3 John 1 - The New Testament in Islander Creole

Di Apasl John rait ihn fren Gaius

¹ Dis leta dah fahn mii, John, weh dah di elda iina di chorch. Ah deh rait tu mi gud fren Gaius, weh Ah lov fi chruut.

² Mi dier fren, Ah prie seh evryting gud wid yu ahn yo bady az helty az yo suol.

³ Ah wehn ongl hapy wen som breda wehn kom ahn tel mi seh how unu fietful, ahn unu deh obie di chruut jos laik yu wehn aalwiez du.

⁴ Notn kyan mek mi muo hapy an fi hier seh, mi pikniny dem deh fala di chruut.

John priez Gaius fi ihn gud work fi di Laad

⁵ Mi dier fren, Ah wehn hier seh yu deh du wan gud work, deh tek kier a di bredrin dem weh travl, iivn wen yu no nuo dem ataal!

⁶ Dehn wehn tel di chorch yahso bout yo lov fi dem. So den yuu, weh dah mi gud fren, Ah deh beg yo fi du yo bes fi help dem di wie di Laad wuda waahn, so dehn kyan kantinyo dehn trip.

⁷ Dah sieka Christ niem demya breda gaan out pahn dehn trip fi du ihn work, ahn dehn neva tek notn fahn dehn pipl weh stil yet no nuo God.

⁸ So den, wi Kristyan pipl hafy help demde ivanjelis, fi wii kyan tek paat iina di work weh dehn deh du fi spred di chruut.

Bot nat aala di pipl dem pie di Apasl John main

⁹ Ah wehn aredy rait wan shaat leta tu di chorch bout dis, bot Diotrephes, weh set op ihnself laik wan liida, neva pie mi non main ataal!

¹⁰ So den, wen Ah kom, Ah gwain taak bout evryting weh him deh go aan wid. Ah gwain tel unu bout di teribl ting dem weh him seh bout wi, ahn di lai dem weh ihn deh tel. Ahn if dat neva bad nof, ihn no waahn welkom di biliiva dem wen dehn kom niida. Ihn gaan so faar fi iivn stap dehn pipl weh waahn welkom dem, ahn trai fi ron dem outa di chorch if dehn du dat!

¹¹ So, mi gud fren, yuu no fi fala di bad tingz —ongl fala di tingz dem weh gud. Memba seh: enybady weh du gud, dah fi God. Bot enybady weh du bad, neva si God yet!

¹² Bot, evrybady taak gud bout Demetrius, iivn di chruu mesij weh ihn tiich, ahn wi grii wid dem. Ahn unu nuo seh weh wi deh seh dah chruut.

John laas griitin dem

¹³ Ah gat wan paila tingz fi tel yu, bot Ah no waahn du'ih wid wan pen ahn ink.

¹⁴ So, Ah gwain kom fi si unu suun; ahn den, wi gwain kyan taak fies tu fies.

¹⁵ Til dah taim kom, piis deh wid unu! Aala yo fren dem weh deh yah sen heluo. Ahn Ah waahn yu hiel'op aala mi fren dem weh dedeh tu. Amen!