Revelation 15 - The New Testament in Islander Creole

Moses ahn di Lam sang

¹ Den op iina hevn Ah si wan nada sain —wan impuotant sain— weh Ah kudn biliiv. Seven ienjel wehn dedeh, ahn dehn kom fi bring seven teribl tingz pahn di pipl dem pahn di ort. Demya tingz gwain mek di pipl dem sofa plenty, ahn demya dah di laas tingz weh God gwain sen fi shuo ihn raat.

² Den, Ah si somting weh luk laik wan sii weh mek outa glaas, ahn weh miks'op wid faiya weh deh bon iinsaida it. Ahn di pipl dem, weh wehn win di viktry uova di biis ahn uova ihn statyo ahn uova di nomba a di niem a di biis, dehn wende stan op saida di sii. Ahn dehn wende huol wan haap weh God wehn gi dem.

³ Dehn wende sing di sang weh God sorvant Moses wende sing ahn di sang weh di Lam wende sing. Di sang seh: “Laad God Aalmaity, aal weh yu du so gud, dat ih lef wi wid wi mout uopm. Yuu dah di King weh deh ruul aal di pipl dem! Yuu du di tingz dem weh rait ahn weh pyuor; ahn yuu taak di chruut aal di taim!

⁴ Laad, enybady deh, weh no gwain gi'yo ana? Enybady deh, weh no gwain priez yo niem? Nuo, Laad! Yuu dah di Wan chruu God; yuu dah di ongl wan weh huoly! Ahn aal di pipl dem fahn aal di nieshan, dehn gwain kom ahn waaship yu, bikaaz evrybady don si seh, yuu du di tingz dem weh rait fi chruut!”

Seven ienjel bring seven teribl kors

⁵ Ahn wen di pipl dem don sing, Ah luk ahn Ah si God Templ iina hevn wid di plies uopm op weh paat dehn kiip di agriiment, weh God wehn mek wid ihn pipl dem.

⁶ Den, fahn outa deh kom di seven ienjel dem weh deh bring di seven teribl trobl dem, weh gwain mek di pipl sofa. Dehn wende wier kliin wait linin goun weh wende shain. Ahn wan guol sash wehn tai roun dehn ches.

⁷ Den, wan a di four livin kricha dem gi di seven ienjel dem seven guol boul. Aala di seven boul dehn wehn ful'op wid di wain fahn di raat a God —di Wan weh deh liv now ahn fareva ahn eva!

⁸ Ahn God Templ get ful'op wid smuok weh shuo God powa ahn gluory. Ahn nonbady kuda wehn go iina dah plies til di seven teribl trobl dem weh di seven ienjel dem wehn bring, don hapm.