Philippians 2 - The New Testament in Islander Creole

Wii fi fala Jesus egzampl

¹ Bredrin, mek Ah aks unu som kwestyan: Di laif weh unu gat wid Jesus Christ, no inkorij unu? Ihn lov no komfort unu? Aala unu no gat di siem Holy Spirit deh liv iina unu haat? Ahn unu haat no saaf nof fi unu kier bout wan anada?

² If unu seh “Yees, dat dah so,” den unu shuda mek mi bii uova hapy fi nuo seh unu deh aalwiez tink wid wan hed, deh lov wan anada iina di siem wie, ahn grii wid wan anada iina evryting weh unu deh du!

³ Ah prie seh unu no du notn outa selfishnis nar breginis, bot unu fi bii ombl ahn no fi tink seh unu beta an enybady els.

⁴ Ahn unu fi luk out fi wan anada, ahn no ongl fi unu uonself.

⁵ Unu wie a tinkin fi bii jos laik fi Christ Jesus, far:

⁶ Iivn duo him wehn gat God egzak nietyo, ahn ihn wende pahn di siem levl wid God, ihn neva tink seh, “Mii gwain tek'ih.”

⁷ Bot ihn gi'op evryting, ahn mek ihnself iina wan sorvant; ahn ton wan hyuuman jos laik wii.

⁸ Ahn wail ihn wende yahso az wan hyuuman, ihn ombl ihnself, ahn ihn wehn so obiidyent tu weh God seh, ihn wehn wilin fi ded iivn if dah wehn pahn wan kraas!

⁹ Sieka dat, God riez im wie op ahn mek im grieta an enybady els, ahn ihn gi'im di niem, weh muo haiya an eny ada niem weh deh.

¹⁰ So dat, wen dehn hier di niem “Jesus,” evrybady iina hevn, pahn di ort, or aanda di ort, dehn gwain hafy jrap pahn dehn nii ahn bow dong tu him!

¹¹ Ahn aala dem gwain hafy seh aal bout wid dehn uon mout seh Jesus Christ dah Laad uova aal, fi God di Faada kyan get aala di gluory. Amen!

Liv fi Jesus

^12-13 So den unu, weh dah mi gud fren dem, jos laik how unu aalwiez du —weh Ah wehn tel unu fi du wen Ah wende wid unu— ih iivn muo impuotant fi du weh Ah tel unu now, wen Ah no dedeh wid unu. Siem wie, sieka weh Jesus Christ deh siev unu, unu shuda gat so moch rispek fi God seh unu wuda fried fi du enyting weh wuda mek unu luk laik unu no siev! Bikaaz, God dah di wan weh deh work iina unu haat fi mek unu mek'op unu main fi du di gud tingz weh ihn don plan fi unu, ahn ihn gwain gi unu di powa fi du'ih tu.

¹⁴ Unu fi du evryting bitout deh komplien ahn aagyo,

¹⁵ fi unu kyan ton out fi bii di kain a pikniny fi God weh gwain bii kliin ahn huoly bitout iivn wan likl faalt, wail unu deh liv mongs disya wikid ahn sik jinarieshan. Unu laif fi bii laik wan lait tu dem, laik di staar dem weh brait'op di skai iina di nait,

¹⁶ wail unu kiip deh shier di Wod a Laif wid dem weh laas. Den, pahn Dat Die wen di Laad Jesus Christ kom bak, Ai gwain kyan tek beta praid iina unu, ahn kyan nuo seh Ah neva ron di ries in vien nar work fi notn!

¹⁷ Sieka unu fiet, unu deh sofa fi sorv God. Ahn mieby Ai gwain hafy sakrifais mi uon laif pahn tapa aal weh unu deh du fi di Laad. Bot iivn if dat hapm, Ah gwain ongl glad, ahn Ah deh shier dah jai wid aala unu.

¹⁸ Ahn siem wie, unu fi get uova glad ahn shier unu jai wid mii tu!

Timothy ahn Epaphroditus

¹⁹ So den bredrin, if di Laad Jesus wilin, Ah gwain suun sen Timothy tu unu —ahn dat dah so Ah gwain kyan fiil beta wen ihn kom bak ahn tel mi how unu deh du;

²⁰ bikaaz Ah no gat nonbady els laik him weh riily intrestid iina how unu deh get lang.

²¹ Evrybady els deh luk out fi dehn uonself, ahn dehn no kansaan bout weh Jesus Christ kansaan bout.

²² Unu nuo seh Timothy don pruuv ihnself aredy. Him deh work lang wid mi fi spred di Gud Nyuuz, jos laik how wan son wuda work wid ihn pupa.

²³ So, Ah huop seh Ah gwain kyan suun sen im az suun az Ah si how tingz deh go wid mi yahso.

²⁴ Muo an aal, Ah kantinyo deh huop seh di Laad gwain suun mek Ai kom tu unu tu!

²⁵ Bot fi di taim bi'in, Ah tink Ah gwain hafy sen bak Epaphroditus tu unu. Unu wehn sen im fi tek kier a mi, ahn him riily work gud wid mi az mi breda ahn mi work paadna ahn wan fela suoldya iina God aamy.

²⁶ Bot ihn uova waahn si unu, ahn ihn deh wory bikaaz unu wehn hier seh ihn wehn sik.

²⁷ Di chruut dah seh, ihn wehn sik bad. Ahn ihn niely ded! Bot God wehn sary far im —ahn no ongl fi him, bot fi mii tu, fi no put muo sadnis pahn tapa sadnis weh Ah wehn don gat aredy.

²⁸ So Ah iivn muo iiga fi sen im tu unu so wen unu si'im agen, unu gwain uova glad ahn Ai gwain fiil beta tu.

²⁹ So den bredrin, unu fi welkom him gud laik wan Kristyan breda, ahn unu fi ana aal pipl laik him tu,

³⁰ bikaaz Epaphroditus wehn aalmuos ded sieka ihn work fi Christ. Ihn wehn risk ihn uon laif sieka deh mek'op fi di help weh unu wuda wehn laik fi gi mi, bot unu kudn du'ih.