Revelation 17 - The New Testament in Islander Creole

Di sity weh dah laik wan uova wikid uman

¹ Den, wan a di seven ienjel dem weh wehn huol di seven boul kom taak tu mi seh, “Kom wid mi. Ah gwain shuo yo how dehn gwain ponish di uman weh dah wan big taim prastityut, weh deh sidong pahn plenty riva.

² Di king dem fahn disa worl wehn sliip wid datde uman, ahn aal di pipl dem fahn disa worl wehn jronk wid di wain weh shii gi dem fi jrink. Dat dah di slak laif weh dehn wehn liv wid shii.”

³ Den, di Spirit kom pahn mi, ahn di ienjel ker mi iina wan dezart. Ahn rait deh Ah si wan uman deh sidong pahn wan big red biis, weh wehn gat seven hed ahn ten haan. Ahn aal uova ihn bady dah wehn plenty bad niem, weh dehn rait fi insolt God!

⁴ Dah uman wende wier porpl ahn brait red kluoz, ahn ihn wehn dres op prity wid plenty guol, ahn juwel, ahn som porl biidz tu. Shii wende huol wan guol kop iina ihn han, weh wehn ful'op wid aala di uova slak ahn wotlis tingz weh shii du.

⁵ Ahn wan niem —weh wehn gat siikrit miinin— wehn rait pahn ihn farid, weh seh: “Ai dah di Griet Babylon, di muma fi aal di prastityut dem, ahn aala di wikid tingz dem iina di worl!”

⁶ Ah kuda wehn si seh di uman wehn jronk wid di blod fahn God pipl dem —di blod fi dehn pipl weh wehn get kil— bikaaz dehn neva gi'op dehn fiet iina Jesus! Ahn wen Ah si dah uman, Ah kudn biliiv weh Ah wende si!

⁷ Den, di ienjel aks mi seh, “Dah wai yo kudn biliiv'ih? Ah gwain tel yo di siikrit miinin bout di uman, ahn di big biis weh deh bak im, weh gat seven hed ahn ten haan.

⁸ Di biis weh yo jos si wehn laiv, bot now ihn no gat no muo laif. Ihn gwain kom op fahn outa di diip-diip huol. Den, ihn gwain go tu di plies weh demya pipl kil im. Ahn di pipl dem, weh no gat dehn niem rait dong iina di Buk a Laif fahn bifuor God wehn mek di worl, gwain kyaahn biliiv'ih wen dehn si dah biis. Bikaaz ihn yuuztu bii laiv, ahn now ihn no gat no muo laif, bot stil yet ihn gwain kom bak agen!

⁹ “So den, yu fi get sens fi andastan weh demde tingz miin. Dah dis: Di seven hed dem dah di seven mountin weh di uman deh sidong pan. Ahn ih stan fi seven king tu.

¹⁰ Five a di king dem don ded aredy; di wan weh dah nomba six deh ruul now, ahn di nomba seven wan, no kom yet. Bot wen ihn kom, ihn gwain ruul ongl fi wan likl taim.

¹¹ Yu wehn si di biis tu, weh wehn alaiv bot ihn no alaiv no muo. Him dah di king weh wehn mek nomba seven, bot ihn gwain ded ahn kom bak az king nomba eight —weh gwain kom bak jos fi get distrai!

¹² “Ahn, az fi di ten haan dem weh yu wehn si, dehn dah fi ten king weh no staat ruul yet. Bot dehn gwain get atarity fi ruul laik king wid di biis, fi ongl wan owa.

¹³ Aala dem ten king dehn gwain du di siem tingz, ahn aala dem gwain gi di biis dehn powa ahn atarity.

¹⁴ Dehn gwain fait gens di Lam, bot di Lam gwain gat viktry uova dem, bikaaz ihn dah di Laad weh deh uova aala di ada laad dem, ahn ihn dah di King weh deh ruul uova aala di ada king dem. Ahn lang wid dah Lam, gwain bii demde pipl weh deh fala im —demde pipl weh ihn wehn kaal ahn pik out, ahn weh wehn fietful tu him!”

¹⁵ Den, di ienjel tel mi seh, “Demde waata weh yu wehn si di prastityut deh sidong pan, dat stan fi di paila pipl dem fahn aala dehn difrent nieshan dem, ahn aal di difrent pipl dem weh deh taak aal dehn difrent langwij.

¹⁶ Ahn di ten haan ahn di biis weh yu wehn si, gwain hiet dah prastityut. Dehn gwain tier aaf ihn kluoz ahn lef shii niekit. Dehn gwain iit ihn flesh; ahn weh lef, demya pipl gwain bon'ih op iina faiya!

¹⁷ Bikaaz, God don put iina di main a dehn ten king weh dehn fi du fi kompliit ihn plan dem, so dat aala dem hafy grii tugeda. So, iich a dehn gwain gi di biis dehn powa fi ruul til evryting hapm fi chruut, jos laik weh God wehn don seh.

¹⁸ “Ahn di uman weh yu si, dah di griet sity weh deh ruul uova demde king weh ruul iina di worl.”