2 Timothy 4 - The New Testament in Islander Creole

Paul taim aalmuos uova ahn Timothy hafy tek uova

^1-2 Wen Christ Jesus kom set op fi him kingdom, ihn gwain joj evrybady —di livin ahn di ded dem tu. So den, Ah deh komaan yu, Timothy, fronta God ahn Jesus Christ fi priich God Wod. No stap ataal! Priich'ih weda ih luk laik dah di rait taim or nat. Ahn tiich yo pipl dem gud; kaal dehn atenshan wen dehn du rang, bot du'ih iina wan pieshent wie, so yu kyan inkorij dem tu.

³ Bikaaz di taim deh kom, wen di pipl dem no gwain waahn hier gud, soun tiichin. Insida dat, demde pipl gwain go afta weh dehn waahn. Ahn so, dehn gwain bring iin plenty pipl weh gwain tiich dem weh fi dehn uon iez deh iich dem fi hier.

⁴ Dehn gwain rijek di chruut ahn biliiv ongl suporstishan.

⁵ Bot yuu, Timothy, yu fi kiip yo hed wid yu aalwiez. No fried fi sofa fi di Laad. Du di work a wan ivanjelis ahn finish di jab weh God wehn gi'yo fi du.

⁶ Az fi mii, mai laif dah wan sakrifais yah weh don puor out tu God aredy, ahn dah suun taim fi mii ded.

⁷ Ai don fait wan gud fait. Ai don ron di ries aredy, ahn Ah gwain stie fietful til di en.

⁸ Ahn now, di kroun weh yu get wen yu liv rait, deh wiet fi mi. Dat dah weh di Laad weh dah di Raichos Joj, gwain gi mi pahn Dat Die wen him kom bak. Ahn dah kroun deh, dah no ongl fi mii, bot dah fi evrybady huu deh lang wid aal dem haat, fi mek him kom bak!

Paul tel bout ihn haad taim iina prizn iivn tu di en

⁹ So, mi son, trai az haad az yu kyan fi kom si mi suun,

¹⁰ bikaaz Demas wehn lov di tingz dem weh deh iina disya worl so moch ihn don lef mi ahn gaan aaf dah Thessalonica sity. Crecens gaan dah Galatia tu, ahn Titus gaan dah Dalmatia.

¹¹ Dah ongl Luke deh wid mi. So, go pik op Mark ahn bring im lang wid yo wen yu deh kom, bikaaz him kyan help mi wid di work weh Ah deh du.

¹² Ah don sen Tychicus tu Ephesus.

¹³ Ahn, wen yu deh kom, bring mi jakit weh Ah wehn lef wid Carpus iina Troas, ahn bring mi buk dem tu, speshaly di wan dem weh wehn mek outa leda skin.

¹⁴ Alexander, di man weh mek tingz outa silva metal fi sel, wehn du mi plenty bad tingz. Di Laad gwain pie im bak fi weh ihn du tu mi.

¹⁵ Unu beta wach out fi im bikaaz ihn no grii ataal wid weh wi deh priich, so ihn riily deh gens wii bad.

¹⁶ Di fos taim Ah gaan dah kuot nonbady neva gaan lang wid mi, fi stan op fi mi. Evrybady lef mi. Ah prie seh God gwain fargiv dem fi dat.

¹⁷ Bot di Laad wende wid mi. Ihn gi mi strent so Ah kuda wehn tel di Gud Nyuuz tu aal di pipl dem weh dah no Jew. Ahn so, di Laad siev mi fahn di laiyan mout.

¹⁸ Ahn di Laad gwain siev mi fahn evry wikid ting weh kom gens mi. Ihn gwain kiip mi sief ahn ker mi dah hevn weh paat him deh ruul. So, mek wi gi'im gluory fareva ahn eva. Amen!

Paul laas griitin dem

¹⁹ Tel Priscilla ahn Aquila heluo fi mi, ahn tel aala demde pipl iina Onesiforus hous heluo tu.

²⁰ Erastus wehn stie iina Corinth, ahn Ah lef Trophimus dah Miletus bikaaz ihn wehn sik.

²¹ So den, Timothy, mi son, trai az haad az yu kyan fi kom fi si mi bifuor winta taim. Eubulus, Prudens, Linus, ahn Claudia, lang wid aal dehn ada bredrin, aala dem sen heluo tu yu.

²² Ah prie seh di Laad Jesus Christ deh wid yo spirit. Ahn Ah prie seh God gries gwain deh wid aala unu. Amen!