James 4 - The New Testament in Islander Creole

Nuo unu plies wid God

¹ Bot, dah weh mek unu fait ahn kwaaril mongs unuself fah? Dah no sieka weh unu lov plezha so moch? Yees sah, dah aala dehn bad tingz weh unu waahn so moch weh deh tier unu op fahn iinsaida unu.

² Unu waahn somting, bot unu kyaahn get'ih, so unu iivn redy fi morda wan anada! Unu groj ahn grabalishos, bot stil yet unu kyaahn get weh unu waahn. So unu kwaaril ahn fait'op mongs unuself. Lisn, bredrin, unu no gat weh unu niid, bikaaz unu no aks God far ih!

³ Ahn wen unu du aks, unu no get notn, bikaaz unu aks fi di rang riizn dem. Unu aks fi demya tingz weh gwain beta unu uon plezha dem.

⁴ Main, unu wotlis pipl weh no fietful tu di Laad, unu no nuo seh, wen unu deh ton fren wid di worl unu kyaahn bii God fren no muo? So enybady weh mek'op dehn main fi jain wid di worl ahn du fi dehn wikidnis, dah porsn mek demself wan a God enimy!

⁵ Or, unu tink seh di Skriptyo no miin notn wen ih seh, “Di spirit, weh God put iina wi, dah wan uova jalas spirit.” Ihn no gwain shier him plies iina fi wi haat wid nonbady els!

⁶ Memba seh: di gries weh God gi wi muo stranga an di wikidnis a disya worl! Das wai di Skriptyo seh, “God deh gens demde pipl weh proud, bot ihn help di pipl dem weh ombl.”

⁷ So den, unu fi nuo unu plies wid God. Stan op ahn fait di devl, ahn ihn gwain ton roun ahn ron weh fahn unu!

⁸ Kom nier tu God, ahn ihn gwain kom nier tu unu tu. Unu sinaz, wash unu han dem! Ahn unu hipokrit, unu fi kliin unu doty haat tu!

⁹ Ripent, staat muon ahn baal out haad. Stap laaf ahn staat krai. Stap fiil glad ahn staat fiil sad!

¹⁰ Ombl unuself aanda di Laad —ahn den, him gwain riez unu op!

Wi no fi joj wan anada, nar bregin, nar big main

¹¹ Lisn, bredrin, unu no fi kritisaiz wan anada niida. Bikaaz, wen unu kritisaiz wan anada, or joj wan anada, unu deh kritisaiz di Laa a God ahn unu deh joj'ih tu. Ahn, if unu deh joj di Laa, den unu no gwain bii laik wan weh deh kiip'ih, bot unu deh mek unuself di joj a ih!

¹² Memba seh: dah ongl wan Porsn deh weh mek di Laa, ahn him dah di chruu Joj. Him dah di Wan weh kyan siev unu or distrai unu. So dah huu unu, fi joj unu nieba den?

¹³ Ahn main, aala unu weh seh, “Tudeh or tumaara wi gwain dah disya plies or datde plies, ahn wi gwain spen wan yier deh ahn du bizniz ahn mek plenty mony.”

¹⁴ Bot unu no iivn nuo weh gwain hapm tumaara! Unu laif dah laik wan likl bit a stiim weh unu si fi wan likl wail, ahn den ih disapier!

¹⁵ Unu shuda seh, “If God waahn, wi gwain kyan liv ahn du dis or dat.”

¹⁶ Bot, wen unu luk pan ih, unu tuu bregin ahn big main, ahn dat uova bad, man!

¹⁷ So den, enybady weh nuo di rait ting fi du ahn den ihn no du'ih, him deh sin gens ihn uon suol.