2 Peter 3 - The New Testament in Islander Creole

Di Die a di Laad

¹ Mi dier fren dem, dis dah di sekant leta weh Ah deh rait tu unu. Iina di two leta dem Ah trai fi inkorij unu fi tink muo ahn muo bout di tingz dem weh kliin ahn aanes. Unu no fi farget dem!

² Ah waahn unu memba demde tingz weh God huoly prafit dem wehn tel wi ansesta dem lang-lang taim abak. Ahn unu no fi farget niida demya tingz weh Jesus, fi wi Laad ahn Sievya, wehn tel ihn apasl dem fi tel unu fi du.

³ Fos, unu hafy andastan seh iina di laas diez som pipl gwain kom, weh gwain tek unu, mek papishuo. Dehn gwain liv uova bad ahn dehn uon laif gwain kanchruol wid los!

⁴ Demya pipl gwain mak unu, ahn aks unu: “Jesus neva pramis fi kom bak? So, dah weh paat ihn deh now? Him no deh yah, man! Unu stupid, bikaaz fi wi ansesta dem fahn lang taim abak don ded ahn evryting deh di siem wie fahn di biginin ah weh di worl wehn mek!”

⁵ Fi spait dehn no rekonaiz how powaful di Laad powaful, dehn waahn plie laik dehn farget seh, dah wehn God weh gi di aada fi mek di hevn ahn di ort! Ahn di ort wehn kom op outa di waata ahn soroun ih.

⁶ Den, ihn distrai dah uol worl wid waata tu —wid wan big flod!

⁷ Ahn siem wie, God don aada aredy fi mek aal di pipl dem weh no du wat ihn seh fi get bon'op wid wan big faiya!

⁸ Bot unu, weh dah mi gud fren dem, neva farget seh wan die iina God sait dah siem laik wan thousand yierz, ahn wan thousand yierz dah siem laik wan die.

⁹ So, unu no fi tink seh di Laad sluo fi du weh ihn wehn pramis fi du, jos laik som pipl wehn tink. Insida dat, unu fi memba seh, di Laad ongl pieshent wid unu, bikaaz ihn no waahn non a unu get distrai. Him waahn evrybady ton fahn dehn sin dem bifuor ih tuu liet!

¹⁰ God gwain kom bak wen nonbady espek'ih ataal, jos laik wen wan tiif deh kom iina wan hous. Ahn wen Dat Die kom, wi gwain hier wan big loud naiz ahn di skai no gwain dedeh no muo! God gwain mek evry likl ting weh iin deh, bon'op ahn disapier! Ihn gwain joj di ort ahn aal wehn deh iina it!

¹¹ So den, bredrin, laik how aala demde tingz gwain get distrai iina dat wie, weh kain a pipl unu shuda bii, den? Unu laif shuda bii huoly ahn unu shuda sorv ahn ana God bai di wie unu liv fi chruut!

¹² Ahn wail unu deh luk ahed tu Dat Die wen God gwain kom fi joj di worl, du unu bes fi mikies ahn work haad fi mek'ih kom kwika. Ah deh tel unu agen, pahn Dat Die, di hevn dem gwain bon'op ahn get distrai, ahn di tingz dem laik di son ahn di muun iina di skai gwain melt wid di hiit.

¹³ Bot, God wehn pramis aala wi wan nyuu hevn ahn wan nyuu ort weh paat jostis gwain deh fareva —ahn wi kyaahn wiet fi dis hapm!

Peter laas wod dem

¹⁴ Ahn so unu, weh dah mi gud fren dem, wail unu deh wiet fi Dat Die, du unu bes fi mek di Laad fain unu deh liv kliin, so nonbady kyaahn paint dehn finga pahn unu ahn so unu deh iina piis wid God.

¹⁵ Memba seh: di Laad deh wiet wid pieshens fi gi di pipl fahn di worl taim fi get siev. Dis dah di siem tingz weh wi breda Paul wehn taak bout, wen ihn rait unu wid di wizdom weh God wehn gi'im.

¹⁶ Di chruut dah seh, Paul taak bout demde siem tingz iina aal ihn leta dem, wen ihn deh rait bout dis siem mata. Bot som paat a weh ihn seh, haad fi andastan, ahn som pipl weh no nuo notn ataal ahn weh no gat strang fiet, deh trai fi eksplien ih, bot dehn twis'op weh Paul wehn seh! Ahn dehn du di siem ting wid ada Skriptyo tu. So demya pipl deh bring pahn demself fi dehn uon distrokshan!

¹⁷ Ah deh waan unu, weh dah mi gud fren dem, alduo unu nuo dis aredy: Unu no fi mek di siem mistiek weh dehn wikid pipl mek. Unu no fi go di rang wie ahn end'op deh faal fahn di sief pozishan weh unu deh iina.

¹⁸ Bot unu fi kantinyo fi gruo iina gries ahn kantinyo fi laan muo ahn muo bout fi wi Laad ahn Sievya, Jesus Christ, evry die. Ahn mek wi gi'im aal di gluory now ahn fareva. Amen!