Hebrews 8 - The New Testament in Islander Creole

Jesus dah fi wi Hai Priis

¹ Now di huol ting weh wi deh seh, dah dis: Fi wi Hai Priis deh sidong pahn di rait han saida di Griet Chruon a God Aalmaity op iina hevn.

² Dah him, Jesus, weh now sorv az Hai Priis iina di chruu plies a waaship. Dis plies dah weh di Laad don bil —no hyuuman bi'in neva bil'ih!

³ Di work weh evry Hai Priis fi du dah fi aafa gif ahn sakrifais tu God, so wi Hai Priis hafy aafa somting tu.

⁴ Now, if Jesus wende dong yah pahn ort, ihn neva wehn gwain bii wan priis ataal, bikaaz dehn don gat priis rait yah fi aafa gif jos laik weh Moses Laa seh.

⁵ Di work weh dehn priis du, dah ongl wan kapy ah weh hapm iina hevn. Dah no di riil ting. Bikaaz, wen Moses wende get redy fi bil di tent weh paat dehn wuda aafa sakrifais, God waan im seh, “Mek shuor seh yu bil'ih egzakly jos laik how Ah wehn shuo yo op pahn di mountin.”

⁶ Bot, now God pik Jesus fi du di work a wan priis, ahn dah work muo beta an weh dem ada priis dehn wuda du. Siem wie, Jesus mek wan beta agriiment bitwiin God ahn di pipl dem; ahn aanda disya nyuu agriiment, God don mek wan pramis weh muo beta an di uol wan.

⁷ If somting neva rang wid di fos agriiment, den wi no wehn gwain niid wan nyuu wan, no chruut?

⁸ Bot God wehn fain faalt wid di pipl dem ahn seh: “Di taim deh kom, wen Ah gwain mek wan nyuu agriiment wid di pipl fahn Israel, ahn wid di pipl fahn Judah.

⁹ Dis nyuu agriiment no gwain bii laik di agriiment, weh Ah wehn mek wid fi dehn ansesta dem, wen Ah tek dem bai dehn han ahn liid dem outa Egypt. Dehn brok daty agriiment wid mii, so Ah ton mi bak pahn dem,” seh di Laad God.

¹⁰ Bot, den ihn seh tu: “Dis dah di nyuu agriiment weh Ah gwain mek wid di pipl fahn Israel, wen di rait taim kom: Ah gwain rait mi Laa dem pahn dehn main, so dehn kyan andastan dem. Ahn Ah gwain rait dem iina dehn haat, so dehn kyan obie dem. Ai gwain bii dehn God, ahn dem pipl gwain bii mai pipl dem.

¹¹ Ahn dehn no gwain hafy tiich dehn famaly, nar tel dehn nieba dem seh, ‘Unu fi kom fi nuo di Laad.’ Bikaaz aala dem, fahn di liis tu di grietis, dehn gwain aredy nuo mi!

¹² Ah gwain fargiv aal di rang tingz weh dehn wende du; Ah no gwain memba dehn sin no muo!”

¹³ Ahn wen God seh dis agriiment dah wan nyuu wan, him miin seh ihn no deh yuuz di uol wan no muo. Ahn enyting weh uol ahn no iina yuuz no muo, gwain suun disapier.