James 5 - The New Testament in Islander Creole

Main, unu rich pipl tu!

¹ Wach yah, unu rich pipl! Unu beta huol unu hed ahn baal out haad, sieka di trobl weh deh kom pahn unu.

² Bikaaz aala unu richiz deh ratn weh, ahn di insek dem don iit'op unu kluoz!

³ Unu guol ahn silva don rosty. Ahn dah rostinis gwain bii wan wiknis gens unu, ahn bon'op unu flesh laik faiya. Stil yet unu don siev'op plenty richiz iina demya laas diez.

⁴ Lisn yah! Dah mony weh unu huol bak fahn di man dem weh wehn work iina unu grong, deh baal out gens unu. Ahn di Laad God Aalmaity hier di workman dem deh baal.

⁵ Unu wikid ahn grabalishos ahn krievn! Bot unu deh fatn op unuself fi di die a unu slaata.

⁶ Unu kandem ahn morda inosent pipl, bot stil yet dehn no deh fait bak.

Gat pieshens fi di die Christ gwain kom bak

⁷ Bot bredrin, unu fi bier'op pieshens til di taim wen di Laad kom bak. Luk how di faama hafy wiet fi di rien kom, wen ihn plaant out di siid dem. Ahn den ihn hafy wiet agen fi di rien kom, jos bifuor taim fi riip. Unu no si how pieshent ihn wiet fi di lan gi'im ihn gud krap? Ihn gat plenty pieshens.

⁸ So den, aala unu hafy bii pieshent tu; ahn kiip'op unu haat gud, bikaaz di Laad gwain suun kom bak!

⁹ Ahn bredrin, unu no fi grombl gens wan anada niida, bikaaz God gwain joj unu if unu du dat. Wach yah! Di Joj deh rait bai di duo rait now, redy fi joj unu.

¹⁰ Luk pahn di uol taim prafit dem weh yuuztu priich egzakly weh di Laad God wehn tel dem, iivn duo dehn wuda sofa plenty far ih. Demde man weh wehn gat plenty pieshens, dah wehn wan gud egzampl fi unu.

¹¹ Wii kaal demde pipl hapy ahn bles, bikaaz dehn gaan chruu plenty trobl ahn neva gi'op. Ahn Ah shuor seh unu wehn hier bout Job tu, how ihn huol aan aal chruu fi him troblz ahn neva gi'op nontaim. Si weh God du far im pahn di en? Ihn bles im plenty. So wi si how di Laad lov wi bad; him haat ongl saaf tuwaadz wi weh wiet pahn im.

¹² Ahn muo an eva, bredrin, unu no fi swie, nat bai hevn nar bai ort, nar bai notn ataal! Aal unu hafy seh dah wan plien, “Yees sah,” or “Nuo sah” —or els God gwain joj unu.

Powaful praya dem

¹³ So bredrin, if enywan a unu gat troblz, mek dehn prie! If enybady hapy, mek dehn sing priez tu God!

¹⁴ If enybady sik, mek dehn sen fi di chorch elda dem fi mek dehn prie uova dem, ahn put aliv ail pahn dem iina di niem a di Laad.

¹⁵ Ahn wen dehn prie wid fiet, di Laad gwain mek di sik porsn get beta; dehn gwain stan op strang agen. Ahn if dehn wehn sin, God gwain fargiv dem tu.

¹⁶ So den, unu fi kanfes unu sin dem tu wan anada, ahn prie fi wan anada so dat unu kyan get hiil. Memba seh, wen wan porsn weh rait wid God prie, dat uova powaful ahn tingz gwain hapm!

¹⁷ Siem laik di uol taim prafit Elijah weh dah wehn wan man jos laik mii ahn unu. Ihn prie fahn ihn haat fi mek'ih no rien; ahn afta ihn prie, fi three ahn a haaf yierz ih neva rien ataal!

¹⁸ Den ihn prie agen, ahn rien puor dong fahn hevn ahn evryting staat gruo agen pahn di lan.

¹⁹ So, bredrin, di laas ting Ah gwain seh dah, if wan a unu strie fahn di chruut ahn wan nada wan a unu bring im bak,

²⁰ unu fi nuo dis chruut: Enybady weh ton wan sina fahn ihn rang wiez, ihn gwain siev dah sina suol fahn det, ahn dat gwain mek ihn get fargivnis fi wan huol paila sin dem. Amen!