Hebrews 1 - The New Testament in Islander Creole

God taak tu wi chruu ihn Son

¹ Lang-lang taim abak, God wehn taak plenty taim ahn iina difrent wie tu wi ansesta dem, chruu di prafit dem.

² Bot now iina demya laas diez, ihn deh taak tu wi chruu ihn uon Son. God wehn mek di huol worl ahn evryting weh egzis chruu ihn Son, ahn wan die evryting gwain bii fi him.

³ God Son dah di Lait weh shuo wi God griet gluory. So, wen unu si di Son, unu deh si God tu, bikaaz di Son dah di siem jos laik God. Ahn chruu di powa a ihn wod, di huol worl ahn evryting weh egzis, deh huol tugeda. So, wen God Son don wash weh fi wi sin dem, ihn gaan op iina hevn, gaan sidong bai di rait saida God di Muos Powaful Wan!

God Son muo haiya an di ienjel dem

⁴ God mek ihn Son muo haiya ahn grieta an di ienjel dem, jos laik how di niem weh ihn gi'im faar-faar grieta an di niem weh dehn gat.

⁵ Bikaaz, God neva tel non a di ienjel dem seh: “Yuu dah mi Son, tudeh Ah kom fi bii yo Faada.” Ahn agen, God neva tel non a di ienjel dem seh: “Ah gwain bii unu Faada, ahn unu gwain bii mi son.”

⁶ Ahn wen God sen im iina dis worl, ihn tel aala di ienjel dem seh: “Aala unu fi waaship him.”

⁷ Ahn wen God taak bout di ienjel dem, ihn seh: “Ai mek mai ienjel dem fi bii laik di briiz weh deh bluo, ahn mi sorvant dem laik faiya weh deh bliez.”

⁸ Bot, wen God taak tu ihn Son, ihn seh: “Yuu dah God, ahn yo kingdom gwain laas fareva ahn eva! Yu ruul yo pipl dem karek.

⁹ Yu lov weh rait ahn yu hiet weh wikid. Dat dah wai mii —weh dah yo God— pik yo, ahn ana yo muo an aala yo fren dem, ahn wen Ah don pik yu, dat gi'yo plenty jai.”

¹⁰ Dis dah weh God seh tu: “Laad, wen notn neva deh, dah yu wehn mek di ort ahn di hevn wid yo uon han dem.”

¹¹ Aala demya tingz gwain kom tu wan en, bot yu gwain dedeh aal di taim. Demde tingz gwain wier out siem laik uol kluoz.

¹² Ahn yu gwain fuol dem op laik wan goun. Yu gwain chienj dem, jos laik wen pipl deh chienj dehn kluoz. Bot yu yoself gwain neva chienj; Yu gwain neva get uol ahn ded.

¹³ Ahn God neva tel non a di ienjel dem seh: “Sidong rait bai mi rait han said, til Ai put yo enimy dem aanda yo fut laik wan fut-stuul.”

¹⁴ Unu si seh di ienjel dem dah spirit ahn dehn dedeh fi sorv God. God deh sen dem fi help di pipl dem weh him gwain siev.