John 14 - The New Testament in Islander Creole

Jesus dah di ongl wie tu di Faada

¹ Jesus seh, “No mek unu haat get uova hevy; chros iina God ahn chros iina mii tu.

² Mi Faada hous gat plenty spies. If dat dah neva chruu, Ah wuda wehn tel unu; bot dat dah chruut, ahn now Ah gwain go fiks'op wan plies fi unu.

³ Ahn wen Ah don gat evryting redy, Ah gwain kom bak fi unu ahn ker unu wid mi, so unu kyan deh, di siem plies weh Ah deh tu.

⁴ So unu nuo weh paat Ah gwain ahn how unu fi get deh.”

⁵ Bot Thomas seh tu im, “Laad, wii no iivn nuo weh paat yo gwain; so dah how wi kyan nuo di wie fi get deh?”

⁶ Jesus ansa ahn seh, “Mii dah di Wie, di Chruut, ahn di Laif; nonbady kyaahn kom tu di Faada eksep chruu mi.

⁷ If unu riily nuo mii, den unu gwain nuo mi Faada tu. So fahn now aan unu nuo him fi chruut ahn unu don si him aredy.”

⁸ Philip tel Jesus, “Laad, mek wi si di Faada wid fi wi uon ai dem, ahn wi gwain satisfai.”

⁹ Jesus ansa ahn seh, “Philip, Ah deh wid yu dis huol taim ahn stil yet yu no nuo mi? Enybady weh don si mii, don si di Faada tu. So dah how yu kyan seh, ‘Mek wi si di Faada wid wi uon ai dem’?

¹⁰ Philip, yu no biliiv seh Ai deh iina di Faada ahn di Faada deh iina mii? Di wod dem weh Ah seh tu unu, dah no weh Ah jos tink pan; dah di Faada weh deh iina mi deh work fi him uon tingz dem chruu mii.

¹¹ Biliiv mi wen Ah seh Ai deh iina di Faada ahn him deh iina mii. If unu no biliiv dat, den at liis biliiv sieka aala di mirakl dem weh unu si Ah du.

¹² “Ah deh tel unu di chruut: enybady weh chros iina mi gwain du di siem kain a tingz weh Ah du. Muo an dat, dehn gwain du muo grieta tingz an demya weh unu si Ah du, bikaaz Ah gwain bak tu di Faada.

¹³ So den, unu aks fi enyting iina mi niem, ahn Ah gwain du'ih, so weh di Son du, gwain mek di pipl dem si how di Faada wandaful.

¹⁴ If unu aks iina mi niem, wen unu aks mi fi enyting, Ai gwain du'ih.

Jesus pramis fi sen di Holy Spirit

¹⁵ “If unu lov mi, unu fi du aal mi komaanment dem.

¹⁶ Ahn Ah gwain aks di Faada ahn ihn gwain sen unu wan neks Helpa weh gwain aalwiez deh wid unu.

¹⁷ Dah Helpa dah di Holy Spirit ahn ihn gwain mek unu nuo di chruut bout God. Bot di pipl dem weh deh liv iina disa worl, neva gwain mek di Holy Spirit kom iina dehn haat, bikaaz dehn no deh luk fi si'im, nar waahn nuo dah huu him. Bot unu nuo di Spirit aredy, bikaaz him deh wid unu, ahn ihn gwain liv rait iinsaida unu.

¹⁸ “Ah no gwain lef unu laik dem likl pikniny weh no gat nonbady fi main dem; Ah gwain kom bak tu unu.

¹⁹ Wan likl wail muo ahn di pipl dem iina disa worl no gwain si mi no muo, bot unu gwain si mi duo. Ahn bikaaz Ah gwain liv agen, unu gwain liv tu.

²⁰ Wen dah taim kom, dah den unu gwain nuo seh Ah deh iina mi Faada, ahn unu deh iina mii, ahn Ah deh iina unu.

²¹ Dem weh nuo mi komaanment dem ahn fala dem dah di wan dem weh lov mi fi chruut. Ahn mi Faada gwain lov dem weh lov mii, ahn Ah gwain lov dem tu; ahn Ah gwain shuo dem dah huu mii.”

²² Now wan neks disaipl weh niem Judas —no Judas Iscariot— seh tu Jesus, “Laad, dah weh mek yuu gwain shuo wii now how yo wandaful, bot yo no gwain shuo di res a di pipl fahn disa worl?”

²³ Jesus ansa seh, “Dem weh lov mi gwain du weh Ah seh, ahn mi Faada gwain lov dem, ahn mii ahn him gwain kom liv wid dem.

²⁴ Enybady weh no lov mi, no du weh Ah seh. Dah no mii mek'op demya wod weh Ah deh tel unu, bot dem dah fahn mi Faada weh sen mii.

²⁵ “Ah tel unu demya tingz wail Ah stil deh wid unu.

²⁶ Bot di Helpa —di Holy Spirit— weh di Faada gwain sen unu iina mi niem, him gwain mek unu nuo evryting ahn ihn gwain mek unu memba aal di tingz weh Ah wehn tel unu.

²⁷ “Piis dah weh Ah deh lef wid unu, di kain a piis wid jai weh Ah gat iina mi haat. Dis piis dah no laik di piis weh disa worl kyan gi unu. So unu no fi trobl unu haat; no fried, man!

²⁸ Unu aredy hier weh Ah don tel unu, ‘Ah gwain weh, bot Ah gwain kom bak tu unu agen.’ Wel, if unu wehn lov mi, unu wuda glad Ah gwain tu di Faada, bikaaz him muo grieta an mii!

²⁹ “Ah don tel unu aala dis bifuor ih hapm, so wen ih hapm, unu kyan biliiv weh Ah wehn seh.

³⁰ Bot Ah no gwain taak wid unu so moch afta dis, bikaaz di wan weh deh ruul disa worl deh kom. Him no gat non powa uova mii,

³¹ bot Ah du weh di Faada komaan mii fi du, so aal di pipl iina disa worl kyan nuo seh Ah lov him. “Now, get'op ahn mek wi go!”