2 Timothy 3 - The New Testament in Islander Creole

Haad taim iina di laas die dem

¹ Now den, Timothy, yu fi andastan seh juurin di laas die dem, wi gwain gat som teribl taim.

² Bikaaz yo gwain gat som pipl weh jos lov demself ahn lov mony tu. Ahn som ada wan dem weh gwain buos ahn tink dehn muo beta an di ada pipl dem. Som pipl gwain insolt ada pipl, ahn no gwain pie non main tu dehn muma, nar weh dehn pupa tel dem fi du. Dehn no gwain tel nonbady tanks fi notn ahn dehn no gwain waahn gat notn fi du wid di tingz dem bout God.

³ Dehn no gwain kier fi notn ataal bout nonbady, ahn dehn no gwain gat non morsy pahn nonbady niida. Dehn gwain taak bad bout wan anada ahn huol wan anada laif chiip. Demya kain a pipl gwain kyaahn kanchruol demself. Dehn gwain go wail if enybady get iina dehn wie, ahn dehn gwain hiet evryting weh gud.

⁴ Dehn gwain bii pipl weh nonbady kyaahn chros. Dehn gwain bihiev wail ahn ful a demself. Demya kain a pipl gwain lov plezha muo an how dehn lov God.

⁵ Dehn gwain plie laik dehn deh fala fi wi rilijan, bot riily dehn no waahn God gat non kain a powa uova dehn laif ataal. Timothy, yu no fi miks'op wid demde kain a pipl nontaim!

⁶ Som a dem go iina pipl hous ahn tek kanchruol a dehn sily uman weh deh bordn dong wid dehn sin, ahn weh go afta aal kain a wikid tingz weh deh kanchruol dem.

⁷ Demde uman dehn redy aal di taim fi jos kiip aan deh laan, bot stil yet dehn kyan neva nuo wat dah chruu!

⁸ Jos laik Jannes ahn Jambres wende gens Moses, siem wie demde kain a pipl yah, dehn deh gens di chruut. Dehn no tink rait; dehn ongl pie main tu wikidnis. Dehn gat faals fiet ahn God don ton weh fahn dem, bikaaz dehn no biliiv rait!

⁹ Bot demde kain a pipl no gwain get faar, bikaaz evrybady gwain si seh dehn ongl stupid. Ahn dat dah di siem ting weh hapm tu Jannes ahn Jambres!

Wat Paul tel Timothy fi du fi di laas paat a ihn leta

¹⁰ Bot yuu, Timothy, yu wehn pie atenshan tu demya tingz weh Ai don tiich yo. Yuu wehn si how Ai wende liv, ahn yu nuo weh Ah wehn waahn du wid mi laif. Yu nuo bout mi fiet iina di Laad, mi pieshens ahn lov, ahn aal di sofarin weh Ah put'op wid iina di paas.

¹¹ Yu nuo how di pipl dehn fait mi, ahn aal di persikyuushan ahn sofarin Ah gaan chruu. Yu nuo weh hapm tu mi iina Antioch ahn Iconium sity dem ahn iina Lystra tu —aal di bad tingz weh di pipl dehn du mi, weh Ah wehn hafy bier. Stil yet, di Laad ker mi chruu aala demde uova tof tingz!

¹² Dah chruut, enybady weh dah fi Christ Jesus ahn waahn liv rait gwain hafy put'op wid plenty persikyuushan fahn ada pipl.

¹³ Dehn gwain gat muo wikid pipl, ahn muo pipl weh tel lai tu; so, ih gwain get wosa ahn wosa. Dehn gwain fuul'op plenty pipl ahn siem taim dehn gwain fuul'op demself tu.

¹⁴ Bot az fi yuu, Timothy, yu fi kiip aan deh biliiv di chruu tingz weh yu don laan ahn weh yu biliiv aredy, bikaaz yuu nuo yu kyan chros demde pipl weh wehn tiich yu fahn di fos taim.

¹⁵ Yo fi memba di tiichin dem fahn wen yu wehn smaal. Dah di Huoly Skriptyo weh tiich yo fi bii waiz, so yu kyan gat fiet iina Jesus Christ fi bii siev.

¹⁶ Dah wehn God ihnself huu weh mek ihn mesinja dem rait dong aala weh iina di Skriptyo, ahn aal demde tingz weh gud fi mek wi tiich di chruut, ahn fi mek wi nuo di tingz dem weh rang iina fi wi laif. So, di Skriptyo gud fi kaal wi atenshan, fi mek wi strang, ahn fi tiich wi how fi liv rait,

¹⁷ so enybady weh waahn sorv God kyan bii redy fi du evry gud work jos laik weh ihn waahn wi fi du!