Revelation 4 - The New Testament in Islander Creole

Di Apasl John si iinsaida hevn

¹ Afta dat, Ah si wan nada vizhan: Ah si wan duo uopm op iina hevn. Ahn Ah hier wan vais weh soun laik wan trompit —di siem vais weh Ah wehn hier fos. Ihn tel mi seh, “Kom op yah ahn Ah gwain shuo unu di tingz dem weh hafy hapm afta dis.”

² Siem taim God Spirit kom dong pahn mi, ahn den, iina hevn Ah si wan chruon, ahn sombady deh sidong pan ih.

³ Ahn di Wan weh wende sidong deh, ihn fies wende spaakl jos laik di jaspa ahn kaaniilyan stuon dem spaakl. Ahn wan rienbuo, weh wende shain jos laik wan emeral, wehn deh aal roun di chruon tu.

⁴ Neks Ah si twenty-four ada chruon weh wende aal roun di fos chruon, ahn twenty-four elda dem deh sidong pahn demde chruon. Dehn wehn gat aan wait kluoz, ahn guol kroun pahn dehn hed.

⁵ Ahn laitnin wende flash fahn di chruon iina di migl. Tonda wende ruol ahn plenty haad naiz wende kom fahn deh tu. Den, fronta di chruon seven lamp wende shain brait. (Demde seven lamp, dah wehn God seven spirit.)

⁶ Ahn fronta di chruon Ah si somting weh luk jos laik wan glaas sii weh klier-klier laik kristal. Four livin kricha dem wehn dedeh tu, roun di chruon. Dah bak ahn dah front, ahn pahn di two said, dehn wehn gat ai aal uova dehn bady.

⁷ Di fos livin kricha wehn luk jos laik wan laiyan. Di sekant wan luk jos laik wan bul. Ahn di neks wan gat wan fies weh wehn luk jos laik di fies fi wan man. Di laas wan luk jos laik wan iigl weh deh flai.

⁸ Ahn aal four a di livin kricha, dehn wehn gat six wing ahn dehn wehn kova aal uova wid ai, iivn aanda dehn wing dem! Aal die ahn aal nait dehn deh sing priez tu God; dehn neva stap fahn seh: “Huoly, huoly, huoly dah fi wii Laad God, weh gat muo powa an enyting! Him wende fahn bifuor di worl wehn mek, ahn ihn deh liv now, ahn ihn gwain kom bak!”

⁹ Demde four livin kricha dehn deh sing priez tu di Wan weh gwain liv fareva ahn eva, weh deh sidong pahn ihn chruon. Dehn deh gi'im ana ahn gluory, ahn aafa op dehn tanks uova ahn uova.

¹⁰ Az dehn deh du dat, di twenty-four elda dem jrap dong pahn dehn nii fronta di Wan weh deh sidong pahn di chruon. Dehn wende waaship dah Wan weh gwain liv fareva ahn eva. Den, iich a dem tek di kroun dem aafa dehn hed, ahn den lie dem dong fronta di chruon. Ahn dehn seh:

¹¹ Fi wi Laad ahn wi God, dah ongl yu weh gat di rait, fi get aal di gluory, ahn di ana ahn di powa; bikaaz yu dah di Wan weh mek evryting weh egzis. Yu mek dem aal ahn gi iich wan laif, bikaaz yu du dat fi yo uon plezha.