Romans 13 - The New Testament in Islander Creole

Obie demde pipl weh iina atarity

¹ Evry wan a unu fi du weh demde pipl weh deh ruul iina di govament tel unu fi du. Bikaaz non a dem no gat dehn atarity fi ruul eksep God gi dem di rait fi ruul. Di Laad ihnself dah di Wan weh put demde pipl deh.

² So den, enybady weh go gens fi dehn atarity, deh go gens weh God seh dehn fi du. Ahn enybady weh du dat, gwain bring jojment pahn dehnself.

³ So den, di pipl mongs wi weh deh du weh rait no hafy fried fi demde pipl weh deh ruul uova dem. Iina di siem wie, di pipl dem weh deh du weh rang, dehn gwain fried fi di wan weh deh ruul uova dem. Bot unu no gwain hafy fried fi demde pipl weh iina atarity nontaim, if unu du weh rait —demde pipl ongl gwain priez unu.

⁴ Unu si, dehn pipl weh deh iina atarity, dehn dah God sorvant weh deh work fi help unu. Bot, if unu du weh rang, unu shuda fried fi chruut, bikaaz dehn gat di powa fi ponish unu. Dehn dah God sorvant weh fi joj ahn ponish haad demde kain a pipl weh du rang.

⁵ Sieka dat, unu fi du weh demde pipl weh ruul uova unu tel unu fi du. Ahn unu no fi du'ih jos bikaaz dehn gat di atarity fi joj unu ahn ponish unu, bot unu fi du'ih bikaaz unu nuo iina unu haat dat dah weh unu shuda du!

⁶ Siem wie, unu fi pie unu taks, bikaaz demde pipl iina atarity hafy get pie so dehn kyan gi aala dehn taim fi du aal weh God waahn dehn fi du.

⁷ Unu niid fi pie evrybady weh unu huo. If dehn aks unu fi pie taks, unu hafy pie ih. Unu fi shuo rispek tu demde pipl ahn ana aala dem.

How wii fi liv wid wan anada

⁸ Ahn unu no fi huo nonbady notn ataal. Di ongl ting weh unu fi huo wan neks man, dah fi lov him! Bikaaz di pipl weh lov wan anada deh du aal weh God Laa seh dehn fi du.

⁹ Nuotis seh: di Laa weh God gi Moses seh, “Wan man no fi lef ihn waif ahn go sliip wid wan nada uman, ahn wan uman no fi lef ihn hozban ahn sliip wid wan nada man niida.” Ahn ih seh tu, “Yu no fi kil, yu no fi tiif, ahn yu no fi groj wan anada.” Now, aala demya laa rap op iina di wan laa weh seh: “Yu fi lov yo nieba jos laik how yu lov yoself!”

¹⁰ Bikaaz, wen unu lov unu nieba, unu no gwain du im notn bad. Wen unu lov dem, unu gwain du evryting weh di Laa seh unu fi du!

¹¹ Dis dah weh unu hafy du, bredrin, bikaaz unu nuo ih uova liet! Unu nuo seh di taim fi wiek'op don kom aredy, bikaaz Dat Die wen God gwain siev wi deh niera now an enytaim sins wi fos chros iina Christ!

¹² Di nait aalmuos uova ahn die-lait suun kom, so mek wi stap du demde bad tingz weh di wikid pipl dem du iina daak. Ahn siem laik demde suoldya weh dres ahn pripier fi fait, mek wii bii redy fi fait iina di lait.

¹³ Mek wi liv wan kliin laif laik pipl weh deh iina di die-lait. Wi no fi liv wan slak laif ahn sliip roun. Wi no fi bii jronkin man. Wi no fi deh go dah non wail paaty ahn du aala demde kain a wikid tingz niida. Ahn wi no fi fait wid pipl, nar groj weh ada pipl gat.

¹⁴ Insida dat, wi fi mek di Laad Jesus bii az nier tu wi az di kluoz weh wi wier. Ahn wi no fi pie non main ataal tu aala demde bad tingz weh wi sinful haat tel wi fi du.