Galatians 5 - The New Testament in Islander Creole

Wi frii iina Jesus Christ

¹ Wii gat dis friinis, bikaaz Jesus Christ set wi frii. So den, tek unu stan iina dis friinis, ahn no mek nonbady mek unu go bak fi ton sliev tu eny ruul ahn regyulieshan agen.

² Lisn pipl! Dah mii Paul, weh deh tel unu dis: Unu no fi mek nonbady sorkomsaiz unu. If unu du dat fi mek unu get rait wid God, den weh Christ don du fi unu, no wot notn ataal!

³ Ai deh seh dis agen fi waan eny man weh waahn get sorkomsaiz: if yu du dat, den yu gwain hafy mek shuor seh yuu kiip evry ada likl piis a di Laa tuu!

⁴ Ahn az fi aala unu pipl weh trai fi get rait wid God bikaaz unu deh kiip di Laa: Unu don kot unuself aaf fahn Jesus Christ, ahn unu ton unu bak pahn God morsy ahn kainis!

⁵ Bot az fi wii, God Spirit mek wi nuo di chruut seh God gwain mek wi rait wid him, sieka wi fiet iina Jesus Christ. Ahn dis dah weh wi deh wiet fah, fi chruut.

⁶ Bikaaz, wen wi dah wan wid Jesus Christ, ih no mata if wi sorkomsaiz or no sorkomsaiz. Weh riily impuotant dah wi fiet iina Christ, ahn dah dat fiet weh mek wi gat lov.

⁷ Lisn pipl, unu wende go lang so gud op til now! Dah huu kom hombog unu, ahn mek unu chienj unu main fahn obie di chruut?

⁸ Dah neva God, bikaaz dah him kaal unu fi bii frii iina di fos plies.

⁹ Laik weh dehn seh, “Main! Ih ongl tek wan porsn weh deh du wan rang ting fi mek di res fala, jos laik how ih ongl tek wan likl bit a iis fi go chruu wan big piis a lomp ahn mek aala it chienj.”

¹⁰ Bot Ah deh chros di Laad seh unu gwain kantinyo biliiv siem laik mii, ahn dat huueva deh kanfyuuz unu, gwain pie fi it!

¹¹ Bot az fi mii, bredrin, if weh som pipl deh seh bout mi dah chruu, seh Ai stil yet deh priich seh unu hafy get sorkomsaiz, dah wai di Jew dem stil yet deh moles mi den? Ahn, if Ai wende priich seh unu hafy get sorkomsaiz, den di priichin bout weh Jesus du pahn di kraas wudn afen nonbady ataal!

¹² So den, main demde kain a pipl weh deh mes wid unu main, deh tel unu fi get sorkomsaiz. Unu no fi lisn tu dem, bot mek demde kain a pipl go hed ahn kot aaf di huol a fi dehn uon praivit paat dem —ahn den stap moles unu!

¹³ Az fi unu, bredrin, God kaal unu fi bii frii fi chruut. Bot dat no miin seh unu kyan go aan ahn du enyting weh unu fiil laik du. Insida dat, sieka di lov weh unu gat, unu fi du gud evry die deh help wan anada.

¹⁴ Bikaaz aal weh di Laa deh seh wi fi du, kom op tu wan komaanment: “Unu fi lov unu nieba jos laik how unu lov unuself!”

¹⁵ Bot if, insida shuo lov, unu deh bait'op ahn tier op wan anada laik di wail animal dem, den unu beta wach out unu no end'op deh distrai wan anada!

Mek di Holy Spirit kanchruol unu laif

¹⁶ Dis dah weh Ah miin fi seh: Mek di Holy Spirit kanchruol unu laif. If unu du dat, den unu no gwain deh fala weh unu uon sinful hyuuman nietyo waahn du.

¹⁷ Bikaaz, weh wi hyuuman nietyo waahn du, dah no weh di Holy Spirit waahn. Ahn weh di Holy Spirit waahn du, dah no weh wii waahn. Unu si, dah aalwiez wan fait bitwiin weh wi hyuuman nietyo waahn, ahn weh di Holy Spirit waahn. So den, ih mek'ih haad fi du weh unu riily waahn du.

¹⁸ Bot, if unu mek di Holy Spirit kanchruol unu laif, den unu no hafy deh aanda aal di ruul ahn regyulieshan dem iina di Laa.

¹⁹ Ih plien fi si weh pipl gwain end'op deh du, wen dehn deh fala dehn uon sinful hyuuman nietyo: demde kain a pipl sliip roun, dehn no gat kliin tinkin, ahn dehn get iina wail livin;

²⁰ dehn waaship di aidal dem ahn dehn du uobya tu. Dehn ton enimy wid wan anada, dehn kyaahn grii wid nonbady; dehn jalas afta wan anada, dehn get beks, ahn dehn selfish bitwiin demself. Den, dehn split'op iina fi dehn uon likl gruup dem, ahn aala dem gruup deh gens wan anada.

²¹ Dehn groj wan anada, dehn jrink lika ahn get jronk, dehn gat plenty wail paaty, ahn dehn du ada uova bad tingz laik demde. Unu nuo seh Ah don waan unu aredy, ahn Ah deh waan unu agen: Demde kain a pipl weh liv dah kain a laif no gwain gat non paat iina God Kingdom ataal!

²² Bot, if wi mek di Holy Spirit kanchruol wi laif, den dis dah weh gwain kom outa fi wi laif: lov, hapinis, piis, pieshens, ahn kainis. Ahn wi gwain triit wan anada gud, ahn di pipl dem gwain kyan dipen pahn wi tu.

²³ Wi gwain ombl, ahn wi gwain kyan kanchruol wiself iina evryting. Ahn, wen wi deh du demya gud ting evry die, dah weh di Laa deh, weh wi gwain brok? Non ataal!

²⁴ So, wen wi dah fi Jesus Christ, den wi uon sinful nietyo ahn aal demde tingz weh wi wehn yuuztu hat fi du, dah laik dehn get niel'op pahn wan kraas. Dehn ded fi chruut!

²⁵ So, bredrin, sins dah di Holy Spirit gi wi fi wi nyuu laif, den wi fi mek ongl him kanchruol how wi liv.

²⁶ Ahn no mek wi get proud deh ron gens wan anada, ahn deh jalas wan anada niida.