Ephesians 4 - The New Testament in Islander Creole

Wi aal bilang tu wan bady

¹ So den, Ai, Paul, weh dehn put iina prizn bikaaz Ah deh work fi di Laad; Ah deh beg unu fi waak iina God wie jos laik how ihn tel unu fi liv, wen ihn fos kaal unu fi chros iina ihn Son.

² Unu no fi tink seh unu muo beta an sombady els. Ahn no bii rof wid ada pipl niida, bot gat pieshens wid dem. Shuo unu lov wid evrybady ahn help dem.

³ Memba seh: dah di Holy Spirit weh deh jain unu tugeda iina piis; so unu fi trai wid aal unu haat fi grii tugeda so dat aala unu kyan gat piis wid wan anada.

⁴ Dah wan bady deh, ahn wan Spirit tu, siem wie laik how unu gat wan huop weh God gi unu wen ihn fos kaal unu.

⁵ Den, unu gat wan Laad, wan fiet, ahn wan baptizam.

⁶ Rait so, wi gat jos wan God ahn him dah di Faada ah aala wi. Ahn wi Laad dah di Wan weh ruul uova wii. Him work chruu wi ahn him deh iina aala wi!

⁷ Memba tu seh: Christ wehn bles aala wi wid wan speshal gif, ahn dis shuo wi fi him gries.

⁸ Dat dah weh wehn rait iina di Skriptyo, weh seh: “Wen ihn gaan op tu di muos hai plies, ihn wehn ker demde pipl weh ihn win lang wid im, ahn ihn gi gif tu di pipl dem.”

⁹ So Ah aks unu: Weh dat miin wen ih seh, “Ihn gaan op?” Dat miin seh, bifuor ihn gaan op, ihn wehn don kom dongtu di diipis plies a di ort.

¹⁰ So di Wan weh kom dong, dah di siem wan weh gaan op hai paas aal di hevn dem, so dat ihn kuda ful'op di huol yuunivors!

¹¹ Dah him huu wehn gi demya gif tu di pipl dem. Ihn pik som pipl fi bii apasl, ahn som fi bii prafit, ahn som a dem ivanjelis. Ahn ihn pik som ada pipl fi bii pastya ahn tiicha tu.

¹² Christ du dis fi mek God pipl redy fi sorv, so di bady a Christ —weh dah di chorch— kyan get muo stranga.

¹³ Ahn dis work gwain kantinyo til aala wi kom tugeda az wan pipl iina wi fiet, ahn iina weh wi nuo bout God Son. Den, wi gwain laan fi chros iina God iina evryting til wi gruo'op ahn get fi bii riily gud iina evrywie, siem laik Christ himself!

¹⁴ Den, iina dah taim deh, wi no gwain bii laik likl pikniny no muo, weh iizy fi chienj weh dehn biliiv az kwik az dehn hier enyting weh nyuu. Dehn dah laik wan likl buot weh di wiev dem kyan fling bout, wen di strang briiz kiip aan deh chienj ahn bluo di buot dis wie ahn dah neks wie. Demde pipl weh deh trai fi fuul wi op wid dehn rang tiichin, dah jos laik demde win. Dehn liid som biliiva astrie wid dehn triky tiichin dem, weh dehn mek'op dehn uonself!

¹⁵ Insida dat, wi fi lov wan anada, ahn so wid plenty kainis wi fi tel wan anada di chruut. If wi du dat, wi gwain gruo'op muo beta iina evrywie fi bii wan wid Christ, weh dah di hed a di chorch.

¹⁶ Sins Christ dah di hed, dah him inchaaj ah aal di difrent paat a di bady so aala dem kyan jain tugeda jos rait. Ahn evry jaint iina di bady deh help fi kiip di huol bady tugeda. Ahn, wen evry wan a dem deh du weh dehn shuda du, den di huol bady gwain gruo ahn get bil'op gud. Jos so, az aal di paat dem a di chorch lov wan anada, di chorch gwain gruo ahn get bil'op tu.

Di chruu laif weh God gi

¹⁷ So den, Ai Paul —bai di atarity a di niem a di Laad Jesus Christ— deh waan unu seh: Unu no fi liv unu laif no muo laik how demde pipl weh no nuo God deh liv, bikaaz wat demde kain a pipl deh tink, no wot notn ataal!

¹⁸ Dehn haat no uopm ahn dehn main uova daak, so dehn kyaahn andastan di laif weh God gi. Dehn don ton stobant, ahn so dehn kyaahn laan notn ataal!

¹⁹ Dehn no gat non shiem bout notn niida. So dehn du aal kain a wikid tingz weh dehn main tel dem fi du; dehn sliip roun wid ada pipl ahn kyaahn stap demself nontaim!

²⁰ Bredrin, dat dah neva weh unu laan bout Christ!

²¹ Az fi unu, Ah nuo seh unu, weh dah ihn falowa dem, wehn hier bout im. Dehn don tiich unu di chruut aredy weh wi fain ongl iina di Laad Jesus!

²² So den, unu fi gi'op unu uol wie a livin weh wehn mek unu du dehn bad tingz weh unu yuuztu du. Dah wie a livin wuda distrai unu, bikaaz ih wuda mek unu waahn du wan paila shiemin tingz chruu di faalsnis iina unu haat.

²³ Insida dat, mek God Spirit chienj unu haat ahn di wie unu tink.

²⁴ Unu fi bihiev laik wan nyuu porsn, weh God wehn mek fi bii laik him. Dah nyuu porsn gwain liv huoly ahn du weh rait iina God sait!

²⁵ So den, bredrin, evry wan a unu fi stap tel lai! Unu fi tel di chruut tu wan anada —az breda ahn sista iina Christ— bikaaz aala wi tugeda dah fi Christ! Aala wii dah wan bady iina him!

²⁶ So, if unu beks so bad til unu deh si red, unu no fi mek dat mek unu sin muo wosa; bot siem taim mek'ih rait agen wid yo breda. Ahn no mek di son go dong wen unu stil yet beks wid im niida!

²⁷ Unu no fi gi di devl non chaans fi mek unu sin.

²⁸ Ahn enybady weh wuda tiif, ihn no fi tiif no muo! Dah porsn niid fi go work ahn du somting gud wid ihn han, so dat ihn kyan help ihnself ahn enybady els weh gat niid tu.

²⁹ Ahn unu no fi seh notn hietful niida, weh no gwain du nonbady non gud. Insida dat, unu fi seh di wod dem weh gwain help ada pipl, so dat weh unu seh gwain kom fi bil dem op akaadn tu weh dehn niid fi hier. Iina dah wie, unu gwain bii wan blesin tu di pipl dem weh deh hier unu!

³⁰ Den, unu no fi mek di Holy Spirit sad niida. Bikaaz God Spirit dah weh ihn yuuz fi maak unu, fi shuo seh unu dah fi him; ahn him dah unu garanty fi wen di die kom, wen di Laad ihnself gwain set unu frii!

³¹ So, unu no fi gat non kain a bitanis iina unu haat, ahn no fi get so beks til unu get outa kanchruol! Unu no fi baal out pan wan anada, nar insolt'op wan anada, nar shuo non kain a hietful fiilin dem tu wan anada niida.

³² Insida dat, unu fi du gud tu wan anada. Unu fi gat wan waam, kain haat fi wan anada, ahn fi fargiv wan anada jos laik how God wehn fargiv unu, bikaaz unu dah fi Christ!