James 3 - The New Testament in Islander Creole

Main weh wi deh seh!

¹ Bredrin, plenty a unu shudn trai fi bii tiicha, bikaaz unu nuo seh God gwain joj aala wi weh deh tiich muo haada an evrybady els!

² Dah chruut seh aala wi “bok wi fut” mek mistiek iina difrent kain a wie evry now ahn den. Bot, if enybady kyan kanchruol dehn tong aal di taim, den dehn porfek ahn dehn kyan kanchruol di huol a dehn bady tu.

³ Now, luk pahn wan haas. Unu si how gud wi kyan kanchruol ahn mek im obie, wen wi put wan bit iina ih mout?

⁴ Or, luk pahn wan ship. Unu si how big ih big, ahn how wan strang briiz kyan ker'ih? Bot stil yet, di kyapm kyan kanchruol di ship wid wan likl roda, ahn mek'ih go enywie weh him waahn.

⁵ Rait so, di tong dah wan likl-likl piis a wi bady, bot ih ongl bregin ahn taak big, no chruut? Ahn luk how wan big bush a faiya kyan staat fahn wan likl spaak.

⁶ Unu main: di tong dah wan faiya tu! Ih deh rait deh mongs di ada paats a di bady, bot ih ful'op a wikidnis weh kyan mes'op di huol a wan porsn, ahn kaaz wan bliez weh kyan distrai di huol a dehn laif! Ahn ih get dah faiya striet fahn hel!

⁷ Pipl kyan tiem aal kain a animal ahn bord ahn reptail dem, ahn demde tingz weh deh liv iina di sii tu.

⁸ Bot nonbady kyaahn tiem di tong. Dat ting, weh wikid ahn uova bad, ful'op a paizn weh kyan kil unu ded!

⁹ Lisn, wii deh yuuz wi tong fi priez fi wi Laad ahn Faada, ahn den aftawod, wi ton roun ahn yuuz dah siem tong fi kos di pipl dem weh God don mek laik ihn uonself!

¹⁰ Imajin bredrin! Priez ahn kosn deh kom outa di siem mout. Dis no rait, yu nuo.

¹¹ Wat? Fresh waata ahn saalt waata kyan kom outa di siem wel? Nuo sah.

¹² Unu no nuo seh wan fig trii kuda neva bier aliv, nar wan griep vain kuda neva bier fig. Rait so, wan saalt waata wel kyaahn gi'yo fresh waata niida!

Gud sens dah fahn di Laad op iina Hevn

¹³ Wan nada ting, bredrin: enybady deh mongs unu, weh waiz ahn gat gud sens? Den, mek dem shuo ih bai di gud wie dehn liv. Dehn hafy smaat nof fi no priez'op dehn uonself, wen dehn du dehn gud work.

¹⁴ Bot iina unu haat, if unu grojful ahn gat red ai, ahn ongl kansaan bout unuself, den unu no fi buos bout aal weh unu nuo. Dat dah no di rait wie niida.

¹⁵ Dat kain a “wizdom” no kom fahn God iina hevn! Ih kom fahn dong yah iina di worl, fahn unu uon sinful nietyo ahn fahn di devl ihnself!

¹⁶ So, wen-eva unu si pipl red ai ahn deh ongl tink bout dehn uonself, unu gwain fain kanfyuuzhan ahn aal kain a wikidnis deh go aan.

¹⁷ Bot di fos ting bout di pipl dem weh gat di wizdom weh kom fahn God, dah dem liv wan uova kliin laif. Dehn lov piis ahn dehn kansidariet; dehn nuo dehn plies ahn dehn ful a morsy ahn dehn du kain tingz fi di pipl dem. Dehn triit evrybady di siem wie, ahn dehn neva two-fies!

¹⁸ So den, bredrin, evrybady weh help mek piis mongs ada pipl, dehn deh plaant di siid a piis ahn dehn gwain riip plenty gud ting fahn dat.