Philippians 1 - The New Testament in Islander Creole

Di Apasl Paul hiel di chorch dah Philippi

¹ Dis leta dah fahn mii, Paul, ahn fahn Timothy tu. Di two a wi sorv Jesus Christ tugeda. Now a diez wi deh rait tu aala unu, God pipl dah Philippi weh dah wan wid Christ Jesus, ahn speshaly tu aala unu, di pastya ahn di diikan dem.

² Wi deh prie seh God, fi wi Faada, ahn di Laad Jesus Christ gi aala unu plenty gries ahn piis iina unu haat!

Praya fi di Philippian biliiva dem

³ Ah tank mi God evry taim Ah memba unu.

⁴ Ahn Ah aalwiez fiil gud evry taim Ah deh prie fi unu,

⁵ bikaaz unu deh help mi spred di Gud Nyuuz bout Jesus Christ fahn di fos die unu wehn hier'ih, op tu dis die!

⁶ God don staat op wan gud work iina unu, ahn Ah nuo fi shuor seh ihn gwain don ih bai di taim Christ Jesus kom bak.

⁷ Philippian pipl, unu gat wan speshal plies iina mi haat, so ih ongl rait seh Ah shuda tink bout unu laik dis. Ahn dat dah bikaaz aala unu wehn shier God blesin wid mi —weda Ah deh iina jiel or weda Ah deh out— fi difen ahn tel di pipl dem di Gud Nyuuz bout Jesus Christ fi mek dem biliiv'ih muo ahn muo.

⁸ God ihnself nuo ho moch Ah lov unu, ahn how moch Ah waahn deh wid unu. Ah lov unu wid di lov weh kom fahn Christ Jesus imself.

⁹ Dis dah mi praya fi unu: Ah prie seh unu lov wuda get muo stranga so unu kyan andastan wat dah di chruut beta ahn beta evry die, fi unu kyan aalwiez nuo how fi joj rait fahn rang!

¹⁰ Dis gwain help unu fi nuo wat dah di bes ting dem fi du, so wen Christ kom bak, unu haat gwain kliin ahn unu no iivn gwain gat wan likl ting iina unu laif fi mek enybady fain faalt wid unu.

¹¹ Ahn Ah prie fi Jesus Christ mek unu kantinyo deh du di rait ting dem, fi unu kyan get aal di gud weh ongl kom fahn him. Dis gwain mek di pipl dem ana God muo ahn muo ahn priez im tu!

Di Gud Nyuuz deh go ahed

¹² Now, bredrin, Ah waahn unu fi nuo seh, sieka aal weh wehn hapm tu mi, plenty muo pipl get fi hier di Gud Nyuuz ahn biliiv iina ih.

¹³ Ahn sieka dat, aala di suoldya dem weh deh dah di palis ahn evrybady els, nuo seh Ai deh iina jiel bikaaz Ah deh sorv Christ.

¹⁴ Ahn sieka weh dehn gat mi bihain bar, aalmuos aala di ada bredrin dem get muo korij fi priich God Wod bitout deh fiil fried ataal.

¹⁵ Som a di pipl dem duo, dehn deh priich bout Christ outa bad main; dehn jalas ahn aalwiez laik aagyo. Bot som ada wan; aal dehn waahn du dah priich di Gud Nyuuz klier-klier!

^16-17 Ahn demya pipl, weh deh priich wid wan gud haat, dehn du'ih outa lov. Dehn nuo seh Ai deh iina jiel, bikaaz Ah deh fait fi di Gud Nyuuz. Di fos set a pipl dem; dehn ongl priich bout Christ fi mek dehn uonself luk gud, insida deh du'ih wid wan gud haat. Unu si, aal dehn waahn du dah stor'op plenty trobl fi mek Ah fiil bad wail Ai deh iina jiel!

¹⁸ Bot mii no kier bout dat. Di muo impuotant ting dah seh di Gud Nyuuz bout Christ get priich iina aal kain a wie, weda dah outa bad main or wid gud haat! Ahn sieka dat, Ai ongl fiil gud ahn Ah gwain kiip aan deh fiil gud,

¹⁹ bikaaz Ah nuo seh unu deh prie fi mi ahn di Spirit a Jesus Christ deh help mi. So aala dis gwain ton out fi frii mi wan a demya die.

²⁰ Az fi mii, bredrin, Ah deh espek ahn deh huop wid aala mi haat seh Ah no gwain shiem a miself iina non kain a wie. Bot Ah huop seh Ah gwain gat jos az moch korij now az weh Ah aalwiez yuuztu gat, fi weh Ah kyan ana Christ iina evryting weh Ah du —weda Ah liv or ded.

²¹ Fi mii, if Ah liv, Ah waahn liv fi Christ, bot if Ah ded, ih gwain bii plenty beta!

²² If Ah liv, dat miin seh Ah gwain kyan win ada pipl fi di Laad. Now dah wich wan Ai fi pik: det or laif? Ah no nuo.

²³ Wan main deh tel mi fi go ahn bii wid Jesus —dis wuda bii plenty beta fi mii,

²⁴ bot stil yet ih wuda bii muo beta fi unu siek, if Ah stie yah iina disya laif ahn help unu.

²⁵ Ahn bikaaz Ah shuor a dis, Ah nuo seh Ah gwain stie yah wid aala unu fi help unu get ahed iina unu fiet ahn fiil gud bout'ih.

²⁶ So, wen Ah get bak wid unu, dat gwain gi unu plenty muo riizn fi fiil glad bout weh Jesus Christ du fi mi.

²⁷ Bot no mata weh hapm, unu fi ak iina wan kain a wie weh gwain shuo seh unu deh chros iina di Gud Nyuuz bout Christ. Den, weda Ah go, go si unu or jos hier bout unu, Ah gwain nuo seh unu deh get lang tugeda uova gud iina wan spirit, ahn unu deh fait tugeda fi di fiet, weh kom fahn weh unu chros di Gud Nyuuz. Ahn dat wuda bii gud!

²⁸ So, unu no fi fried ataal fi demya pipl weh deh fait gens unu. Dis dah wan sain fi aala dem seh dehn don duum fi distrokshan, bot God don put unu wan-said fi siev unu!

²⁹ So now unu gat di privilij no ongl fi chros iina Christ, bot fi sofa far im tu.

³⁰ Dat dah wai unu deh go chruu di siem kain a trobl dem laik weh unu wehn si Ai wende go chruu, wen Ah wehn dedeh wid unu. Ahn, az unu wehn hier, Ah stil yet deh go chruu di siem kain a trobl dem now a diez.