2 Timothy 1 - The New Testament in Islander Creole

Di Apasl Paul rait wan neks leta tu Timothy

¹ Dis leta dah fahn mii, Paul, weh dah wan apasl a Christ Jesus, bikaaz dat dah weh God waahn Ah fi bii. Ihn sen mi fi go tel evrybady bout di laif weh ihn wehn pramis fi gi wi ahn weh wi gat bikaaz wi dah wan wid Christ Jesus.

² Ah deh rait tu yu, Timothy, weh dah laik mi son weh Ah lov. Ahn Ah deh prie seh God, di Faada, ahn di Laad Christ Jesus wuda gi'yo plenty gries, morsy ahn piis iina yo haat!

Paul inkorij Timothy

³ Timothy, mi son, Ah aalwiez memba yo iina mi praya dem. Die ahn nait Ah gi God tanks fi yu, az Ah deh sorv di Laad wid wan kliin kanshans, jos laik weh mi ansesta dem yuuztu du.

⁴ Ahn, Timothy, Ah memba how yu wehn krai, wen Ah wehn hafy lef yo. Ahn dat riily mek Ah so lang fi si yu, so mi haat kyan ful'op wid jai agen.

⁵ Ah memba how yu chros iina God wid aal yo haat jos laik how yo granmada, Lois, ahn yo muma, Eunice, yuuztu du. Ahn now, Ah nuo seh yuu tu gat di siem fiet fi chros God jos laik dem.

⁶ Dat dah wai Ah deh rimain yu fi kiip aan deh yuuz di gif dem weh God wehn gi'yo, wen Ah put mi han pahn yo hed ahn prie fi yo.

⁷ Memba seh: di Spirit weh God gi wi, no mek wi fried! Insida dat, ih mek wi strang fi du God work. Ih put lov iina aala wi haat, ahn mek wi kyan kanchruol wiself tu.

⁸ So den, yu no fi shiem fi tel di pipl dem bout wi Laad, nar shiem fi mii niida, weh now deh iina prizn sieka di Laad. Bot, yuu fi sofa lang wid mi sieka di Gud Nyuuz, az God gi'yo di strent fi du'ih.

⁹ Memba, God siev wi ahn kaal wi fi bii ihn uon pipl. Ahn ihn no kaal wi bikaaz a notn weh wi du, bot fi sieka weh him wehn plan fi du wid wii ahn bikaaz a ihn gries. So, bifuor taim iivn staat, him wehn don gi wi dat gries chruu Christ Jesus.

¹⁰ Ahn now, God gi wi fi him gries wen wi Sievya Christ Jesus wehn kom. Him distrai di powa a det, ahn chruu di Gud Nyuuz ihn mek plenty pipl nuo bout dah laif weh neva gwain don nontaim ataal.

¹¹ God don pik mii fi tel di pipl dem evrywie dis Gud Nyuuz ahn ihn sen mi fi bii wan apasl ahn wan tiicha tu dem.

¹² Dat dah wai Ah stil deh sofa demya tingz. Bot Ah no shiem ataal, bikaaz Ah nuo di Wan weh Ai chros iina. Ahn Ah shuor seh him gat powa; ahn dah him gwain kiip sief aal weh Ah deh chros im fah til Dat Die wen ihn kom bak!

¹³ So den, Timothy, kiip aal di gud wod ahn tiichin dem weh yo wehn hier fahn mi, wid di fiet ahn lov weh wi gat iina Christ Jesus.

¹⁴ Kiip God preshos chruut tu, ahn tek kier a ih wid di help a di Holy Spirit weh liv iina wi.

¹⁵ Yu nuo seh dah aala demde pipl fahn Asia don gaan ahn lef mi —dongtu Phygelus ahn Hermogenes gaan tu.

¹⁶ Bot mek di Laad shuo ihn morsy tu aala di pipl fahn Onesiforus famaly, bikaaz dehn inkorij mi plenty, ahn dehn neva shiem a mi, bikaaz Ah wende iina prizn.

¹⁷ Az suun az ihn get dah Rome, ihn staat luk fi mi, ahn ihn neva stap til ihn fain mi.

¹⁸ So, Ah prie seh di Laad wi gi'im ihn morsy pahn Dat Die wen Christ kom bak! Yuu nuo gud, Timothy, ho moch Onesiforus work fi help mi iina Ephesus.