Romans 11 - The New Testament in Islander Creole

God morsy pahn di pipl fahn Israel

¹ So den, mek Ah aks unu somting: bikaaz di Jew dem wehn waahn go dehn uon ribelyos wie, God wehn rijek dem? Nuo sah, ihn neva seh dat! Mii miself dah wan Jew. Ai dah wan a Abraham uon disendant dem. Di chruut dah seh, Ai kom fahn Benjamin famaly lain!

² No man, God neva rijek ihn pipl dem weh ihn wehn pik fahn bifuor ihn wehn mek di worl. Ahn Ah shuor seh unu nuo fahn di Skriptyo Elijah wod dem, wen ihn wende komplien tu di Laad bout di Jewish pipl dem.

³ Ihn tel God seh, “Laad, di pipl fahn Israel don kil aala yo prafit dem. Dehn distrai yo alta dem tu. Ahn Ai dah di ongli'is prafit weh lef, ahn now dehn deh trai fi kil mii tu!”

⁴ Now, dah how God ansa Elijah seh? Ihn seh, “Ah stil yet gat seven thousand man fahn Israel weh neva bow dong tu di aidal Baal fi waaship im.”

⁵ Wel, dah di siem wie ih stan now. Unu stil yet gat wan likl bit a di Jew pipl dem lef weh God wehn pik out fi bii ihn uon pipl, bikaaz a ihn morsy tu dem.

⁶ God pik demde pipl deh, jos fi shuo dem ihn gries. Ihn neva pik dem sieka notn weh dehn du. If God wehn pik dem sieka weh dehn du, den gries dah no gries ataal!

⁷ So den, dat dah how ihn stan. Dah no aala di pipl fahn Israel wehn fain weh dehn wende luk fah. Dah ongl demde pipl weh God wehn pik out, weh wehn fain im. Di res a dem wehn haadn dehn haat gens di chruut ahn dehn neva andastan.

⁸ Dah jos laik weh rait iina di Skriptyo seh: “God mek dehn haat ahn main haad so dehn kudn fiil, nar tink. So den, iivn op tu tudeh die, dehn ai dehn no si notn ataal, ahn dehn iez no hier niida!”

⁹ Dah laik weh King David seh bout dem: “Pahn di die dem wen dehn selibriet dehn fiis, mek'ih ton iina wan trap fi kech dem. Mek God mek dem faal dong, ahn mek im ponish dem!

¹⁰ Mek God mek dehn ai daak, so dehn kyaahn si. Mek dehn sofa sieka aal dehn trobl; mek dehn bak aalwiez ben uova, sieka di luod.”

¹¹ So, mek Ah aks unu wan neks kwestyan: Wen di Jew dem wehn stombl, dat wehn miin seh dehn faal dong ahn neva gat non chaans fi get'op agen? Nuo sah! Sieka weh di Jew dehn sin, God ton tu di pipl dem weh dah no Jew ahn siev dem fi mek di Jew dem jalas afta dem.

¹² Weh Ah miin fi seh dah sieka weh di Jew dehn sin, dat mek plenty blesinz kom pahn di res a di worl. Ahn now, if di pipl dem weh dah no Jew get bles —bikaaz di Jew dem neva aksep God salvieshan— tink ho moch grieta di blesin gwain bii, wen di nomba a di Jew weh gwain aksep dat salvieshan, kompliit!

Paul taak tu di pipl dem weh dah no Jew

¹³ Now, Ah deh taak tu unu weh dah no Jew: Az lang az Ai dah wan apasl tu unu weh dah no Jew, Ai gwain buos iina dah work weh God gi mi fi du.

¹⁴ Ahn mieby dat work gwain mek som a mi uon pipl jalas, so God kyan siev som a dem.

¹⁵ Bikaaz, wen di Jewish pipl wehn get rijek, ih mek di ada pipl dem iina di worl kom fi get rait wid God ahn ton ihn fren! So den, imajin weh gwain hapm wen God tek di Jewish pipl dem fi bii fi him uon pipl dem agen. Ih gwain bii laik if di ded kom bak tu laif!

¹⁶ Memba seh: if di fos piis a duo fi mek bred get huoly bikaaz ih get aafa op tu God, den di huol luof dah fi God tu, no chruut? Iina di siem wie, if di ruut dem fi wan trii get aafa op tu God, den dat miin seh di lim dem fi dah trii dah fi him tu.

¹⁷ Now, unu pipl weh dah no Jew dah laik di lim dem fi wan wail aliv trii, weh dehn kot aaf ahn jain'op iina wan nada trii weh wehn don plaant aredy. Unu tek di plies a som a demde lim weh wehn get kot aaf fahn di trii. Ahn sieka dis, unu deh injai di laif weh kom, wen unu dah paat a di gud trii weh wehn don get plaant aredy.

¹⁸ So den, unu no fi tink seh unu muo beta an demde lim weh wehn kot aaf. Unu no fi buos bout dat! If unu deh buos bout dat, jos memba seh dah no unu deh huol op di ruut; dah di ruut deh huol unu op!

¹⁹ Bot unu gwain seh, “Dah so ih stan: demde lim wehn brok aaf, so dat wii kuda gruo iina di plies weh dehn brok aaf fram.”

²⁰ Dat dah chruut, bot dehn wehn brok aaf sieka dehn neva biliiv; ahn unu deh iin, bikaaz unu wehn don biliiv! Bot unu no fi get swel-hed bout dat ataal. Main, unu mek shuor seh unu kiip aan deh biliiv God, or tingz gwain go bad fi unu agen!

²¹ Memba seh: God neva spier di Jew dem, weh dah laik di natral lim; so, unu tink seh ihn gwain spier unu?

²² So, demya tingz mek wi si seh God gud, bot ihn kyan bii haad pahn unu tu. God haad pahn demde pipl weh yuuztu biliiv fos taim, ahn aftawod stap chros iina him! Bot ihn gud tu unu, if unu kiip aan deh chros iina ihn morsy. Bot, if unu stap chros iina him, God gwain kot unu aaf tu!

²³ Ahn di Jewish pipl dem, if dehn chienj dehn wiez ahn staat chros iina God agen, den God gwain put dem bak iina di plies weh dem wehn deh. Bikaaz God gat di powa fi du dat.

²⁴ So, unu weh dah no Jew dah laik demde lim weh wehn kot aafa di wail aliv trii weh wehn plaant fos, iivn duo dat dah no how ih wehn fi bii. Bot di Jewish pipl dehn dah laik demde lim weh dah fi di aliv trii, weh dehn wehn plaant. So, ih gwain bii muo iiziya fi God put demde lim aan bak pahn dehn uon trii weh dehn wehn brok aafa.

God stil yet gat plan fi di pipl fahn Israel

²⁵ Bredrin, Ah waahn unu andastan bout wan plan fi di Jew dem weh God neva mek evrybady nuo bout til tudeh. Ahn ih gud fi nuo disya plan now fi mek unu no tink tuu moch pahn unuself. Di plan dah dis: di pipl fahn Israel no gwain stie haad-hedid fareva. Dehn ongl gwain stan so, til aala demde pipl weh dah no Jew weh God don pik, kom tu him.

²⁶ So den, dis dah how God gwain siev aala di Jewish pipl dem. Dah laik weh rait iina di Skriptyo weh seh: “Di Sievya gwain kom outa Zion, ahn ihn gwain tek evryting wikid outa Jacob disendant dem.

²⁷ Ahn dis gwain bii mai agriiment wid dem, wen Ah fargiv dehn sin.”

²⁸ Sieka weh di Jew dem don ton dehn bak pahn di Gud Nyuuz, dehn dah God enimy, bot unu Gentile pipl deh benifit fahn weh dehn wehn du. Bot, bikaaz God wehn plan fahn lang taim abak fi mek demya Jew bii ihn uon pipl dem, dehn gwain ton fi bii ihn fren agen, sieka weh ihn wehn pramis dehn muos impuotant ansesta dem,

²⁹ bikaaz God neva gwain chienj ihn main bout di pipl dem weh ihn wehn pik, nar di blesin weh ihn gwain gi dem.

³⁰ Az fi unu weh dah no Jew, iina di paas unu neva yuuztu obie God. Bot now di Laad gat morsy pahn unu, bikaaz di Jew dem neva obie im.

³¹ Siem wie now, di Jew pipl dem no deh obie God, bot jos laik how ihn wehn gat morsy pahn unu, som die ihn kyan gat morsy pahn dem tu.

³² So den, bredrin, pipl evrywie neva waahn obie God, so ihn mek dehn go hed ahn bii prizna tu dehn uon sin. Bot ihn du dat, so lietaraan ihn kyan gat morsy pahn aala dem tu!

Wan hims fi priez God fi ihn gries ahn morsy

³³ Dah how griet fi wi Laad griet! Dah him weh muo waiza an evrybady els, ahn him nuo evryting weh deh! Nonbady —nonbady ataal— no iebl fi eksplien notn weh God don disaid fi du! Ahn nonbady kyaahn andastan fi him wiez niida!

³⁴ Dah laik weh rait dong iina di Skriptyo, weh seh: “Nonbady neva nuo weh God deh tink! Nonbady no deh, weh smaat nof fi tel im weh fi du!”

³⁵ “Nonbady neva gi God notn, so him neva hafy gi dem notn bak!”

³⁶ Bikaaz, dah God wehn mek evryting. Dah Him weh dah di Wan weh kiip evryting deh work jos laik how ih shuda work. Ahn evryting egzis sieka him ahn fi him gluory tu. So den, mek aala wi priez fi wi Laad God fareva ahn eva. Amen!