2 Timothy 2 - The New Testament in Islander Creole

Di suoldya weh no gwain ton bak

¹ Az fi yuu, mi son, yo fi bii strang ahn tek kier a di gries weh God wehn gi'yo, bikaaz wi dah wan wid Christ Jesus.

² Ahn di wod dem weh yu wehn hier mi priich fronta plenty pipl weh dah wiknis, yuu fi paas aan tu ada fietful pipl weh gwain kiip dem iina dehn haat ahn den dehn tiich dem tu ada pipl tu.

³ Yuu fi bier'op aanda sofarin wid mi tu, bikaaz yu dah wan chruu suoldya fi Christ Jesus.

⁴ Ahn memba seh: wan suoldya gwain waahn pliiz di aafisa weh deh uova im, so ihn no fi get miks'op wid aadinary laif.

⁵ Iina di siem wie, di man weh plie spuot kyan neva win di praiz, if ihn no deh fala aal di ruul dem.

⁶ Ahn di faama tu —weh work haad fi mek ihn krap gruo— him shuda bii fos fi get paat a di haavis, no chruut?

⁷ Tink uova demya egzampl weh Ah deh tel yu, Timothy, bikaaz Ah shuor seh di Laad gwain help yu andastan aala ih.

⁸ Timothy, yo fi aalwiez memba di Gud Nyuuz weh Ai deh priich, seh Jesus Christ wehn kom fahn David famaly lain, ahn him dah di Wan weh God wehn riez'op bak fahn di ded!

⁹ Ahn bikaaz Ai deh tel di pipl dem dah Gud Nyuuz, Ah deh yah deh sofa. Dehn iivn chien mi op laik wan kriminal, bot dehn kyaahn chien'op God Wod nontaim ataal!

¹⁰ Bikaaz a dat, Ah deh bier evryting sieka di pipl dem weh God don pik, so dehn kyan get di salvieshan weh kom fahn Christ Jesus wid di gluory weh neva gwain don nontaim.

¹¹ Dis seyin dah chruu, weh ih seh: If wi ded wid Christ, wi gwain liv wid im tu!

¹² If wi no gi'op, wi gwain ruul wid im! If wi seh wi no nuo im, him tu gwain seh ihn no nuo wii.

¹³ Ahn, if wi no fietful, stil yet him gwain bii fietful tu wi, bikaaz ihn kyaahn disuon ihn uon nietyo!

Di workman weh God satisfai wid

¹⁴ So den, Timothy, yuu fi kiip aan deh rimain evrybady bout demya tingz. Ahn speshaly waan dem fronta di Laad, seh dehn no fi aagyo bout demde wod weh no miin notn ataal! Dat no help nonbady, ahn ih jos distrai di pipl dem weh deh hier dem.

¹⁵ Ahn du aal weh yu kyan fi mek God satisfai wid yu, laik wan workman weh no gat notn fi bii shiem fah; ahn weh tiich di pipl dem di chruu Wod a God iina di rait wie, jos laik yu shuda tiich'ih.

¹⁶ Stie weh fahn fuulish taak weh no gat notn fi du wid God, bikaaz dat jos gwain mek di pipl dem stap deh fala God.

¹⁷ Demde kain a tiichin dah laik wan stinkin suor weh no gwain get beta. Hymenaeus ahn Filetus dah wan egzampl a dat kain a wie.

¹⁸ Dehn ton weh fahn di Wie a Chruut, deh seh di taim don paas wen di pipl weh aredy ded gwain get'op fahn dehn griev. So demya two man don opset di fiet a som biliiva.

¹⁹ Bot notn no gwain shiek di strang foundieshan weh God wehn don mek aredy. Ahn di wod dem weh wehn rait pahn dah foundieshan seh, “Di Laad nuo dem pipl weh dah fi him,” ahn, “Evrybady, weh seh dehn dah fi di Laad, hafy stap deh du dehn wikid tingz weh no rait ataal.”

²⁰ Now den, iina wan big hous yu kyan fain aal kain a dish ahn boul. Som a dem wehn mek outa guol ahn silva, ahn di pipl dem yuuz demde fi jos speshal okiezhan. Bot som ada wan wehn mek outa wud ahn mod, ahn di pipl dem yuuz demya chiip wan evry die fi aal kain a tingz.

²¹ So, di biliiva deh, weh kiip faar fahn enyting weh gwain mek dehn bady ahn dehn spirit doty wid sin, demde pipl gwain bii laik dehn fansy guol dish dem. Dehn Maasta gwain yuuz dem fi du ihn speshal work, bikaaz demya pipl gi dehn huol laif tu di Laad, ahn dehn redy fi du aal kain a gud.

²² So den, Timothy, yu fi ron fahn demde temtieshan weh yong pipl aalwiez deh get iina. Insida dat, yu fi go afta evryting weh rait. Go afta fiet, lov, ahn piis, lang wid aal demde pipl weh kaal pahn di Laad wid wan kliin haat!

²³ Ahn no gat notn fi du wid dehn fuulish aagyoment weh di pipl dem, weh no andastan notn, get iina; bikaaz yu nuo seh demde kain a pipl aalwiez end'op iina kwaaril.

²⁴ Memba seh: di wan weh deh du di Laad work, no fi kwaaril. Ihn fi bii kain tu evrybady ahn tiich gud, ahn gat pieshens wid di pipl dem weh haad fi get lang wid.

²⁵ Ihn no fi taak haad nar rof, wen ihn deh tiich dem pipl weh no grii wid im. Bikaaz mieby som taim God gwain gi dem di chaans fi ton fahn dehn sin dem, ahn kom fi nuo di chruut.

²⁶ Den, demde pipl gwain nuo seh weh dehn wehn du, no rait. Ahn den, demde pipl gwain get-weh fahn outa di devl trap, bikaaz him wehn kech dem ahn mek dehn du weh him waahn.