Romans 14 - The New Testament in Islander Creole

Wii no fi joj di ada biliiva dem

¹ Bredrin, unu shuda aksep demde pipl weh stil yet wiik iina dehn fiet. Ahn no aagyo wid non a dem bout weh dehn tink rait fi dehn du.

² Bikaaz som pipl biliiv seh dehn kyan iit aal kain a fuud, bot ada pipl no strang iina dehn fiet yet, ahn dehn no iit non miit ataal.

³ So di man weh biliiv seh ih rait fi iit aal kain a fuud, no fi luk dong pahn di wan weh no tink ih rait fi iit miit. Ahn di man weh no tink ih rait fi iit aal kain a fuud, no fi joj di wan weh tink ih rait fi iit miit niida. Bikaaz, aftaraal God aredy aksep iich wan a dem fi bii fi him.

⁴ So, dah huu unu fi joj sombady els sorvant? Dah di Wan weh di sorvant deh work fah, weh gwain tel im if ihn deh du gud or nat. Ahn di sorvant gwain win, bikaaz dah di Laad ihnself gwain mek shuor seh ihn deh du weh rait.

⁵ Som pipl tink seh wan die muo huoly an di neks die, wail som ada pipl tink seh evry die dah di siem. Ahn bikaaz a dat, mek evrybady mek'op dehn uon main klier-klier bout weh rait fi dehnself!

⁶ Di man weh tink wan die muo huoly an di neks, him deh du'ih fi ana di Laad. Ahn di neks wan weh tink seh ih rait fi iit aal kain a fuud, him deh iit miit fi ana di Laad tu, bikaaz ihn deh gi God tanks fi dah fuud. Dah di siem wie wid di man weh no iit miit nontaim. Ihn no iit'ih, bikaaz ihn waahn ana di Laad, ahn gi'im tanks tu.

⁷ So, non a wi deh liv jos fi du weh wii waahn, ahn non a wi ded jos bikaaz wii waahn.

⁸ Bikaaz wail wi deh liv, wi shuda pliiz di Laad. Ahn wen wi ded, wi gwain go bii wid di Laad. So den, weda wi liv or weda wi ded, wi dah fi di Laad.

⁹ Ahn dat dah weh mek Jesus Christ ded ahn riez'op bak agen, so dat him kuda bii Laad uova evrybady —demde pipl weh don ded, ahn demde pipl weh no ded yet.

¹⁰ So, non a unu shuda joj unu breda. Ahn non a unu shuda tink seh unu muo beta an unu breda. Bikaaz aala wi gwain stan op fronta God weh gwain joj wi.

¹¹ Dis dah weh rait dong iina di Skriptyo: “Di Laad seh, ‘Az shuor az Ai liv, evrybady gwain niil dong ahn waaship mii, Ahn evrybady gwain seh wid dehn uon mout seh mii dah God.’ ”

¹² So den, evry wan a wi gwain hafy gi akount tu God fi weh wi wehn du iina disya worl!

Wii no fi mek wi breda sin nontaim

¹³ Main, bredrin, wi no fi joj wan anada no muo. Insida dat, wi shuda mek'op wi main seh wi no gwain du notn weh gwain mek wi breda or wi sista stombl or faal iina sin.

¹⁴ Az fi mii, Ai dah fi di Laad Jesus, ahn sieka dat Ai shuor seh non fuud no deh weh no rait fi iit. Bot if sombady biliiv seh ih no rait fi iit somting, den ih no rait fi dah porsn fi iit'ih.

¹⁵ Ahn, if unu mek wan breda get opset sieka somting weh unu iit fronta im, den unu no deh waak iina lov no muo. Memba seh: unu no fi mek notn weh unu iit distrai unu breda weh Jesus Christ ded fah.

¹⁶ So den, unu no fi du notn weh luk gud tu unu, if dat gwain mek ada pipl taak bad bout unu.

¹⁷ Bikaaz, fi bii paat a God Kingdom no gat notn fi du wid demde tingz weh wi iit or demde tingz weh wi jrink. God Kingdom dah bout how wi fi liv striet ahn iina piis wid evrybady, ahn bout di jai weh di Holy Spirit put iina fi wi haat.

¹⁸ Di wan weh deh sorv Christ iina dis wie deh mek God pliiz wid im, ahn di pipl dem gwain laik weh ihn du tu.

¹⁹ So den, wi fi trai evry taim fi du demde tingz weh gwain bring piis, ahn weh gwain help wi mek wan anada fiet get muo stranga, no chruut?

²⁰ Unu no fi distrai God work sieka fuud. God lou unu fi iit aal kain a fuud, bot unu no fi iit notn weh gwain mek wan nada porsn sin.

²¹ So den, unu no fi iit miit, nar jrink wain, nar du notn els weh gwain mek unu breda sin.

²² Ahn enyting unu biliiv bout weh rait fi iit or fi jrink, unu shuda lef dat bitwiin unu uonself ahn God. Wen sombady deh du weh dehn biliiv fi bii rait, ahn dehn no dout, datde porsn gwain get bles fi chruut, ahn dehn no gwain fiil gilty bout notn weh dehn du.

²³ Bot, if sombady dout iina dehn haat wen dehn iit eny kain a fuud, den dehn deh kandem dehn uonself, bikaaz dehn no biliiv dem deh du weh rait. If wii du somting weh wi no biliiv rait, wi deh sin.