

⁸ Ah deh tel Ampliatus heluo. Him dah mi gud fren iina di Laad.

⁹ Ah deh tel Urbanus heluo. Him wende work fi Christ lang wid mi. Ahn Ah deh tel mi gud fren Stachys heluo tu.

¹⁰ Ahn Ah deh tel Apelles heluo. Him get tes plenty taim fi shuo seh ihn wehn gwain stie fietful tu Jesus Christ. Ah deh tel Aristobulus famaly heluo.

¹¹ Ahn Ah deh tel Herodion heluo. Him dah wan Jew tu, jos laik mii; ahn Ah deh sen heluo tu di Kristyan bredrin dem weh deh dah Narcissas hous.

¹² Ah deh tel Tryphena ahn Tryphosa, weh dah two uman weh deh work fi di Laad, heluo. Ahn Ah deh tel mi gud fren Persis heluo. Shii work uova haad fi di Laad.

¹³ Tel Rufus heluo. Di Laad wehn pik'im out speshal fi du ihn work ahn Rufus du'ih uova gud. Ahn Ah deh tel Rufus muma heluo. Shii wehn help mi jos laik Ai dah wehn fi shii uon pikniny.

¹⁴ Ahn Ah deh sen heluo tu Asyncritus, Phlegon, Hermes, Patrobus, Hermas, ahn aal di ada Kristyan bredrin dem weh deh wid dem.

¹⁵ Ah deh sen heluo tu Philologus, Julia, Nereus ahn ihn sista, ahn Olympas ahn tu aala God pipl dem weh deh wid dem.

¹⁶ Hiel wan anada wid wan huoly kis. Aal di pipl fahn aal di chorch dem sen heluo.

Paul laas wod dem iina dis leta

¹⁷ Unu weh dah mi fren dem, Ah deh beg unu fi wach out fi demde pipl weh mek unu aagyo wid wan anada ahn weh mek di pipl dem beks, ahn mes'op dehn fiet. Dehn deh du tingz weh go gens weh wi wehn tiich unu. Unu no fi gat notn fi du wid dem nontaim!

¹⁸ Demya pipl weh du demde kain a tingz, no deh du di Laad Jesus Christ work. Dehn deh work fi satisfai fi dehn uonself. Dehn gat swiit mout ahn dehn taak prity fi kanfyuuz'op di main a di pipl dem weh no nuo seh dehn deh du bad.

¹⁹ Bot, evrybady wehn hier how unu deh fala di chruut weh dah di Gud Nyuuz, wid aala unu haat; ahn dat mek Ah ful'op wid jai. Ah waahn unu gat sens fi nuo fi du weh gud, ahn mek unu no gat notn fi du wid wikidnis nontaim.

²⁰ Ahn suun-suun, fi wi God —di Faada a Piis— gwain distrai Satan powa ahn put im aanda unu fut dem! So, Ah seh: mek di gries a di Laad Jesus Christ deh pahn unu.

²¹ Timothy, weh work wid mi, seh fi tel unu heluo. Ahn Lucius ahn Jason ahn Sosipater, dehn seh fi tel unu heluo. Dehn dah Jew tu, jos laik mii.

²² Ahn mii, Tertius —weh deh rait disya leta fi Paul— Ai deh tel unu heluo tu.

²³ Ahn Gaius tel unu heluo. Ai deh stie dah fi him hous, ahn aal di pipl dem dah di chorch miit dah fi him hous. Erastus, weh dah di trezhora fi di sity, ahn wi breda Quartus, seh fi tel unu heluo tu.

²⁴ [Ah prie seh di gries a fi wi Laad Jesus Christ gwain deh wid aala unu, Amen!]

Fi di laas paat a ihn leta Paul priez God

²⁵ So den, bredrin, mek wi priez God weh kyan mek unu stan muo stranga iina unu fiet akaadn tu di Gud Nyuuz buot Jesus Christ weh Ai deh priich. Ah wende tel unu bout demde chruu tingz weh di pipl dem no nuo bout fahn lang-lang taim abak.

^26-27 Bot now God —weh liv fareva— deh mek evrybady gwain kyan nuo bout'ih chruu di mesij weh di prafit dem wehn rait. Ahn ihn du dat so di pipl fahn aal di nieshan dem fahn di worl gwain kyan chros iina ihn Son ahn obie im! Dah fi wi Faada God weh dah di ongli'is wan weh gat aal di wizdom iina evryting! Mek wi priez him fareva ahn eva chruu Jesus Christ. Amen!