Revelation 9 - The New Testament in Islander Creole

Di nomba five ienjel bluo ihn trompit

¹ Den di nomba five ienjel bluo ihn trompit. Siem taim Ah si wan staar deh jrap dong fahn outa di skai pahn di ort. Ahn den ihn get di kii fi uopm op di wie fi go iina wan diip-diip huol, weh dehn kaal “Di Abyss.”

² Dah staar uopm op di wie tu Di Abyss. Ahn plenty smuok kom out fahn iinsaid deh, jos laik outa wan big fernis. So den, di son stap shain ahn di skai ton uova daak, bikaaz di smuok mek di plies uova daak.

³ Den, fahn outa di smuok plenty luokos kom dong pahn di ort. Ahn demde luokos wehn gat powa fi sting aal di pipl dem, jos laik skyaapyan tiel.

⁴ Ahn dehn aada di luokos dem fi no du non damij tu di graas nar tu di trii dem, ahn fi no damij non plaant weh deh gruo niida. Dehn tel dem fi ponish jos di pipl dem weh no gat God siil pahn dehn farid.

⁵ Ahn dehn neva gi di luokos dem non powa fi kil di pipl dem. Dehn ongl get powa fi mek dem sofa uova bad fi five mons. Ahn di pien weh dehn pipl wehn sofa —wen di luokos sting dem— dah wehn jos laik di pien wen wan skyaapyan sting sombady.

⁶ So, juurin demya five mons, di pipl dem gwain baal out fi ded! Evry die dehn gwain lang fi ded, bot det no gwain kom tu dem.

⁷ Di luokos dem wehn luk jos laik haas weh redy fi go fait iina waar. Ahn somting, weh luk laik guol kroun, wende pahn dehn hed; ahn dehn fies wehn luk laik hyuuman fies.

⁸ Ahn dehn hier wehn luk laik uman hier; ahn dehn tiit wehn luk laik laiyan tiit.

⁹ Dehn wende wier som aiyan ves pahn dehn ches. Ahn wen dehn deh flai, dehn wing mek naiz laik wen plenty haas deh pul kuoch, wen dehn rosh fi fait iina waar.

¹⁰ Ahn dehn tiel wehn sting jos laik skyaapyan tiel, ahn gat powa fi mek di pipl dem sofa plenty fi five mons.

¹¹ Dehn gat dehn king tu weh dah wehn di ienjel, weh wehn inchaaj a di diip-diip huol. Di Jew dem kaal dat ienjel, “Abaddon,” ahn di Greek pipl dem kaal im, “Apollyon.” Dat miin, “Di wan weh mash'op evryting ahn evrybady!”

¹² So den, di fos trobl don paas. Bot luk yah, two muo deh fi kom!

Di nomba six ienjel bluo ihn trompit

¹³ Den di nomba six ienjel bluo ihn trompit, ahn Ah hier wan vais kom fahn outa di four haan, weh deh pahn di kaana fi di guol alta weh deh fronta God.

¹⁴ Di vais taak tu di nomba six ienjel, weh wende huol di trompit, ahn ih seh, “Luus-weh di four ienjel dem weh tai op nier tu di big riva Euphates!”

¹⁵ So di ienjel, weh wehn huol di trompit, luus-weh di four ienjel dem. Den, di four ienjel dem, weh wehn pripier fi dis owa, dis die, dis mont, ahn dis yier fi kil one-third ah aal di pipl iina di worl, get set frii.

¹⁶ Ahn dehn wende liid, ah two hundred million suoldya aamy, weh wende pahn haas. Ai hier dah ho moch a dem wehn dedeh.

¹⁷ Ahn so, iina mi vizhan Ah si di haas dem, ahn di man dem weh wende raid pahn dem. Dehn ches wehn kova wid som tingz weh luk laik aiyan ves. Ahn di aiyan ves wehn red jos laik faiya, ahn daak bluu tu, ahn yelo jos laik solfa. Bot di haas dehn hed wehn luk laik laiyan hed. Ahn faiya wid smuok ahn hat solfa wende kom fahn outa dehn mout!

¹⁸ Ahn demya three teribl tingz: di faiya, di smuok, ahn di hat solfa weh wende kom fahn outa di haas dehn mout, kil one-third ah aal di pipl dem pahn ort.

¹⁹ Di powa fi di haas dem wende iina dehn mout ahn iina dehn tiel. Bikaaz dehn tiel wehn jos laik sniek weh gat hed. Ahn wid dehn hed, dehn wende damij di pipl dem.

²⁰ Ahn di pipl dem —weh neva ded yet— iivn duo dehn wende si demya bad tingz hapm aal roun dem, stil yet dehn neva chienj dehn wikid wiez! Dehn neva stap waaship di wikid spirit dem, nar demya aidalz weh dehn mek outa guol, silva, braas, stuon or wud. Ahn iivn duo demya aidalz kyaahn si notn, dehn kyaahn hier notn, ahn dehn kyaahn waak wan step; stil yet, di pipl dem wehn waahn waaship dem!

²¹ So, demya pipl neva ton fahn dehn sin dem. Dehn neva sary fi deh morda pipl, nar fi di uobya weh dehn du, nar fi aala dehn sin weh gat fi du wid seks, nar fi di wie how dehn tiif!