Philemon 1 - The New Testament in Islander Creole

Di Apasl Paul rait wan leta tu ihn fren Philemon

¹ Dis leta dah fahn mii, Paul, weh deh iina prizn sieka Christ Jesus, ahn fahn wi breda Timothy.

² Wi deh rait tu yu, Philemon, weh work wid wi ahn weh dah wi dier fren; ahn tu wi sista, Apphia, ahn tu wi breda, Archippus, weh deh work wid wi tu, laik wan suoldya. Ahn wi deh rait tu aal di biliiva dem fahn di chorch weh miit dah yo hous.

³ Wi deh prie fi wi Faada God —lang wid di Laad Jesus Christ— gi unu plenty gries ahn piis iina unu haat!

Philemon gat plenty lov ahn fiet

⁴ Philemon, wen Ah memba yu iina mi praya dem, Ah tank mi God aal di taim,

⁵ bikaaz Ah hier bout yo fiet iina di Laad Jesus, ahn yo lov fi aala God pipl dem.

⁶ So, Ah prie seh di fiet weh yu gat iina di Laad Jesus gwain help ada pipl fi andastan muo beta bout aal di blesin dem weh God gi wi, wen wi dah wan wid Christ.

⁷ Mi dier breda, di lov weh yu gat ongl mek mi hapy, ahn ih inkorij mi plenty. Ahn ih mek aala God pipl dem hapy iina dehn haat tu.

Paul pliid wid Philemon fi paadn ihn sliev, Onesimos

⁸ So den, dat dah wai Ah gat di korij fi aks yu wan fieva. Ah kuda aada yo fi du di rait ting iina di niem a Christ,

⁹ bot sieka di lov weh wi gat, Ah wuda reda aks yu insida dat: Mii, Paul, weh dah now wan uol man iina prizn fi Christ,

¹⁰ deh beg yo fi help out Onesimos. Ah luk pan im laik mi uon son, bikaaz dah rait yah iina prizn ihn get fi nuo Jesus Christ chruu mii.

¹¹ Ah nuo seh fahn lang taim him neva gud tu yu, bot now ihn yuusful tu yu ahn tu mii tu.

¹² So den, now Ah deh sen im bak tu yu. Ih no iizy fi mi, bikaaz Ah lov im wid mi huol haat.

¹³ Ah wehn waahn kiip im rait yah wid mi, wail Ah deh iina prizn fi priich di Gud Nyuuz, so ihn kuda wehn help mi iina fi yo plies.

¹⁴ Bot, Ah neva waahn du notn bifuor yu tel mi fos weh fi du. So, Ah wehn waahn yuu shuo yo kainis, bikaaz yuu waahn, ahn no bikaaz nonbady deh fuos yo fi du'ih.

¹⁵ Mieby dat dah wai Onesimos wehn get tek weh fahn yu iina di fos plies, so now ihn kyan deh wid yuu fi gud!

¹⁶ Bot now, Onesimos dah no muo jos wan sliev; ihn ton wan riil breda, speshaly tu mii! Ahn now ihn gwain miin moch muo tu yuu tu, no ongl laik wan sliev, bot laik wan Kristyan breda tu!

¹⁷ So, if yu tink a mii laik wan paadna wid yu, den welkom Onesimos jos laik how yu wuda welkom mii.

¹⁸ Ahn, if ihn wehn eva du enyting bad tu yo, or if ihn huo yu enyting, yu fi put'ih pahn mi akount.

¹⁹ Dah mii, Paul, deh rait dis wid mi uon han: Ai wi pie yo bak. Ah no tink Ah hafy menshan seh yuu huo mii yo uon laif.

²⁰ So, mi breda, jos du mi dis fieva fi di Laad siek; ahn mek mi haat hapy.

²¹ Ah shuor seh, az Ah deh rait yo, yu gwain du weh Ah aks yo fi du, ahn iivn muo an weh Ai deh aks.

²² Wan muo ting: pliiz get wan ruum redy fi mi, bikaaz Ah deh huop seh God gwain ansa aala unu praya dem, ahn Ah gwain kyan kom bak tu unu suun-suun.

Di laas griitin dem

²³ Epaphras, weh deh iina prizn wid mi sieka Jesus Christ, sen heluo fi yu,

²⁴ ahn Mark, ahn Aristarchus, ahn Demas, ahn Luke —weh dah mi fela worka dem— sen heluo tu.

²⁵ Ah prie seh di gries a di Laad Jesus Christ deh wid aala unu. Amen!