Colossians 2 - The New Testament in Islander Creole

Paul kansaan fi di Colossian biliiva dehn fiet

¹ Mek Ah tel unu how haad Ah wende work fi unu ahn di pipl dem weh deh dah Laodicea, ahn fi aala dem ada wan weh neva miit mi yet fies tu fies.

² Ah deh du dis fi inkorij dem so dat demde pipl kyan work tugeda wid lov. Den, dehn pipl gwain get bles wid ful andastandin fi nuo God siikrit plan —ahn dat dah bout Christ himself:

³ Di Laad Jesus gat aal di trezha a God wizdom ahn nalij haid-weh iina him!

⁴ Ah deh tel unu dis so dat nonbady kyaahn fuul unu op wid non fansy taak nar aagyoment, iivn if ih ongl soun gud.

⁵ Bikaaz, iivn duo Ah no deh wid unu rait now, mi spirit dedeh wid unu, ahn Ah glad fi nuo seh unu deh liv di wie unu shuda liv ahn dat unu fiet iina Christ stil stan strang.

Christ gi unu riil laif

⁶ So now, jos laik how unu wehn aksep Jesus Christ az unu Laad; siem wie, unu fi kiip aan deh liv laik pipl weh dah wan wid him!

⁷ Unu fi mek unu ruut dem go diip dong iina Christ, so dat him fi bii di foundieshan fi unu laif! Den, unu gwain gruo muo stranga iina unu fiet, ahn muo stranga iina di chruut weh dehn wehn tiich unu. Den, unu laif gwain ful'op a tanks fi aal weh ihn du fi unu.

⁸ So den, no mek nonbady fuul unu op wid dehn aagyoment weh no gat non sens ahn no wot notn ataal. Dehn maita soun waiz, bot dehn dah faals tiicha weh ongl han dong demde tingz fahn hyuuman bi'in ahn fahn di faals spirit dem, weh ruul uova disya worl. Dehn no kom fahn Christ!

⁹ Bikaaz, iina Christ kies, aala God nietyo liv iina ihn hyuuman bady;

¹⁰ ahn God wehn gi unu chruu laif, wen unu kom fi bii wan wid Christ. Dah him dah di Laad uova evry ruula ahn atarity iina di huol worl!

Moses Laa kyaahn kandem unu no muo

¹¹ So, bredrin, wen unu kom fi bii wan wid Christ, unu don get sorkomsaiz. Bot dat dah neva di siem kain a sorkomsizhan weh pipl du pahn di bady. Unu get sorkomsaiz wid di spiritwal sorkomsizhan weh Christ du. Ahn dat dah fi get rid a unu uol wikid self, so dat ih no gat non powa uova unu no muo.

¹² Ahn wen dehn wehn baptaiz unu, dehn ber unu wid Christ, ahn unu get riez bak op wid him tu wan nyuu laif chruu unu fiet iina God powa —dah siem powa weh wehn riez'op Christ bak fahn di ded!

¹³ Di chruut dah seh, wan taim unu wehn ded iina unu spirit, bikaaz unu yuuztu bihiev bad laik dem weh no nuo notn bout God Laa, ahn so unu wende aanda di powa a unu uon sinful nietyo. Bot now, God gi unu chruu laif wid Christ tu. Ihn don paadn aala wi sin dem.

¹⁴ So den, di Laad don waip out aala di chaaj dem weh wende gens wi, sieka wi gaan gens aala demde ruul ahn regyulieshan. Ihn tek demde chaaj ahn distrai dem, wen ihn niel dem tu di kraas!

¹⁵ Dat hapm so God kuda tek weh di powa a di wikid ruula ahn atarity dem iina di spirit worl. Ahn ihn mek wan uopm shuo a dem, wen ihn liid dem prizna iina ihn viktry paried.

¹⁶ So bredrin, unu no fi mek nonbady joj unu bout weh unu shuda iit nar jrink. Dehn no fi tel unu weh unu shuda du pahn dehn speshal waaship die evry yier or di taim evry mont wen di pipl dehn fi kiip'op di nyuu muun, or fi kiip di Sabat die niida.

¹⁷ Demde kain a tingz dehn dah no notn bot laik wan sheda ah aal di tingz weh fi kom. Bot di riil ting dah Christ himself!

¹⁸ So, wen di pipl dehn go tu unu deh seh dehn nuo muo beta an unu bikaaz dehn kuda si vizhan ahn dehn waaship di ienjel dem, no mek dehn fuul unu op! Demde kain a pipl ongl go aan laik dehn ombl, bot dat dah no so! Dehn ful'op a dehn uon selfish hyuuman wiez!

¹⁹ Pipl laik demde no deh huol aan tu Christ weh dah di hed a di huol Kristyan bady —ahn dah Christ himself gi di bady di strent weh ih niid, ahn ih yuuz di jaint ahn di mosl dem fi huol'ih tugeda az God powa mek'ih gruo strang.

Wi ded tu di worl, bot wi liv fi Christ

²⁰ Memba, bredrin: wen Christ ded, unu don ded tu. Ahn di spirit dem weh deh ruul iina disya worl, dehn no deh ruul unu no muo! Ahn if dat dah so, dah wai unu deh liv laik unu stil yet dah fi disya worl? Dah wai unu deh fala di ruul dem a disya worl?

²¹ Demya ruul dehn seh, “No gat notn fi du wid dat!” “Yuu no fi ties dis!” “Yuu no fi toch dat!” ahn so.

²² Bot dah ongl di pipl dem weh mek demde ruul ahn tiich dem tu ada pipl, bikaaz fuud wehn mek fi iit ahn jrink!

²³ Demde ruul deh, wuda waahn luk laik dehn mek sens wid dehn strik wie fi waaship, di wie how dehn priten fi bii ombl, ahn how dehn ponish dehn bady fi kiip'ih aanda kanchruol. Bot dah no so, bikaaz demde tingz kyaahn help wi nontaim fi kanchruol aal di tingz weh wi sinful bady deh hala out fi du.