Ephesians 2 - The New Testament in Islander Creole

Fahn det wen ih kom tu di tingz a God, tu laif iina Him!

¹ Bredrin, unu nuo seh bifuor unu kom tu Christ, unu wehn ded wen ih kom tu di tingz a God. Dis dah wehn bikaaz unu yuuztu liv wan laif deh rifyuuz fi du weh God seh, ahn bikaaz a unu sin dem.

² Demde taim, unu yuuztu fala di bad wie a disya worl. Unu wuda lisn tu wat di Wikid Wan tel unu fi du. Dah him weh ruul uova aala di spirit dem iina di skai, ahn now ihn kanchruol aala demya pipl weh no lisn tu God.

³ Di chruut dah seh, aala wi dah wehn laik dem; wi wende liv how wii waahn. Wi yuuztu du enyting weh wi hyuuman nietyo kaal fah, ahn weh wi main tink'op. Iina datde kandishan, wi wehn gwain fiil God raat pahn wi siem laik evrybady els.

⁴ Bot, bikaaz God wehn ful'op a morsy ahn ihn lov wi so moch,

⁵ ihn mek wi kom alaiv wid Christ iivn wen wi wehn ded iina fi wi sin dem. Memba seh: dah bai God gries wi get siev!

⁶ Ahn now, bikaaz wi deh wid Christ, dah laik God wehn riez wi op wid ihn Son, ahn put wi fi sidong wid him op iina hevn, weh paat wi gwain ruul wid di Laad rait deh!

⁷ Ihn du dis fi shuo wi, fahn now til di en a taim, how griet ihn kainis ahn gries griet; ahn ihn shuo wi ho moch ihn lov wi tu, bai weh ihn du chruu Christ Jesus.

⁸ So, wen God siev unu, dah bikaaz dah fi him gries chruu di fiet weh ihn gi unu fi chros iina im. Dis no gat notn fi du wid unu ahn weh unu kuda du; ih dah wan gif fahn God aluon!

⁹ So den, bredrin, unu no gat notn fi buos bout, bikaaz notn no deh weh unu kuda du fi siev unuself.

¹⁰ Memba seh: God dah wehn di Wan weh wehn mek wi; ahn ihn mek wi wan wid Christ Jesus fi du gud tingz. Ahn him don plan fi wi du dehn gud tingz iina ihn main fahn lang-lang taim abak!

Christ mek aala wi wan pipl

¹¹ Bikaaz a dat, unu weh dah no Jew shuda memba weh unu yuuztu bii. Unu wende liv mongs demya Jew dem weh yuuztu kaal unu, “Di pipl weh no sorkomsaiz,” ahn dehn kaal demself, “Di pipl weh wehn sorkomsaiz.” Bot dat no miin no muo an fi seh, “Dehn wehn get sorkomsaiz.” Ih wen ongl gat fi du wid dehn bady!

¹² Ahn unu memba seh bak den, unu dah neva wan wid Christ. Di Jew dem neva kount unu mongs di pipl fahn Israel weh God wehn pik out. Ahn so, unu yuuztu bii jos laik demde pipl weh dah strienja ahn farina tu di tingz a God. Bak den, unu neva gat non paat iina di fos agriiment weh God wehn mek wid ihn pipl dem. Dehn agriiment dah wehn God pramis tu di Jew dem fi mek dehn bii fi him uon pipl. Ahn iina dah taim, unu yuuztu bii jos laik demde kain a pipl weh neva chros iina God; unu neva gat non huop ataal. Unu yuuztu bii faar-faar fahn God.

¹³ Bot now, bredrin, unu kom fi bii wan wid Christ Jesus, bikaaz Christ don shed ihn blod ahn ded fi unu fi bring unu nier tu God!

¹⁴ Bikaaz Christ ihnself wehn bring fi him piis. Ihn du'ih wen ihn mek di Gentile pipl, ahn di Jew dem kom fi bii wan pipl. Bifuor dat, di Jew ahn di Gentile pipl dem wehn kot aaf fahn wan anada ahn dehn dah wehn laik enimy. Bot, wen Christ ded pahn di kraas, ihn brok dong di waal a hiet weh wehn blak aaf di Jew ahn di Gentile pipl dem fahn wan anada.

¹⁵ Den, Christ du weh wid di Jewish laa dem ahn aala weh ih ruul ahn regyulieshan dem kudn du. Ahn ihn mek wan nyuu pipl outa di Jew dem ahn aala unu pipl weh dah no Jew, so dat wii kuda liv iina piis wid wan anada iina him.

¹⁶ So, wen Christ ded pahn di kraas, ihn du weh wid di hiet bitwiin di Jew ahn di Gentile pipl dem. Ihn don mek aala wi kom fi bii wan bady, ahn ihn don bring wi bak tu God tugeda.

¹⁷ So Christ himself wehn kom ahn priich di Gud Nyuuz a piis tu evrybady, so di Jew ahn di Gentile pipl dem kuda liv iina piis wid wan anada. Ihn priich dah siem mesij tu unu weh dah no Jew, weh wende faar fahn God; ahn tu wii Jew weh wende nier tu im.

¹⁸ Ahn sieka weh Jesus du fi aala wi —Jew ahn Gentile di siem— ihn mek wan wie chruu wan Spirit fi mek aala wi kom tu wi Faada God.

¹⁹ So den, unu weh dah no Jew dah no farina nar strienja no muo. Now, unu dah jos laik God pipl dem weh kom fahn di siem nieshan. Aala wi dah fi God famaly tugeda, Jew ahn Gentile di siem!

²⁰ Unu wehn kom fi bii paat a di bildin weh gat di apasl ahn di prafit dem laik di foundieshan rak dem. Ahn Christ Jesus dah laik di fos brik, di chiif kaana-stuon, weh gi strent tu di bildin.

²¹ Him dah di Wan weh mek di huol bildin fit tugeda ahn ihn mek'ih gruo biga ahn biga fi bii God Templ weh dah fi di Laad.

²² Ahn, bikaaz unu dah wan wid Jesus Christ, him deh bil unu tugeda chruu ihn Spirit iina wan bildin weh paat God deh liv.