2 John 1 - The New Testament in Islander Creole

Di Apasl John rait wan leta tu wan a ihn chorch dem

¹ Dis leta dah fahn mii, John, weh dah di uol elda iina di chorch. Ah deh rait dis leta tu wan speshal uman ahn ihn pikniny dem weh Ah ongl lov. Ahn dah no ongl mii lov unu, bot dah evrybady weh nuo di chruut, lov unu tu.

² Wi lov unu, bikaaz di chruut liv iina wii, ahn ih gwain deh iina wi haat fareva!

³ Wi prie seh God di Faada ahn ihn Son, Jesus Christ, gwain gi wi gries, ahn morsy, ahn piis iina fi wi haat. Ahn demya tingz gwain deh wid wi, weh nuo di chruut ahn weh lov wan anada.

Chruut ahn Lov

⁴ Ah wehn so hapy wen Ah hier seh som a yo pikniny dem deh fala di chruut, jos laik weh wi Faada tel wi fi du.

⁵ Ahn so, dier uman, Ah deh beg yo: Mek aala wi lov wan anada! Ahn dis komaan weh Ah deh rait, dah no non nyuu ting. Dis dah weh wi nuo fahn wen wi wehn fos biliiv.

⁶ Dis lov, weh Ah deh taak bout miin seh, wi fi liv iina wan wie dat wi obie weh God tel wi fi du; wii fi liv wan laif deh lov ahn rispek wan anada jos laik weh wi wehn hier fahn di biginin!

⁷ Bot wan paila bad tiicha weh gaan out uova di houl worl fi fuul'op di biliiva dem. Demde kain a tiicha no waahn biliiv seh, Jesus Christ wehn kom iina di worl az wan hyuuman bi'in. Pipl laik demde no deh taak di chruut; dehn dah Christ enimy fi chruut!

⁸ So den, unu fi tek kier seh unu no laas weh unu don work fah, bot unu fi get aala demya tingz weh God wehn pramis unu.

⁹ So, if enybady kom deh tiich ahn deh ad aan muo an weh Christ wehn don tiich unu, den unu gwain nuo fi shuor seh, dehn no gat notn fi du wid God! Bot, if dehn kantinyo deh kiip Christ tiichin dem, di Faada ahn di Son gwain deh wid dem.

¹⁰ Ah seh agen, if sombady kom tu unu ahn dehn no kom wid di chruu tiichin, no gat notn fi du wid dem —nat iivn welkom dem iina unu hous. Unu no iivn fi hiel dem niida,

¹¹ bikaaz enybady weh welkom dem, dah dem fren; ahn so, unu gwain deh tek paat iina di wikidnis weh dem deh du!

John laas griitin dem

¹² Ah gat wan paila tingz stil yet fi tel unu, bot Ah no waahn rait dem dong pahn piepa ahn ink. Insida dat, Ah huop fi go si unu, ahn taak tu unu fies tu fies, ahn dat dah di ongl ting weh gwain mek wi rijais fi chruut.

¹³ Unu sista pikniny sen heluo fi unu. Amen!