Revelation 5 - The New Testament in Islander Creole

Di Lam tek di skruol fahn God

¹ Den, Ah si di Wan weh deh sidong pahn di chruon. Iina ihn rait han ihn wende huol wan skruol. Ahn wan paila tingz wehn rait dong iina di skruol, pahn di front ahn pahn di bak. Ahn di skruol wehn siil'op iina seven difrent spat wid siil weh mek outa waks.

² Ahn Ah si wan ienjel weh gat plenty powa. Ihn wende taak haad, so evrybady kuda hier im. Ihn aks, “Huu gat di rait fi brok uopm demde siil ahn uopm op di skruol?”

³ Bot nonbady neva gat di rait iina hevn, nar pahn dis ort, nar aandaniit di ort niida fi uopm di skruol ahn riid weh wehn rait dong pan ih.

⁴ Ahn Ah staat fi baal haad-haad, bikaaz nonbady neva gat di rait fi uopm di skruol ahn riid weh wehn rait dong pan ih.

⁵ Den, wan a di elda dem tel mi seh, “Stap deh hala, breda. Luk! Di Wan weh dehn kaal di Laiyan, weh kom fahn di traib a Judah —di Wan weh dah King David griet, griet granpikniny— him gat di viktry uova evryting! Ahn sieka dat, ihn gat di rait fi brok uopm demde seven siil ahn uopm op di skruol.”

⁶ Den, Ah si wan Lam deh stan op nier tu di chruon. Ahn di four livin kricha ahn di elda dem wende stan op roun im. Disya Lam weh wehn luk laik di wan weh di pipl dem don kil, bot ihn wehn gat seven haan pahn ihn hed ahn seven ai. Ahn di ai dem dah laik God seven Spirit dem weh ihn sen out aal uova di worl.

⁷ Den, Ah si di Lam gaan ahn tek di skruol fahn di rait han a di Wan weh deh sidong pahn di chruon.

⁸ Ahn wen di Lam tek di skruol, di four livin kricha ahn di twenty-four elda dem jrap dong fronta di Lam, ahn waaship im. Now, aala dem wehn gat wan haap iina dehn han, ahn wan guol buol weh wehn ful'op wid insens. Dis insens dah di praya dem fah God pipl dem.

⁹ Den, di four kricha dem ahn di twenty-four elda dem sing wan nyuu sang, weh seh: “Yuu dah di Lam weh gat di rait fi tek di skruol, ahn brok uopm di siil dem weh wehn faasn shet. Bikaaz dehn don kil yu, bot wid yo blod yu don bai bak pipl fi God. Demde pipl rait yah kom out fahn aal di difrent traib dem, ahn fahn aal di difrent nieshan dem, ahn fahn aal di difrent langwij dem.

¹⁰ Yuu don mek dem paat a God Kingdom, ahn demde pipl gwain bii priis weh gwain sorv God, ahn dehn gwain ruul iina disya worl.”

¹¹ Den, Ah luk ahn Ah hier millions ahn millions a ienjel dem. Dehn wende roun ahn roun di chruon, lang wid di four kricha dem ahn di elda dem.

¹² Dehn wende sing haad-haad seh: “Di Lam weh dehn kil, gat di rait, fi get powa ahn richiz, ahn wizdom ahn strent, ahn gluory ahn priez!”

¹³ Ahn den, Ah hier evry livin kricha iina hevn ahn pahn ort ahn aanda di ort, ahn iina di sii tu deh aafa op priez. Dis dah weh aala dem wende sing tugeda seh: “Gi priez ahn ana, ahn gluory, ahn powa tu di Wan, weh deh sidong pahn di chruon, ahn tu di Lam fareva ahn eva!”

¹⁴ Den, di four kricha dem seh, “Amen!” Ahn di twenty-four elda dem faal dong pahn dehn fies ahn waaship di Wan weh sidong pahn di chruon ahn di Lam.