Jude 1 - The New Testament in Islander Creole

Di Apasl Jude rait wan leta bout faals tiicha weh deh kom

¹ Dis leta dah fahn mii, Jude, wan a Jesus Christ sorvant, ahn fi James breda. Ah deh rait dis leta tu aal dehn pipl weh God don set apaat fi bii ihn uon pipl, ahn weh ihn lov, ahn weh Jesus ihnself deh kiip sief.

² Ah prie seh God gi aala unu plenty morsy, ahn piis ahn lov.

³ Unu weh dah mi fren dem —unu weh Ah lov— Ah wende plan fi rait tu unu bout di nyuu laif weh God wehn gi wi, weh aala wi shier tugeda. Bot now, Ah hafy stap ahn waan unu fi fait haad fi di Gud Nyuuz weh wi biliiv iina, weh God wehn gi tu ihn pipl wans ahn far aal!

⁴ Ah seh dis bikaaz Ah hier seh som pipl, weh deh gens God, don sniik iin mongs unu ahn chienj di mesij a God gries! Dehn deh seh how unu kuda liv slak laif, bikaaz God don paadn aala wi sin aredy! Demde kain a pipl iivn seh wi no hafy obie Jesus Christ az fi wi Maasta ahn Laad! Bot, fahn lang taim abak di Skriptyo wehn seh God gwain joj demde kain a pipl ahn ponish dem!

⁵ Now, iivn duo unu don nuo ih aredy, Ah waahn memba unu seh, wan taim God wehn help fi wi ansesta —di pipl fahn Israel— fi dehn get-weh fahn di Egyptian pipl dem, bot aftawod ihn end'op deh distrai dehn pipl weh neva stie fietful tu him!

⁶ Ahn unu shuda tink bout di ienjel dem tu, weh neva satisfai wid di amount a atarity weh God wehn gi dem, bot dehn paas di limit weh ihn wehn set fi dem! Sieka dat, God chien dem op fareva diip dong iina wan daak plies weh dehn gwain wiet fi wen Dat Die kom, wen ihn gwain joj aala dem!

⁷ Ahn di siem kain a ting hapm iina Sodom ahn Gomorrah, ahn di ada sity dem weh wende nier tu dem. Dehn wende go aan wid aal kain a wotlisnis, ahn dehn wende gat seks iina aal kain a doty wie. Sieka dat, God distrai dem wid faiya weh gwain laas fareva. Ahn dis dah wan waanin fi aala demde kain a pipl weh du demde siem ting!

How bad di faals tiicha dem bad

⁸ Di pipl dem weh Ah deh taak bout dah demde weh no riily nuo God ataal! So, iina di siem bad wie dehn seh dehn get speshal driim fahn God weh mek'ih aarait fi dehn du aal kain a dotinis wid dem bady, dehn no gat non rispek fi God atarity ataal. Ahn dehn taak bad bout di livin bi'in dem weh get dehn gluory fahn op dah hevn tu!

⁹ Bot, iivn Michael ihnself —weh dah di grietis ienjel iina hevn— neva wehn tek'ih pahn himself fi akyuuz ahn taak bad bout di devl, wen dehn wende aagyo bout dah huu gwain get di rait fi get Moses bady. Insida dat, ihn ongl tel im seh, “Mek di Laad diil wid yuu!”

¹⁰ Bot demya faals tiicha dem tek enyting weh dehn no andastan, mek papishuo ahn seh aal kain a wikid tingz gens dem. Dehn dah jos laik demde animal weh du evryting weh dehn main tel dem fi du, ahn dat dah how demde kain a pipl end'op deh distrai dehn uonself!

¹¹ Dehn deh iina big trobl, bikaaz dehn deh fala Cain egzampl weh wehn kil ihn uon breda. Ahn dehn deh ak laik Baalam, weh wuda wehn du enyting fi mony. Ahn siem laik Korah —weh wehn ton gens God— dem gwain get distrai tu!

¹² Ahn sieka demde shiemful ahn selfish tingz weh dehn deh du, demde kain a pipl dah laik som doty stien weh spail'op di taim weh unu gat —dah taim wen unu kom tugeda fi iit wid wan anada. Dehn drink ahn laaf til dehn dronk! Dehn dah laik shepad weh fiid ongl demself, insida tek kier a dehn shiip! Demde kain a pipl dah laik dehn kloud weh di briiz bluo uova drai lan, bot no bring non rien ataal. Dem dah laik dehn trii weh no bier notn, nat iivn wen dah taim kom fi pik fruut. Demde pipl, dehn ded two taim bikaaz dehn don dig out fahn dehn ruut!

¹³ Dem dah laik di wiev dem fahn di sii, weh fuom'op aal di dotinis pahn di sii-said —siem laik dehn shiemful tingz weh demde pipl dehn du. Dem dah laik demde staar weh no gat non plies iina di skai. So, God gat wan plies fi dem weh gwa'iina daaknis fareva, weh deh no gwain gat lait nontaim ataal!

¹⁴ Memba seh: Enoch dah wehn seven jinarieshan afta Adam, ahn ihn wehn prafisai bout demde kain a pipl, wen ihn seh: “Luk ahn si gud! Di Laad deh kom, wid thousands ahn thousands a ihn huoly ienjel dem.

¹⁵ Ihn deh kom fi joj, aala di pipl dem iina di worl! Ihn deh kom fi kandem aala dem sina dem weh no obie im, fi aala di teribl ting dem weh dehn seh gens im, ahn weh dehn du gens im tu!”

¹⁶ Demde kain a pipl —aal weh dehn deh du dah grombl'op ahn komplien, ahn deh du som paila wikid tingz weh dehn fiil laik! Dehn shuo aaf, ahn dehn swiit'op pipl wid dem big mout jos fi get weh dehn waahn.

Som muo waanin fi God pipl dem

¹⁷ Bot unu, weh dah mi gud fren dem, unu fi memba weh fi wi Laad Jesus Christ apasl dem don figa out seh:

¹⁸ “Wen di laas diez kom, plenty pipl weh deh gens God ahn deh fala dehn uon wikid wiez, gwain apier'op!”

¹⁹ Ahn dah demya siem pipl yah deh kaaz divizhan mongs unu. Dehn mek aal di wikid tingz weh dehn waahn, kanchruol dem. Unu si, demde kain a pipl neva gat God Spirit iina dem nontaim ataal.

²⁰ Bot unu, weh dah mi gud fren dem, unu fi bil'op unuself, mek unuself get stranga ahn stranga evry die iina unu fiet weh huoly. Ahn, wen unu prie, mek di Holy Spirit liid unu.

²¹ Kiip unuself iina di lov a God. Luk ahed pahn di morsy a fi wi Laad Jesus Christ, weh mek wi gat laif weh gwain laas fareva.

²² Ahn unu fi gat morsy pahn som a di bredrin dem weh wiik iina dehn fiet tu;

²³ ahn siev som a di ada pipl, deh grab dem outa di faiya. Ahn unu gat som nada wan, weh unu fi gat morsy fah; bot unu niid fi wach out wid demde kain a pipl! Unu fi hiet iivn di kluoz weh dehn wier, bikaaz di doty tingz weh dehn du iivn mek dehn kluoz doty tu!

Wan laas praya

²⁴ Now, mek wi gi fi wi God aal di gluory, bikaaz dah ongl him huu kyan huol wi op, ahn den bring wi tu ihn gluoryos plies bitout non faalt ataal, ahn wid plenty jai.

²⁵ Mek wi gi gluory chruu wi Laad Jesus Christ, tu di Wan ahn ongl God, wi Sievya, weh gat aal di gluory, ahn ana, ahn powa, ahn aal atarity fahn di biginin, now, ahn fareva. Amen!