Revelation 8 - The New Testament in Islander Creole

Di nomba seven siil

¹ Wen di Lam uopm di nomba seven siil, di hevn dem get uova kwaiyet fi bout haaf an owa.

² Den, Ah si di seven ienjel dem weh wende stan op fronta God. Ahn sombady kom ahn gi dem seven trompit.

³ Den, wan nada ienjel kom ahn stan nier di alta. Ihn wende huol wan insens pat weh wehn mek outa guol. Den, sombady kom gi'im plenty insens. Ihn put aala dat iina di insens pat ahn ad ih tu di praya dem weh aala God pipl dem deh prie. Den, ihn aafa it aal pahn di guol alta weh deh fronta God chruon.

⁴ Ahn, wen di ienjel huol op di insens pat fronta God ahn di insens wende bon, di smuok gaan op tu di Laad, lang wid di praya dem weh God pipl dem wende prie.

⁵ Den, di ienjel tek di insens pat, ahn ihn tek faiya fahn aafa di alta ahn put'ih iina di insens pat. Ahn ihn chruo'ih dong pahn di ort! Siem taim tonda staat ruol ahn laitnin staat flash; ahn den, Ah kuda hier di naiz fi wan uova big ort-kwiek.

Di trompit dem

⁶ Den, di seven ienjel dem weh wehn huol di seven trompit get redy fi bluo.

⁷ Di fos ienjel bluo ihn trompit. Siem taim, hiel-stuon ahn faiya miks wid blod wende chruo dong pahn di ort. Ahn one-third a di ort bon'op! Aal di trii dem iina datde paat a di ort, ahn aal di griin graas dem bon'op tu.

⁸ Den, di sekant ienjel bluo ihn trompit. Ahn dehn tek somting weh luk laik wan hai mountin weh faiya deh bon aal uova ih, ahn dehn pich'ih iina di sii. Ahn one-third ah di sii ton blod!

⁹ Siem taim one-third ah aala di tingz weh gat laif iina di sii, ded. Ahn one-third ah aala di buot dem get mash'op.

¹⁰ Den, di third ienjel bluo ihn trompit. Ahn siem taim wan big staar weh deh bon brait laik wan silinda, jrap dong fahn outa di skai pahn one-third a di riva dem, ahn pahn di waata dem weh deh spring'op fahn outa di grong.

¹¹ Dah staar wehn niem Wormwood, or “Bita.” Ahn so, one-third a di waata —weh di staar wehn jrap dong pan— ton bita ahn plenty pipl ded, bikaaz dehn jrink di bita waata.

¹² Den, di nomba four ienjel bluo ihn trompit, ahn somting nak out one-third a di son lait, ahn one-third a di muun, ahn one-third a di staar dem tu, so dat one-third ah aala dem ton daak. Ahn di son neva shain no muo ataal juurin one-third a di die. Ahn siem wie, di muun ahn di staar dem neva shain juurin one-third a di nait niida.

¹³ Den, wail Ah deh luk, Ah hier wan iigl weh deh flai hai-hai op iina di skai. Ihn baal out uova haad ahn seh: “Trobl! Trobl! Trobl! fi di pipl dem weh deh iina disya worl, bikaaz demde pipl gwain sofa plenty, wen di soun kom fahn di ada three trompit dem, weh di laas three ienjel lef fi bluo!”