Ephesians 6 - The New Testament in Islander Creole

Di pikniny dem ahn dehn pupa ahn muma

¹ Ahn unu pikniny! Unu fi obie unu pupa ahn unu muma bikaaz unu dah fi di Laad, ahn dat dah di rait ting fi du.

² Dat dah di fos komaanment tu, weh gat wan pramis lang wid it, ahn ih seh tu unu: “Yu fi gat rispek fi yo pupa ahn yo muma.”

³ Ahn di pramis weh go lang wid it seh, “Wen yu ana dem, evryting weh hapm tu yo, gwain go gud ahn yo gwain liv lang pahn di ort.”

⁴ Ahn unu weh dah pupa! Unu no fi seh ahn du enyting tu unu pikniny weh gwain mek dem uova beks wid unu. Weh unu fi du dah fi tiich dem gud, ahn trien dem iina di Laad wie.

Di maasta ahn ihn sorvant

⁵ Ahn unu weh dah sorvant! Unu fi shuo rispek tu unu maasta yah pahn ort ahn du weh ihn tel unu fi du. Unu fi du dah work wid aala unu haat, siem laik how unu wuda du'ih fi Christ himself!

⁶ So, unu no fi work gud ongl wen unu maasta deh wach unu, fi mek unu uonself luk gud. Bot, bikaaz unu dah wan sorvant a Christ, unu fi du weh God waahn wid aala unu haat!

⁷ Unu fi du unu work gud wid wan hapy haat tu, jos laik how unu wuda du'ih fi di Laad, ahn no jos fi pipl.

⁸ Memba seh: Christ gwain gi evrybady dehn pie fi di gud work weh dehn du. Ihn no mek non difrens, if dehn dah sorvant or if dehn frii.

⁹ Ahn unu weh dah maasta, unu fi triit unu sorvant dem iina di siem wie. Unu no fi tretn dem ahn mek dem fiil fried fi unu, bikaaz unu no fi farget seh unu ahn unu sorvant dem dah fi di siem Maasta iina hevn! Ahn him no gwain triit wan porsn muo beta an di ada.

Aal weh God gi unu fi fait gens wikidnis

¹⁰ Now, mek Ah tel unu dis laas ting: Unu fi mek di Laad mek unu muo stranga evry die chruu ihn maity powa!

¹¹ Ahn unu fi put aan aal weh God gi unu fi protek unu, wen unu fait gens wikidnis —jos laik wen wan suoldya put aan dehn aiyan kluoz fi protek dehn huol bady. Unu fi du dat, so wen di devl kom wid ihn wikid plan, unu gwain kyan stan op gens im!

¹² Bikaaz, wi no deh fait gens non pipl. Wii deh fait gens dehn powa weh wi kyaahn si —gens dehn wikid spirit dem weh deh liv hai op deh iina di ier. Wii deh fait gens di strang powa dem weh deh ruul uova di pipl dem weh no chros iina God, ahn gens demde powa weh gat atarity now iina disya daak taim weh wi deh liv iina.

¹³ So den, bredrin, now dah di taim fi unu put aan aal weh God gi unu fi protek unu iina di fait! Den, wen dah die kom wen wikidnis kom tu unu fi chruut, unu gwain kyan stan op ahn fait gens di wikid plan a di devl. Ahn wen unu don fait tu di en, unu gwain lef deh stan strang pahn unu fut!

¹⁴ So den, unu fi stan strang gens evryting weh wikid. Mek aal dah chruut weh unu biliiv, bii laik di belt weh wan suoldya taitn gud roun ihn wies. Ahn mek di rait wie a livin weh unu deh stan fah, bii laik dah aiyan wes-kot weh kova di suoldya ches.

¹⁵ Ahn unu fi bii redy fi priich di Gud Nyuuz a piis tu, weh God deh gi. Dat dah laik di shuuz weh dah suoldya put aan pahn ihn fut dem.

¹⁶ Den, mek unu fiet iina Jesus Christ stie strang laik di shiil weh dah suoldya ker. Ahn wid dah shiil unu gwain kyan blak aal di aruo dem wid faiya, weh di Wikid Wan deh shuut tu unu.

¹⁷ Ahn unu fi mek di salvieshan weh God gi unu, protek unu gud laik wan helmit weh dah suoldya wier pahn ihn hed. Ahn unu fi mek God Wod weh di Holy Spirit gi unu, bii laik di suod weh wan suoldya gat fi fait gens ihn enimy dem.

¹⁸ So, prie aal di taim ahn aks God fi help unu; ahn aks ihn Spirit fi help unu prie. Stie pahn unu gyaad aal di taim ahn neva stap deh prie fi aala God pipl dem!

¹⁹ Ahn unu fi prie fi mii tu, so dat enytaim Ah staat priich, God gwain shuo mi weh Ah fi seh. Den, Ah no gwain fried wen Ah tel di pipl dem di siikrit bout Christ Gud Nyuuz.

²⁰ Fi di siek ah dis Gud Nyuuz, Ai dah God mesinja, bot rait now dehn chien mi op iina prizn. So unu fi prie fi mi so dat Ah no get fried nontaim fi tel di pipl dem bout Jesus Christ, jos di wie Ah shuda tel dem.

Di Apasl Paul laas wod dem iina dis leta

²¹ Now den, bredrin, Ah waahn unu fi nuo seh Tychicus dah wi dier breda ahn wan fietful sorvant fi di Laad. So, wen ihn get deh dah Ephesus, ihn gwain tel unu evryting bout mi, so dat unu gwain nuo how Ah deh du, ahn weh Ah plan fi du.

²² Dat dah wai Ah deh sen im tu unu now, so dat ihn kyan tel unu how wi deh du, ahn fi inkorij unu.

²³ Fi di laas, bredrin, Ah prie tu God, wi Faada, ahn di Laad Jesus Christ fi dehn gi piis tu aal di breda ahn sista dem weh deh yah, ahn fi unu fiet iina Jesus Christ mek aala unu lov wan anada beta ahn beta evry die!

²⁴ Ahn Ah prie tu seh God wi bles aal dehn pipl weh lov wi Laad Jesus Christ, wid di kain a lov weh neva gwain en nontaim ataal. Amen!