2 Peter 2 - The New Testament in Islander Creole

Di faals tiicha dem

¹ Bot, jos laik how dehn wehn yuuztu gat dehn faals prafit iina Israel lan, dah di siem wie unu gwain gat faals tiicha mongs unu tu. Ahn dehn gwain kom wid som faals tiichin weh gwain mek demde pipl, weh hier ahn biliiv'ih, mash'op dehn fiet! Demya kain a tiicha gwain ton dehn bak pahn Christ, dehn Maasta, weh wehn set dem frii fahn di powa a sin. Ahn so, dehn gwain bring kwik distrokshan pahn dem uonself!

² Bot bifuor dehn go fahn deh, plenty pipl gwain fala dem, bikaaz dehn waahn liv slak laif. Ahn weh dehn deh du, gwain mek di pipl dem taak bad tingz gens Di Chruu Wie, weh wii deh fala.

³ Ahn sieka weh dehn so griidy, dehn faals tiicha dem gwain tel unu plenty stuory weh dehn mek'op. Bot dehn jojment deh heng rait uova dehn hed, bikaaz God neva deh sliip, ahn ihn sii aal weh dehn deh du fahn lang-lang taim!

⁴ Memba seh: God neva spier iivn di ienjel dem, wen dehn wehn sin. Ihn chien dem op ahn chruo dem iina di daak pit a hel til Jojment Die!

⁵ Siem wie, God neva spier di uol worl, wen ihn mek di flod kom pahn demya pipl weh neva obie im. Di ongli'is wan weh wehn siev dah wehn Noah, weh wende priich tu di pipl seh, dehn fi liv rait iina God sait. Bot dehn no lisn tu im ataal, so di Laad ongl siev Noah ahn seven ada famaly memba dem.

⁶ Neks, iina di diez a Abraham, God kandem di sity a Sodom ahn Gomorrah dem, wen dehn neva waahn pie im no main. Ahn den, ihn wehn bon dem op wid faiya. Ihn wehn mek wan egzampl outa dem bout weh gwain hapm tu demde kain a pipl weh no waahn obie im!

⁷ Bot God wehn siev Lat, bikaaz him dah wehn wan man weh waak rait wid God ahn weh kudn stan fi si di wie how di pipl dem wehn uova wikid, ahn how dehn wende liv bad aal di taim.

⁸ Lat wehn liv rait deh mongs dehn pipl, bot ihn kudn tek how dehn liv uova bad. Evry die ih hot ihn haat fi si how dehn wehn so wikid.

⁹ So unu si, di Laad nuo how fi siev fi him pipl dem fahn di haad taim dem weh dehn deh go chruu. Ahn ihn nuo how ihn gwain ponish pahn di Die a Jojment aala demya pipl weh deh liv slak laif tu. Iivn now, God jojment deh heng uova dehn hed!

¹⁰ Di Laad God gwain ponish aala dem, speshaly demde kain a pipl weh liv slak laif weh deh fala dehn haat fi demya doty tingz wid dehn bady. Ihn gwain ponish aal demya pipl weh rijek im ahn mak ihn atarity! Dehn faals tiicha, dehn no fried fi nonbady ahn dehn ful a demself. Dehn no iivn fried fi taak bad bout demde livin bi'in weh get dehn gluory fahn hevn!

How bad di faals tiicha dem bad

¹¹ Den du dat, iivn duo di ienjel dem —weh gat plenty muo powa ahn strent an demya faals tiicha— neva taak bad bout di fals tiicha dem fronta di Laad!

¹² Bot demya tiicha dehn taak bad bout demde tingz, weh dehn no nuo notn bout. Dehn dah jos laik wail animal weh no tink ataal! Dehn jos du weh dehn main tel dem fi du. So, jos laik how di wail animal dem baan ahn kom iina disya worl fi mek di pipl dem kech dem ahn kil dem, siem wie God gwain distrai demya wikid tiicha tu!

¹³ Sieka weh dehn wehn mek di pipl dem sofa, demya fals tiicha gwain sofa ahn get pie bak fi weh dehn du. Iivn iina di die taim dehn laik fi gat wail paaty, ahn du evryting dehn fiil laik wid dehn bady! Ahn dehn dah wan shiem ahn disgries, wen dehn kom tugeda wid unu fi iit. Dah dat taim dehn get hapy, bikaaz a di wie dehn deh fuul unu op!

¹⁴ Aal dehn deh luk fah, dah wan chaans fi sliip roun, ahn fuul'op wan man weh marid. Dah laik dehn kyaahn get nof a sin, deh trap demde kain a uman weh wiik. Dehn haat ful a griidinis, ahn so, dehn deh aanda di jojment a God fi chruut!

¹⁵ Dehn don lef di wie weh rait ahn laas dehn wie. Dehn don fala di wie a Baalam —Beor son— weh wehn ongl lov di mony weh ihn gwain get fi du rang!

¹⁶ Dah wehn Baalam donky wehn stap im fahn du ihn wikid work den taim, wen dah donky kaal ihn atenshan iina wan hyuuman vais!

¹⁷ Ahn dem wikid pipl deh, dah siem laik wan wel weh no gat non waata iina it ataal. Dehn dah laik wan daak kloud weh deh shuo seh rien gwain kom, bot wan strang briiz bluo'ih weh, ahn so non rien neva kom. God deh kiip wan uova daak plies fi put demya kain a pipl iina!

¹⁸ Demde pipl buos bout demself wid wod weh no miin notn ataal. Ahn dehn yuuz dehn doty kain a laif fi trap demya pipl weh jos wende trai get-weh fahn liv datde kain a laif deh.

¹⁹ Dehn pramis friidom fi evrybady, bot dehn demself dah wehn sliev tu dehn uon sin ahn koropshan dem! Bikaaz unu si, yuu dah wan sliev tu enyting weh kanchruol yo!

²⁰ Bot, if som pipl kom fi nuo bout fi wi Laad ahn Sievya Jesus Christ, ahn so eskiep fahn dehn wikid wie weh deh distrai pipl iina disa worl, ahn den aftawod ton bak ahn go liv dah kain a bad laif agen, den dehn laif gwain ton muo wosa an how ih wehn yuuztu bii at fos!

²¹ So, ih wuda beta, if dehn neva nuo di rait wie fi liv ataal, an fi nuo ih ahn den ton dehn bak pan ih ahn pahn di komaanment dem weh huoly.

²² Weh hapm tu dem pruuv seh, di seyin dem dah chruut weh seh: “Wan daag gwain go bak tu ihn uon vamit ahn lik'ih op.” Ahn, “Wan pig weh yo wash, gwain go bak ahn ruol iina di mod agen!”