2 Peter 1 - The New Testament in Islander Creole

Di Apasl Peter rait wan neks leta fi inkorij di chorch

¹ Dis leta dah fahn mii, Simon Peter, weh dah wan sorvant ahn wan apasl a Jesus Christ. Ah deh rait dis leta tu aala unu weh shier di siem preshos fiet weh wi gat. Ahn dah fiet wehn kom fahn Jesus Christ, wi God ahn Sievya, bikaaz him dah di Wan weh mek wi kliin iina ihn sait.

² Ah prie seh God gi unu muo ahn muo ah ihn gries ahn piis iina unu haat, wail unu kantinyo fi nuo God, di Faada, ahn chros iina Jesus, wi Laad, muo beta evry die.

God kaal wi fi liv far im

³ Bredrin, dah God huoly powa weh gi wi evryting weh wi niid fi liv wan laif weh gwain pliiz im, chruu weh wi nuo bout di Wan weh kaal wi fi shier iina ihn uon gluory ahn gudnis!

⁴ Iina dis wie, ihn don gi wi aala ihn rich ahn wandaful gif dem weh ihn wehn pramis wi. Ahn demya gif gwain help unu fi eskiep fahn aal di koropshan a disa worl —aal demya wikid ting roun wi weh di hyuuman haat waahn. Ahn so, wid God gif dem unu kyan kom fi bii muo ahn muo laik di Laad imself evry die.

⁵ So den, if God gi unu demya gif dem, unu fi trai unu bes fi chros iina Christ muo ahn muo evry die. Ahn pan tapa dat, liv gud ahn waak iina di rait wie. Ahn pan tapa dat, get fi nuo bout di Laad muo ahn muo, ahn andastan weh ihn waahn unu fi du,

⁶ bikaaz God shuo wi fi kanchruol wiself. Den pan tapa dat, laan fi bier'op aanda evryting, ahn so mek unu laif shuo seh unu dah God pikniny fi chruut.

⁷ Ahn unu fi lov di ada biliiva dem diip dong iina unu haat, ahn den unu gwain gruo fi gat chruu lov fi evrybady!

⁸ Demya dah di tingz dem weh unu niid. Ahn if unu gat plenty a dem, dehn gwain mek unu gruo muo beta, ahn nuo muo bout di Laad Jesus Christ. Unu gwain kount fi somting iina ihn Kingdom!

⁹ Bot di man weh no gat demya tingz iina ihn laif, dah laik sombady weh kyaahn si faar, or iivn weh blain! Ihn don farget seh God wehn fargiv ihn sin dem —dehn wehn get wash weh.

¹⁰ So den, mi fren dem, trai fi work muo haada fi pruuv seh di Laad riily don kaal unu, ahn ihn wehn pik unu out fi bii mongs ihn uon pipl dem. If unu du dis, unu no gwain faal ahn stap chros iina Christ.

¹¹ Den, wen di prapa taim kom, God gwain uopm di giet dem a hevn waid, so unu kyan go iina di Kingdom a fi wi Laad ahn Sievya Jesus Christ, weh gwain laas fareva ahn eva.

¹² Ahn so, Ah deh plan fi kiip aan rimain unu bout demya tingz, alduo unu aredy nuo dem ahn unu deh stan op fi di chruut.

¹³ Yees, Ah tink seh ih gud fi Ah kiip deh rimain unu bout demya tingz az lang az Ai liv iina dis bady!

¹⁴ Bot di Laad Jesus Christ don shuo mi seh mi diez dem pahn disya ort don nomba, ahn Ai suun ded.

¹⁵ Das wai Ah deh du mi bes now fi mek shuor seh aala unu gwain memba demya tingz lang afta Ah gaan.

Di Apasl Peter wehn si Jesus gluory

¹⁶ Wan nada ting: wen wi tel unu seh di Laad Jesus Christ gwain kom bak, wii no deh mek'op non stuory. Bikaaz, dah wid fi wii uon two ai, wii wehn si how griet him griet!

¹⁷ Wii wende rait deh, wen Jesus wehn get ana ahn gluory fahn God, wi Faada. Dat dah wehn wan griet vais seh fahn hevn, “Dis dah mi Son weh Ah lov so moch. Ah so proud a im!”

¹⁸ Wii wiself wehn hier dah vais deh kom fahn hevn, bikaaz wii wende rait deh wid im pahn dah huoly mountin.

¹⁹ So, aala dis mek wi iivn muo shuor seh weh di prafit dem wehn seh dah chruut! Ahn ih wuda du unu gud fi pie atenshan tu ih, bikaaz ih dah laik wan lamp weh deh shain iina wan daak plies til wen di maanin kom. Ahn dah Maanin Staar dah Jesus Christ imself, weh deh riez'op iina unu haat!

²⁰ Bot muo an aal, unu niid fi andastan seh non prafisy iina di Skriptyo neva kom fahn di prafit dehn uonself.

²¹ Di prafit dem neva tink'op demde tingz pahn dehn uon. Dehn wehn aanda di kanchruol a di Holy Spirit, wen dehn tel di mesij weh wehn kom fahn God!